АБНА24 Хәбәр Верир, чыхышы заманы Јунаныстана хәбәрдарлыг едән Әрдоған "Аралыг дәнизиндә атдығымыз бүтүн аддымлары бејнәлхалг һүгуг вә меһрибан гоншулуг чәрчивәсиндә атырыг" дејиб. Бу мәлумата ҝөрә Түркијә президенти өз чыхышында дејиб: “Биз бу ҝүнә гәдәр һәмишә асанлашдыран, јумшалдан олдуг. Анҹаг Јунаныстан бизим мөвгејимизә ејни шәкилдә јанашмыр. Она ҝөрә буну билмәлидирләр ки, белә јанашма тәрзини давам етдирсәләр лазым оланы едәҹәјик. Өлкәмиз һәм бејнәлхалг дәниз һүгугу, һәм дә гәбул олунмуш конвенсијалар бахымындан бу мәсәләдә сонуна гәдәр һаглыдыр. Бу һүгугу да әлиндәки бүтүн имканлардан истифадә едәрәк мүдафиә етмәјә давам едәҹәкдир. 100 ил әввәл Түркијәни инҹә бир сијасәт илә ҹәнубдакы енержи гајнагларындан кәнарда гојанлар Шәрги Аралыг дәнизиндә буну баҹармајаҹаглар. Гитә саһәсиндә гулдурлуға һеч вахт боғун әјмәјәҹәјик.Санксија вә тәһдид дили гаршысында ҝери аддым атмајаҹағыг. Бир әср әввәл вәтәнимизи парчаламағы һәдәфләјән Севр сазишини ҹырыб атдығымыз кими, бу ҝүн дә “Мави Вәтәни” ејни гәтијјәтлә горујуб сахлајаҹағыг. “Оруҹ Рәис” ҝәмимиз планлашдырылдығы вә елан едилдији шәкилдә мүәјјән олунан саһәдә сејсмик тәдгигатларыны апарыр. Дәниз гүввәләримизә аид васитәләр дә “Оруҹ Рәис”и мүшајиәт едир. “Оруҹ Рәис” фәалијјәтинә 23 августа гәдәр давам едәҹәк. Бу мүддәт әрзиндә ҝәмимизә гаршы ән кичик һүҹум едилмәси һалында лазым олан ҹавабы вермәкдән һеч вахт чәкинмәјәҹәјик. Даһа әввәл дә гејд етдијим кими, биз әсла ҝәрҝинлик тәрәфдары дејилик. Кимсәнин һаггына да әл узатмырыг. Биз садәҹә милләтимизин вә Кипр түркләринин һүгугларыны мүдафиә едирик. Аралыг дәнизиндә атдығымыз бүтүн аддымлары бејнәлхалг һүгуг вә меһрибан гоншулуг чәрчивәсиндә атырыг”. Јунаныстандан ҝөзләнтиләринин бириләринин гызышдырмасы илә дејил, мәнтиглә һәрәкәт етмәси олдуғуну вурғулајан Әрдоған дејиб ки, хүсусилә Гәрби Фракијадакы сојдашларымыза гаршы дөвләт терроруну хатырладан әмәлләрә гыса мүддәтдә сон вермәсидир: "Гәрби Фракијадакы мәсҹидләримизә вә мәктәбләримизә һүҹумлар едилир. Биз исә там әксинә, Трабзонда Сүмела Монастырынын бәрпасыны јекунлашдырдыг вә ҝәлиб ајинләрини етдиләр. Бизим дини азадлыг мәсәләсиндә һеч кимлә бир проблемимиз јохдур. Һәр кәс инанҹыны бу өлкәдә тәклүкәсиз бир шәкилдә јашајыр вә јашајаҹагдыр”.
342/
