Әһли Бејт -АБНА- хәбәр аҝентлијинин вердији хәбәрә әсасән: АБШ-ын Азәрбајҹандакы сәфирлијинин мәтбуат катиби Кит Бин дејиб: “Сәфирлијимизин мүвафиг тәһлүкәсизлик сәвијјәсиндә олдуғуна әмин олмаг үчүн Азәрбајҹан һөкумәтинин мүвафиг гурумлары илә иш апарырыг”.
Кит Бин Азәрбајҹанда террор акты төрәдилмәси еһтималы илә әлагәдар нөвбәти хәбәрдарлығы белә шәрһ едиб: “Тәһлүкә һаггында етибарлы мәлумат әсасында сәфирлијимизә Азәрбајҹанда, о ҹүмләдән Америка марагларына гаршы јөнәлмиш мүмкүн террор актларынын баш вермә еһтималы илә әлагәдар јени хәбәрдарлыг дахил олуб. Биз потенсиал тәһлүкәләрлә бағлы Америка вәтәндашларыны мәлуматландырырыг ки, онлар өз сәфәрләрини дүшүнәрәк планлашдырсынлар”.
Кит Бин әлавә едиб ки, АБШ сәфирлији өз фәалијјәтини ади режимдә давам етдирир. Лакин дипломат еһтимал олунан террор актынын характери вә мәлуматы верән мәнбә барәдә суалы ҹавабландырмагдан бојун гачырыб: “Лакин биз һесаб едирик ки, Азәрбајҹанда террор еһтималы вар вә АБШ вәтәндашларыны сајыг олмаға чағырырыг”.
Исраилин Азәрбајҹандакы сәфирлијиндән исә бу өлкәнин террорла мүбаризә гәрарҝаһынын бир нечә ҝүн әввәл өлкәмиздә террор акты төрәдилмәси еһтималы илә бағлы јајдығы хәбәрдарлыға мүнасибәт өјрәнмәк мүмкүн олмајыб. Етибарлы мәнбәләрдән билдирибләр ки, сәфирлик Азәрбајҹанда еһтимал олунан террор акты илә әлагәдар гејри-мүәјјән мүддәтә бағланыб.
Өз вәтәндашларына Азәрбајҹанда мүмкүн террор акты илә бағлы хәбәрдарлыг едән даһа бир өлкәнин Британијанын өлкәмиздәки сәфирлијиндән дә мәсәләјә мүнасибәт өјрәнмәк мүмкүн олмајыб. Сәфирликдән дипломатик миссијанын тәһлүкәсизлијинин тәмин олунмасы илә бағлы тәдбирләр ҝөрүлүб-ҝөрүлмәдији, Азәрбајҹанын мүвафиг гурумлары илә әлагә сахланыб-сахланмадығы барәдә суалы шәрһ етмәјибләр.
Диггәт: Хәбәрдән истифадә етдикдә мәбәјә истинад лазымдыр
