Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Һөҹҹәтүл Ислам Елсәвәр Әлијев Милли Тәһлүкәсизлик Назирлијинин рајон шөбәсинә чағырылыб.
Буна сәбәб өтән ҝүн баш верән һадисә олуб. Белә ки, Тәртәр рајон Ҹүмә мәсҹидинин ахунду илаһијјатчыја дини либас ҝејиндијинә ҝөрә ирад билдириб. Руһани Елсәвәр Әлијев исә бунунла разылашмајыб вә чыхышларына һәмин ҝејимлә давам едиб. Бундан сонра ахунд илаһијјатчыдан полисә шикајәт едиб. Шикајәт әсасында Елсәвәр Әлијев бир нечә саатлыг полис тәрәфиндән сахланылыб. Ардынҹа илаһијјатчы сәрбәст бурахылыб. Бу ҝүн јенидән тәзјигләрә мәруз галан илаһијјатчы Е.Әлијев МТН-нин Тәртәр рајон шөбәсинә чағырылыб.
Ону да гејд едәк ки, Тәртәр рајонундан Сурија вә Ирага дөјүшмәк үчүн ҝедән террорчуларын сајы елә дә аз дејил. Бунунла бағлы мәтбуатда дәфәләрлә мәлумат дәрҹ олунуб. Бу ҝүн сөзүҝедән рајондан вәһһабиләрин чохлуг тәшкил етдији һалда, Шиә илаһијјатчынын тәзјигләрә мәруз галмасы суаллар доғурур.
Дини рәвајәтләрә ҝөрә, илаһијјатчынын ҝејиндији либас Пејғәмбәр (с) либасы илә ејнидир.
Мәсәлә илә бағлы “Мүсәлман Бирлији Һәрәкаты”нын сәдри, илаһијјатчы Тале Бағырзадә АзадХебер.аз-а ачыгламасында һадисәни писләдијини вә дәрһал тәзјигләрә сон гојулмасыны тәләб етдијини билдириб.
Һәмчинин "Милли-Мәнәви Дәјәрләр" Иҹтимаи Бирлијинин сәдри илаһијјатчы Руһуллаһ Новруззадә Исламазери.аз-а Елсевәр Әлијевә олунан тәзјигләрдән данышыб: "Елсевәр Әлијевлә шәхси танышлығым вар. Гум һөвзәсиндә уғур газанмыш тәләбәләрдән, дин үчүн ҹаны јанан вә чалышан руһаниләрдәндир. Онун буна ҝөрә һүгуг-мүһафизә органларына чағырылмасы сәбәби јерсиз олдуғу кими, утанҹ вериҹидир. Пејғәмбәр либасына ҝөрә руһанинин сахланылмасы һәгигәтән ҝүлүнҹдүр. Шүкүрләр олсун ки, артыг өлкәдә дини аинләрә гаршы һөрмәтсизлик олдугда иҹтимаи гынаға туш ҝәлир. Диндар вә руһаниләрин бу һадисәјә өз етиразларыны дил вә лазым ҝәләрсә әмәлдә ҝөстәрәҹәјинә шүбһәмиз јохдур."
Диггәт: Хәбәрдән истифадә етдикдә мәнбәјә истинад лазымдыр
