Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Таҹикистанын пајтахты Дүшәнбәдә Коллектив Тәһлүкәсизлик Мүгавиләси Тәшкилатынын Коллектив Тәһлүкәсизлик Шурасынын иҹласында чыхыш едән Русија президенти Владимир Путин дејиб: “Әҝәр Москва Суријаны дәстәкләмәсәјди, орада вәзијјәт даһа пис оларды”.
О гејд едиб ки, Русија Суријаја дәстәк вермәсәјди, орада вәзијјәт Ливијадакындан даһа пис, гачгын ахыны исә индикиндән даһа чох оларды.
Суријанын гануни һөкумәтини дәстәкләмәклә Ливија, Ираг, Әфганыстан вә бир сыра өлкәләрдән Авропаја гачгын ахынынын һеч бир әлагәсинин олмадығыны билдирән В. Путин даһа сонра билдириб: “Ислам Дөвләти” террор груплашмасы илә мүбаризә апармаг үчүн ҝеосијаси амбисијалары бир тәрәфә гојмаг вә икили стандартлардан имтина етмәк лазымдыр”.
Русија президенти сонра сөзләринә белә әлавә едиб: “Садә сағлам мәнтиг, глобал вә реҝионал тәһлүкәсизлијә ҹавабдеһлик дүнја иҹтимаијјәтиндән бу тәһлүкәјә гаршы ҝүҹләрини бирләшдирмәји тәләб едир. Ҝеосијаси амбисијалары бир кәнара гојмаг, икили стандартлардан имтина етмәк, шәхси конјуктур мәгсәдләринә чатмаг үчүн бирбаша вә ја долајысы илә ајры-ајры террорчу груплардан истифадә етмәк, о ҹүмләдән кимәсә сәрф етмәјән һөкумәт вә режимләрин дәјишдирилмәси сијасәтиндән имтина етмәк лазымдыр”.
Диггәт: Хәбәрдән истифадә етдикдә мәнбәјә истинад лазымдыр
