АБНА24 Хәбәр Верир, бу барәдә Гырғызыстан президентинин мәтбуат хидмәти мәлумат јајыб. Гырғызыстан Президенти Сооронбај Жеенбеков истефаја ҝетмәк барәдә гәрар гәбул едиб. Гејд едәк ки, октјабрын 6-сы Гырғызыстан Мәркәзи Сечки Комиссијасы (МСК) өлкәдә октјабрын 4-ү кечирилән сечкиләрин нәтиҹәләрини танымајыб. Хатырладаг ки, октјабрын 4-ү Гырғызыстанда республика парламентинә сечкиләр кечирилиб. Сечиҹиләр 12 саат әрзиндә – саат 08:00-дан (Бакы вахты илә 06:00) 20:00-дәк (18:00) сәс верибләр. Парламентдә јерләрә 16 партија иддиа едиб. Сечиҹиләрин јекун фәаллығы 56,2 фаизи өтүб. Мәнтәгәләрин 97 фаизиндә бүллетенләрин емалындан сонра сәсвермәнин илкин нәтиҹәләринә ҝөрә, парламентә дөрд партија дахил олур. Белә ки, "Биримдика" ("Бирлик") 24,44 фаиз, "Мекеним Кыргызыстан" ("Јурдум Гырғызыстан") 23,95 фаиз, "Гырғызыстан" партијасы 8,78 фаиз вә "Бутун Кыргызыстан" ("Бүтүн Гырғызыстан") 7,09 фаиз сәс топлајыб. Мәркәзи Сечки Комиссијасы сечкинин рәсми нәтиҹәләрини сәсвермә ҝүнүндән ән ҝеҹи 20 ҝүн әрзиндә ачыгламалыдыр. Сечкиләрдә мәғлуб олан партијанын нүмајәндәләри күчәләрә чыхыблар. Онлардан биринә - "Гырғызыстанын сосиал-демократлары" Партијасына сабиг Президент Алмазбек Атамбајевин оғлу, Сајитбек Атамбајев рәһбәрлик едир. Етиразчылар сечкиләрин ләғвини вә тәкрар сечкиләрин кечирилмәсини тәләб едибләр. Базар ертәси ахшам Бишкекдә гаршыдурма баш вериб. Өлкәнин Сәһијјә Назирлијинин мәлуматына ҝөрә, нәтиҹәдә 590 нәфәр јараланыб, бир нәфәр өлүб.
342/
