Бизимјол- Фәләстинин Гәзза золағына 6 ҝәмидән ибарәт “Азадлыг донанмасы” илә һуманитар јардым апаран вә мајын 31-нә кечән ҝеҹә Исраил һәрбчиләринин кечирдији әмәлијјат нәтиҹәсиндә һәбс олунан шәхсләр арасында Азәрбајҹан вәтәндашлары да вар. АПА-нын мәлуматына ҝөрә, бејнәлхалг хәбәр аҝентликләри сахланылан 682 хариҹи өлкә вәтәндашындан 2-нин Азәрбајҹан вәтәндашы олдуғуну хәбәр верир. Сахланыланларын 45-и көнүллү депортасијаны гәбул едиб вә ијунун 1-дә өлкәләринә ҝөндәрилиб. Диҝәр шәхсләр дә 48 саат ичиндә өз өлкәләринә јола салынаҹаглар. Бу барәдә гәрар Исраилин һәрби-сијаси рәһбәрлијинин бирҝә иҹласында гәбул олунуб.
Исраилин Бакыдакы сәфири Михаел Лавон Лотеми Гәззаја һуманитар јардым апаран ҝәмиләрдә һәбс едиләнләр арасында Азәрбајҹан 
вәтәндашларынын олдуғуну тәсдигләјиб. Сәфир сахланылан Азәрбајҹан вәтәндашларынын адларыны сөјләмәјиб: “Онлар һазырда Исраилдәдир”. Азәрбајҹан вәтәндашларынын нә заман ҝери гајтарылаҹаглары һагда суалы ҹавабландыран М. Л. Лотем билдириб ки, бу, нәглијјатла бағлы мәсләдир: “Бу мәсәлә тәјјарә рејсинин нә вахт олаҹағындан асылыдыр”.
Сәфир баш вермиш инсидентин Азәрбајҹан-Исраил мүнасибәтләринә тәсир ҝөстәрмәјәҹәјини дә вурғулајыб.
Еһуд Барак багынчы әсҝәрләрә тәшәккүр етди
Исраилин мүдафиә назири Еһуд Барак Гәззаја һуманитар јардым апаран “Азадлыг карваны”ны ҝәмиләринә һүҹум тәшкил едән әсҝәрләрә һөкумәт адындан тәшәккүр едиб. “Вәзифәнизи јеринә јетирдиниз, ҝәмиләрин Гәззаја ҝетмәсинин гаршысыны ала билдиниз”,- дејә әсҝәрләри зијарәт едән мүдафиә назири Еһуд Барак билдириб.
Еһуд Барак һәмчинин әсҝәләрин гәтијјәтлилијини вә әмәлијјат методларыны јүксәк гијмәтләндириб: ”Биз Шимали Америка вә ја Гәрби Авропада јашамырыг, зәифләрә мәрһәмәт ҝөстәрмәјән Орта Шәгрдә јашајырыг. Өзләрини мүдафиә етмәјәнләрин икинҹи шансы һеч вахт олмаз”.
Исраил Түркијәдәки нүмајәндәлијиндә чалышан әмәкдашларынын аиләләрини евакуасијасына башлајыб. АПА-нын “АФР”ә истинадән јајдығы мәлумата ҝөрә, бу просес тәгрибән 50 нәфәрә шамил олунаҹаг. Бәзи мәнбәләр исә Исраилин Истанбулдакы консуллуғунун фәалијјәтини дајандырдығы барәдә мәлумат јајыблар.
Јевда Абрамов кәшфијјат мәлуматлары ачыглајыб
Азәрбајҹан парламентинин јәһуди әсилли үзвү Јевда Абраов мараглы ачыглама вериб. Депутат билдириб ки, Исраиллә Түркијә арасында баш верән сон һадисәләрә бағлы Азәрбајҹанын Хариҹи Ишләр Назирлијинин, Президент Администрасијасынын мөвгеји онун мөвгејиди. «Ортада инсан тәләфаты вар. Инсан тәләфатына јол верәни исә һансы дөвләт олмасындан асылы олмајараг, гынајырам».
Јәһуди әсилли депутат баш верән һадисә илә бағлы бәзи мараглы деталлары да ачыглајыб. Онун сөзләрин ҝөрә, һадисә һаггында данышанлар чох шеји билмирләр: “Исраил кәшфијјатында мәлуматлар вар. Чохдандыр ки, һуманитар јардым апаран групун хәритәсини, орада апарылан јүкләрин сијаһысыны тәләб едибләр, лакин тәләб јеринә јетирилмәјиб. Онсуз да Исраил һәмин јүкләри гуру јолла Фәләстинә өтүрүб. Нә оларды буну бирликдә һәлл едәндә? Хариҹи кәшфијјатын мәлуматлары вар ки, орада бејнәлхалг террорчу групларын бир нечә үзвү олуб. Десантлар ҝәмијә дахил олан кими һәмин шәхсләр паспортларыны ҹырыб дәнизә атыблар. Нијә? Ортада чох мәсәлә вар... Анҹаг јенә дејирәм ки, Түркијә ҝүҹлү дөвләтдир. Она гаршы белә һәрәкәтләрә јол вермәк олмаз”.
Әһмәд Давудоғлу: «Сәфирмизи ҝери чағыраҹағыг»
Дүнән Түркијә Баш Назирлијиндә Тәһлүкәзислик Шурасынын топлантысы кечирилиб. Түркијә күтләви информасија васитәләринин вердији мәлумата ҝөрә, топланты тәхминән 4 саат давам едиб. Топланты заманы Исраилин “Азадлыг карваны”на етдији һүҹумла бағлы јаранмыш вәзијјәт мүзакирә едилиб.
Дөрд саат давам едән зирвә топлантысы заманы Исраиллә сијаси, игтисади, һәрби вә һүгуги әлагәләрин јенидән нәзәрдән кечирилмәси әсас мүзакирә објекти олуб.
Топлантыда Түркијәнин Баш назири Рәҹәб Тајјиб Әрдоған, дөвләт назирләри, Баш назирин көмәкчиләри вә диҝәр назирләр иштирак едибләр.
Түркијәнин Бакыдакы сәфирлији хариҹи ишләр назири Әһмәд Давудоғлунун чыхышынын мәтнини јајыб. Сәфирликдән редаксијамыза тәгдим олунан чыхышда назир һеч бир өлкәнин бу ҹүр давранмаға һүгугу олмадығыны дејиб.
Давудоғлу: “Биз бүтүн зәрәрчәкмишләримиз үчүн һәр бир һүгуги проседурдан истифадә едәҹәјик. Биз бу тәләбин һәр һансы бир гејд-шәртсиз јеринә јетирилмәсини истәјирик”дејә вурғулајыб.
Ҝөјәртәдә хәсарәт алан вә гәтлә јетириләнләрин сајы илә әлагәдар суалы ҹавабландыраркән Давудоғлу бәјан едиб ки, бу барәдә онларда мәлумат олса да һәмин мәлуматлар өз тәсдигини тапанадәк онлары ачыгламаг доғру олмазды.
“Биздә олан мәлуматлара ҝөрә тәгрибән 20 нәфәр јараланыб вә 10 нәфәр һәлак олуб. Биз Тәл-Әвивдәки сәфиримизә зәрәрчәкәнләрин дәгиг сајынын мүәјјәнләшдирилмәси барәдә зәрури тәлиматлары вермишик” Давудоғлу билдириб..
Бу ҝүндән етибарән Түркијәнин сәфирини ҝери чағыраҹагларыны бәјан едән хариҹи ишләр назири ејни заманда әлавә едиб ки, сәфирлијин һејәти Исраилдәки Түркијә вәтәндашларынын ишләри илә мәшғул олмаг, јаралыларын гајғысына галмаг вә шәһидләрлә әлагәдар бирбаша әлагә имканларыны тәмин етмәк мәгсәдилә фәалијјәтини бир мүддәт давам етдирәҹәк.
Бөјүк Милләт Мәҹиси бәјаннамә гәбул етди
Дүнән Түркијә Бөјүк Милләт Мәҹлиси дә Исраилин Гәззаја јардым дашыјан јардым ҝәмисинә һүҹуму илә бағлы бәјаннамә гәбул едиб. Гәбул едилән сәнәдә әсасән, Исраилин ҝәмиләрә һүҹуму заманы позулан инсан һагларынын јериндә арашдырылмасы үзрә Алт Комиссија јарадылаҹаг вә һәмин Комисссија мәсәлә илә әлагәдар Исраилә ҝедәҹәк.
Комиссија рәһбәри Зәфәр Үскүл мүвафиг сәнәдин гәбул едилдијини вә бунунла бағлы парламентдә бирҝә мәктуб һазырландығыны дејиб.
