Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Кәрәвиз чох фајдалы ҝөјәртидир. Сон елми арашдырмалар нәтиҹәсиндә мәлум олуб ки, кәрәвизин даим гәбулу јашлы инсанларда тәфәккүрүн вә јаддашын зәифләмәсинин гаршысыны алыр, гоҹалма просесләри ләнҝидир. Имам Рзанын (әлејһи сәлам) тәбабәт һагда бујурдуғу һәдисләрин топлуму олдуғу “Тиббу Рза”(ә) адлы китабда да Кәрәвизин фајдалары һагда јазылыб.
Белә ки, Ислам Пејғәмбәри һәзрәти Муһәммәд (сәлләллаһу әлејһи вә алиһ) кәрәвизи пејғәмбәрләрә мәхсус олан ҝөјәрти адландырыб: “Кәрәвиздән чох јејин. Чүнки о Илјас, Јәсә, Јушә ибн Нун пејғәмбәрләрин јемәји иди.” (Усули Кафи, ҹилд 6, сәһ. 366, һәдис 1.)
Диҝәр бир һәдисдә пејғәмбәри әкрәм (сәлләллаһу әлејһи вә алиһ) имам Һүсејнә (әлејһи сәлам) мүраҹиәт едәрәк бујурур: “Өвладым! Кәрәвиз је; Чүнки пејғәмбәрләрин истифадә етдикләри ҝөјәртидир. Лакин бу унудулуб. Кәрәвиз Илјас вә Хыдыр пејғәмбәрин хөрәјидир. Гәбизлији арадан апарыр, Мәдә вә бағырсаглары тәмизләјир, һафизәни ҝүҹләндирир, дәлилик, ҹүзам (кечмишдә олан горхунҹ үфүнәтли бир хәстәлик), бәрәс- витилиго хәстәлијини (дәри үзәриндә әмәлә ҝәлән ағ ләкәләр) вә горхуну арадан апарыр.” (Әл Фирдовс, ҹилд 5, сәһ. 370, һәдис 2.)
Мүасир елми арашдырмалар 1400 илдән сонра нәһајәт мәсумларымызын бу биткинин фајдалары һагда бујурдуглары гәнаәтә ҝәлиб. Ислам Пејғәмбәринин (сәлләллаһу әлејһи вә алиһ) бујурдуғу кими, Кәрәвиздә олан бәзи надир маддәләр јашлы инсанларда тез-тез инкишаф едән чох ағыр Алсгејмер хәстәлијинин инкишафынын гаршысыны алыр.
Кәрәвизин тәркибиндә чох ваҹиб аминтуршулары (каротин, аспарагин, никотин туршусу, тирозин), ефир јағлары, А, К, Е, Ҹ, Б групу витаминләри, чохлу сајда минераллар (калиум, фосфор, калсиум, магнезиум, синк, дәмир вә с.) вар.
Пејғәмбәрин (сәлләллаһу әлејһи вә алиһ) бјурдуғу һәдисдә гејд олундуғу кими, Кәрәвиз чох тәсирли арыгладан васитә кими таныныр. Кәрәвиз һәзм просесләри сүрәтләндирир, бағырсаглары шлаклар, токсинләр вә диҝәр зәһәрли маддәләрдән тәмизләјир, пијләрин парчаланмасыны сүрәтләндирир. Мәшһур дијетологлар бу ҝөјәртини ширә, коктејл, һәтта шорба шәклиндә арыгламаг мәгсәди илә тутулан пәһризләрдә истифадә етмәк төвсијә едир.
Лифләрлә олдугҹа зәнҝин олан кәрәвиз организмә ишләдиҹи тәсир едир вә бу сәбәбдән гәбизликдән әзијјәт чәкән инсанлар бу ҝөјәртини өз ҝүндәлик гидаланмасына дахил етмәлидир.
Гастрит вә хора хәстәлији олан инсанлар да мүтләг кәрәвиз јемәлидир. Бу ҝөјәртинин тәркибиндә хүсуси У витамини вар ки, бу витамин мәдәнин селикли гишасыны бәрпа етмәјә көмәк едир, илтиһабы вә ағрыны азалдыр.
Кәрәвиз калиумла зәнҝиндир вә бу сәбәбдән үрәјин фәалијјәтинә чох мүсбәт тәсир едир, өдемләри азалдыр, ган дамарлары мөһкәмләндирир.
Кәрәвиз киши сағламлығы үчүн олдугҹа фајдалыдыр. Мүтәхәссисләрин фикиринә ҝөрә, бу ҝөјәрти кишиләрдә потенсијаны (киши ҝүҹү) артырыр, простатитин инкишафындан горујур. Ҹинси сағламлығында проблемләри олан кишиләр һәр ҝүн 1 стәкан кәрәвиз ширәсини ичмәлидир. Ширә һазырламаг үчүн биткинин галын ҝөвдәләри вә јарпаглары истифадә олунур.
Илтиһабәлејһинә вә сидикговуҹу тәсирә малик олан кәрәвиз ширәси сидик ифразы системи илтиһаблары заманы мүалиҹәви васитә кими истифадә олуна биләр.
Кәрәвиз гадынлар үчүн дә чох хејирлидир - менструасија габағы синдромун вә климаксын симптомларыны азалдыр, сачлары, дирнаглары, дәрини даһа сағлам вә ҝөзәл едир.
Кәрәвиз иммун системинә дә мүсбәт тәсир едир, инфексион хәстәликләринин инкишафынынын гаршысыны алыр.
Кәрәвиз синир системимиз үчүн дә чох фајдалыдыр - сакитләшдирир, әһвал-руһијјәни јахшылашдырыр. Стресләр вә һәјаҹанламалар заманы гидаланманыза кәрәвизи вә онун ширәсини дахил един. Бу стреслә мүбаризәдә сизә јахшы көмәк едәҹәк.
Диггәт: Хәбәрдән истифадә етдикдә мәнбәјә истинад лазымдыр
