АБНА24 Хәбәр Верир, Ермәнистан Президенти Армен Сәркисјан үнванладығы мүраҹиәтиндә иддиа олунан мүстәгиллији әламәтдар һадисә адландырараг онун 30-ҹу илдөнүмүнүн чох чәтин бир дөврдә - 44 ҝүнлүк мүһарибәдән сонра јаранан ағыр вәзијјәтдә “гејд олундуғуну” дејиб. Ермәнистан президенти билдириб ки, “арсахын” “мүстәгиллији”нин вә әһалинин тохунулмазлығынын тәмин едилмәси, Азәрбајҹандан арамсыз јени мүһарибә тәһдидләри, “арсах”ын статусу, сосиал-игтисади вә һуманитар мәсәләләрин һәлли үмуммилли ҝүндәмин приоритетләридир:
“Тарихимиздә ермәни дүнјасы үчүн “арсах” вә “арсахлылар”ын һәр заман хүсуси ролу олмушдур. Артыг ортаг ермәни мәсәләсиндә сәһв етмәјә һаггымыз јохдур”.
Ермәнистан Баш назири Никол Пашинјан исә мүраҹиәтиндә, 44 ҝүнлүк мүһарибә заманы Азәрбајҹанын бүтүн сәјләринә бахмајараг, өз һәдәфинә чатмадығыны иддиа едиб.
Пашинјан дејиб:“Бу ҝүн “арсах” јаралыдыр, амма исрарлыдыр вә Ермәнистан вә ермәни халгынын там дәстәјинә маликдир. Ермәниләр “арсах”ын “азадлығы” уғрунда мүбаризәдә өләнләри хатырлајыр вә гаршыларында баш әјирләр. “Арсах” “халгы”нын өз мүгәддәратыны тәјин етмәк һаггы мүгәддәсдир вә о, ҝүҹ тәтбиги јолу илә дајандырыла билмәз. Буна ҝөрә биз бүтүн бејнәлхалг платформаларда дејирик ки, “дағлыг гарабағ мүнагишәси” һәлл едилмәјиб. Буну һәтта һәмсәдр өлкәләрин бәјанатлары да тәсдиг едир”.
Ермәнистан Хариҹи Ишләр Назирлији дә гондарма “арсах”ын “мүстәгиллик ҝүнү” илә бағлы бәјанат јајыб. Бәјанатда гејд олунуб ки, Ермәнистан мүнагишәнин әдаләтли һәлли вә бөлҝәдә сүлһүн бәргәрар олмасы үчүн “Дағлыг Гарабағ халгы”нын өз мүгәддәратыны тәјин етмәк, тарихи вәтәниндә јашамаг вә инкишаф етмәк һүгугунун мүдафиәсинә давам едәҹәк.
Ермәнистанын кечмиш президенти Роберт Көчәрјан да гондарма “мүстәгиллик ҝүнү” илә бағлы тәбрикинә 44 ҝүнлүк мүһарибәдә ермәниләрин мәруз галдығы ағыр иткиләри гејд етмәсилә башлајыб:
“Бу ҝүн “арсах” дөвләтчилијинин сахланмасынын ҝирову јалныз өз әразиниздә јашамағыныз вә ону рифаһландырмағынызла бағлы сарсылмаз ирадәниздир. Биз бирликдә “арсах республикасы”нын мүдафиәси үчүн мүмкүн һәр шеји етмәлијик”, - Көчәрјан билдириб.
Ермәнистанын үчүнҹү президенти Серж Сәркисјан јајдығы бәјанатда 44 ҝүнлүк мүһарибәдә аҹы мәғлубијјәтин ҝүнаһыны Пашинјанда ҝөрүб:
“2020-ҹи илдә Гарабаға гаршы јени мүһарибә башлады вә Никол Пашинјан тәрәфиндән 9 нојабр 2020-ҹи илдә ҝизли шәкилдә имзаланан капитулјасија Ермәнистан вә Гарабағы јени бир тәһлүкәнин гаршысына гојду вә бунун нәтиҹәләри һәр ҝүн һисс олунур. Ермәнистан һакимијјәти нәглијјат коммуникасијаларынын ачылмасы вә динҹ инкишафла бағлы вәдләри илә халгын сајыглығыны сөндүрүр, өз ҝүҹүндә вә габилијјәтиндә горху вә гејри-мүәјјәнлик јарадыр вә “ики ермәни республикасы”ны јени фәлакәтләрә сүрүкләјир”.
Гејд едәк ки, Азәрбајҹан Республикасы икинҹи Гарабағ мүһарибәси нәтиҹәсиндә өз әразиләринин бөјүк бир һиссәсини Ермәнистанын ишғалындан азад етди. Анҹаг мүнагишәли әрази олан Ханкәнди вә онун әтраф рајонлары һәлә дә Дағлыг Гарабағ Республикасы адландырылан гондарма гурумун нәзарәтиндәдир вә Азәрбајҹанын бу әразијә вә сепаратчы гурума һеч бир мүдахилә имканы јохдур.
342/
3 sentyabr 2021 - 12:23
Xəbər kodu: 1176254
Ермәнистан һөкумәт вә мүхалифәт нүмајәндәләри гондарма “арсах”ын “мүстәгиллик ҝүнү” илә бағлы ермәни халгына “тәбрик” үнванлајыблар.
