Әһл Бејт-АБНА-хәбәр аҝентлијинин хәбәринә әсасән Һаким Јени Азәрбајҹан Партијасынын иҹра катиби, депутат Әли Әһмәдов ијунун 12-дә “Медиа форум”-ун“Азәрбајҹан Ирана гаршы БМТ-нин тәтбиг етдији јени санксијалара гошулмалыдырмы” суалына белә ҹаваб вериб:“Бизим истәјимиз вә инамымыз ондан ибарәтдир ки, Иранла бағлы јаранмыш проблемин низама салынмасы үчүн сағлам дүшүнҹә үстүн ҝәләҹәк вә проблемин һәлли мәгсәдилә ҹидди бир ҝәрҝинлијә сәбәб олаҹаг васитә сечилмәјәҹәк”.
Әли Әһмәдов билдириб ки, Азәрбајҹанын Иранла бағлы сијасәти мәлумдур вә бу сијасәт давам етдирилир: “БМТ кими нүфузлу бејнәлхалг тәшкилатын Ирана гаршы санксијалар тәтбиг етмәк һагда сонунҹу гәрарына ҝәлинҹә, Азәрбајҹан дүнја бирлијинин үзвү кими өзүнү бу бирликдән кәнарда тәсәввүр етмир. БМТ-нин гәбул етдији гәрарлар өзүнү дүнја бирлијинин үзвү сајан бүтүн өлкәләр тәрәфиндән гәбул олунаҹаг вә она һансыса дәрәҹәдә әмәл едиләҹәк.
Амма бүтүн бунларла јанашы, бир неҹә факт мүтләг нәзәрә алынмалыдыр. Азәрбајҹан сүлһсевәр бир өлкә олараг дүнјадакы бүтүн проблем вә мүбаһисәли мәсәләләрин сүлһ вә данышыглар васитәсилә һәлл олунмасынын тәрәфдарыдыр. Һесаб едирик ки, Иран проблеминин динҹ јолла дејил, һәр һансы хүсуси ҝәрҝинлијә вә даһа бөјүк фаҹиәләрә ҝәтириб чыхараҹаг үсулларла һәлл олунмасы бүтөвлүкдә дүнја бирлији үчүн мәгбул вариант дејил. Азәрбајҹан үчүн исә бу вариант һеч ҹүр гәбул олуна билмәз. Әввәла, Иранла Азәрбајҹан гоншу дөвләтләрдир. Икинҹиси, Иран вә Азәрбајҹаны бир-биринә бағлајан диҝәр көкләр вә амилләр дә мөвҹуддур. Һесаб едирәм ки, бунлар да нәзәрә алынмалыдыр.
