Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, милади тарихи илә 610-ҹу илдә әзиз Ислам Пејғәмбәри Һәзрәти Мәһәммәд ибн Абдуллаһ (сәлләллаһу әлејһи вә алиһ) 40 јашына чатдыгда дини дүшүнҹәләр онун һәјатында ҝетдикҹә даһа чох јер тутмаға башлады, о бәзән бүтүн асудә вахтыны бунлара сәрф едирди. Һәлә јенијетмәлик дөврүндә онун дахилиндә баш галдыран руһи һәјәҹан мисли ҝөрүнмәмиш дәрәҹәдә шиддәтләнмишди. О ҝетдикҹә даһа тез-тез вәҹдә ҝәлир, ҝөзүнә әшјаларын һәгиги сурәтләр ҝөрүнүр вә Илаһи Һатифин сәсләрини ешидирди.
Һәзрәти Мәһәммәд ибн Абдуллаһ (сәлләллаһу әлејһи вә алиһ) тез-тез Мәккә јахынлығындакы Һирә мағарасына чәкилиб өз дини дүшүнҹәләрини едир вә һәлә бәшәријјәтә чатдырылмасына әмр олунмадығы ајинә ујғун ибадәт едирди...
Белә мәгамаларын бириндә Һәзрәти Мәһәммәд ибн Абдуллаһ (сәлләллаһу әлејһи вә алиһ) инсанлара һәгиги сөзү – Аллаһын сөзүнү охумағы башламаг һаггында она әмр верән мәләји Һәзрәт Ҹәбраили (әлејһи сәлам) гәфләтән ајдын ҝөрмүш вә Игра (Оху) сүрәсинин илк 5 ајәсини Аллаһ Тәала тәрәфиндән Пејғәмбәрә чадырмышдыр.
بِسْمِ اللَّهِ الرَّحْمَنِ الرَّحِيمِ
اقْرَأْ بِاسْمِ رَبِّكَ الَّذِي خَلَقَ * خَلَقَ الْإِنْسَانَ مِنْ عَلَقٍ *
اقْرَأْ وَرَبُّكَ الْأَكْرَمُ * الَّذِي عَلَّمَ بِالْقَلَمِ * عَلَّمَ الْإِنْسَانَ مَا لَمْ يَعْلَمْ *
Меһрибан вә Бағышлајан Аллаһын Ады Илә
1 (Ја Пејғәмбәр! Гурани-Кәрими бүтүн мәхлугаты јохдан јарадан) Рәббинин ады илә (бисмиллаһир рәһманир рәһим дејәрәк) оху!
2 О, инсаны лахталанмыш гандан јаратды.
3 (Ја Пејғәмбәр!) Оху! Сәнин Рәббин ән бөјүк кәрәм саһибидир!
4 О Рәббин ки, (инсана) гәләмлә (јазмағы) өјрәтди.
5 (О Рәббин ки) инсана билмәдикләрини өјрәтди.
Гејд едәк ки, Һәзрәт Мәһәммәд ибн Абдуллаһы (әлејһи сәлам) биринҹи олараг данышыгсыз Аллаһын елчиси кими таныјан 10 јашлы өз әмиси оғлу (Әбу Талибин әлејһи сәлам оғлу) Әли (әлејһи сәлам) вә фәдакар һәјат јолдашы һәзрәти Хәдиҹә сәламуллаһи әлејһа олмушдур.
610-ҹу илдә әрәбләр ичиндән бир сәс уҹалды:
Еј инсанлар, бир олан Аллаһа иман ҝәтирин!
Аллаһдан башга һеч бир Аллаһ јохдур!
Аллаһдан горхуб пис әмәлләрдән чәкинин!
Сизә бәхш етдији сајсыз-һесабсыз немәтләр үчүн она шүкр един!
Гыз өвладларынызы өлдүрмәјин, сизи јарадан Аллаһ онларын да рузисини верәр.
Гуллары азад един, јетимләрә зүлм едиб малларыны јемәјин!
Диләнчиләри гапыныздан говмајын, малларыныздан онлара еһсан един, бунунла да ҝүнаһларызы тәмизләјин!
Һагдан үз дөндәрмәјин, һәгигәти ҝизләтмәјин, батили тәблиғ етмәјин!
Бу сәс јанлыз әрәбләрә дејил, бүтүн шәрг вә гәрб дүнјасына үнванланмышдыр.
Бу сәс гаранлыглары јарараг инсанларын гәлбинә, руһуна вармышдыр.
Бу сәс көнүлләрин илләрлә ҝөзләдији, һәсрәтин олдуғу сәс иди.
Бу сәс бәшәр виҹданын, фитрәтиндән ҝәлән сәси иди.
Бу сәс Муһәммәд ибн Абдуллаһын (с) сәси иди…
Диггәт: Хәбәрдән истифадә етдикдә мәнбәјә истинад лазымдыр
