Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Түркијә президенти Рәҹәб Тајјип Әрдоған августун 3-дә кечирилән бир конфрансда Фәтуллаһ Ҝүлән вә онун лидери олдуғу тәшкилатла бағлы мараглы ачыгламалар вериб. Р.Т.Әрдоған “ҹамаат”ын әсл үзүнү вахтында халга ҝөстәрә билмәдијинә ҝөрә үзрхаһлыг едиб: “Ҝәлин ачыг данышаг, рәһмәтлик Тургут Өзал да, Бүлент Еҹевит дә, һәтта биз дә онлара көмәк етмишик. Шәхсән мән дә гатылмадығым тәрәфләри олса да, онлара јардымчы олмушам. Һәр шејә рәғмән бу хаин тәшкилатын ҝерчәк үзүнү даһа әввәлдән ортаја чыхара билмәдијим үчүн тәәссүфләнирәм. Буна ҝөрә, һәм Аллаһа, һәм дә милләтә һесаб вермәли олдуғумузу да билирәм. Милләт бизи әфв етсин”.
Түркијә президенти сөзләринә белә давам едиб: “Өлкә ичиндә вә хариҹдә тәһсилә вә јардым фәалијјәтләри чәрчивәсиндә “Аллаһ-Аллаһ” дедикләри үчүн анлајыш ҝөстәрдик. Фикирләшдик ки, ортаг тәрәфләримиз вар. Ејни мәнзилә ҝедән ики ајры јолун олдуғуну дүшүндүјүмүз бу ҹәрәјанын тамамилә башга вә ҝизли һәјата кечирилән планынын олдуғуну ҝөрә билмәдик”.
Әрдоған өлкәсиндә сон 3 илдә чох ваҹиб просесләрин ҝетдијини вә 15 ијул һадисәләри илә бу просесин кулминасија нөгтәсинә чатдығыны дејиб.
Президент әлавә едиб ки, Түркијәдә дөвләт чеврилиши илә әлагәси олан һәр кәс дөвләт гурумларындан хариҹ едилмәлидир: “Сон һадисәләрин иштиракчылары арасында он минләрлә јүксәк вәзифә саһиби вар. Дөвләт чеврилишинә ҹәһд заманы Түркијә дүнја демократијасынын индијәдәк ҝөрмәдији фәргли мәнзәрәни ортаја гојду”.
Диггәт: Хәбәрдән истифадә етдикдә мәнбәјә истинад лазымдыр
