Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Дахили Ишләр Назирлији Исраилин Азәрбајҹанда ҝөзләнилән террор тәһлүкәси илә әлагәдар вәтәндашларыны бу өлкәјә сәфәр етмәмәјә чағырышына мүнасибәт билдириб.
Назирлијин мәтбуат хидмәтинин шөбә рәиси Орхан Мансурзадә ачыгламасында билдириб ки, бу ҝүн Азәрбајҹанда әмәлијјат шәраити вә криминоҝен дурум там нәзарәт алтындадыр. О, бир даһа бәјан едиб Азәрбајҹанда бүтүн сәфирликләрин вә дипломатик нүмајәндәликләрин, еләҹә дә онларын аккредитә олунмуш әмәкдашларынын тәһлүкәсизлији етибарлы шәкилдә горунур, һәмчинин онларын јашадыглары јерләр нәзарәтдә сахланылыр: “Дахили Ишләр Назирлији бу истигамәтдә үзәринә дүшән вәзифәнин өһдәсиндән лајигинҹә ҝәлир”.
Гејд едәк ки, Ҝүрҹүстан, Ермәнистан, Түркијә, Венесуела, Мисир, ФИл Диши Саһили, Мали вә Мавританија кими өлкәләрин сырасында толерантлығы илә сечилән Азәрбајҹанын дахил едилмәси, бир гәдәр тәәҹҹүблүдүр.
Исраилин террорла мүбаризә гәрарҝаһы өлкә вәтәндашларына јахын ҝүнләрдә 9 өлкәјә сәфәр етмәкдән чәкинмәји мәсләһәт ҝөрүб. Бу өлкәләрин арасында Азәрбајҹан вә Түркијәнин дә ады чәкилиб. Исраил режими ады чәкилән өлкәләрдә вәтәндашларын һәр һансы бир тәзјигә вә јахуд террора мәруз галмасыны әсас ҝәтирәрәк, бу өлкәләрә ҝетмәмәји мәсләһәт ҝөрүб.
Мәлумат үчүн билдирәк ки, өтән ҝүн МТН Иҹтимаијјәтлә Әлагәләр Мәркәзинин рәһбәри Ариф Бабајев, АБШ Дөвләт Департаменти вә Америка сәфирлијинин Азәрбајҹанда АБШ вәтәндашларына мүмкүн тәһлүкәләрлә бағлы мәлуматларыны шәрһ едәркән билдирмишди ки, "Азәрбајҹан Республикасынын милли тәһлүкәсизлијинә вә марагларына мүмкүн тәһдидләрин гаршысынын алынмасы үчүн зәрури, габаглајыҹы тәдбирләр ҝөрүлүр. Бу просес даимидир вә бүтүн мүвафиг органлар, о ҹүмләдән Милли Тәһлүкәсизлик Назирлији әмәлијјат шәраитинә там нәзарәт едир”.
Хатырладаг ки, Азәрбајҹан Милли Тәһлүкәсизлик Назирлијинин АБШ-а вердији ҹавабдан сонра Исраилин өлкәмизи јенә дә тәһлүкәли мәкан кими ҝөрмәси анлашылан дејил.
Диггәт: Хәбәрдән истифадә етдикдә мәбәјә истинад лазымдыр
