Әһлибејт (ә) Хәбәр Аҝентлији-Пајтахтда даһа ики мәсҹидин сөкүлмәси илә бағлы Азәрбајҹан Ислам Партијасы етираз бәјанаты јајыб. Партијанын Мәтбуат Хидмәтиндән “ИсламинСеси”нә дахил олан бәјанатда дејилир.
"Бу ҝүн Азәрбајҹан һөкумәтинин сөзү илә әмәли арасында зиддијјәт өзүнү ҝөстәрмәкдәдир. Илимизин "Ислам Һәмрәјлији или" адландырылмасына вә дүнјанын мүсәлман өлкәләринин вәһдәтә, һәмрәјлијә чағырылмасы, Азәрбајҹанын һәмин өлкә нүмајәндәләрини Бакыда ҝөзләнилән Ислам ојунларына дәвәтинә бахмајараг өлкәдә, онун пајтахты Бакы шәһәриндә мәсҹидләрин сөкүнтүсүнә рәваҹ верилди. Диндарларын, намаз әһлинин, ади вәтәндашларын, үмумән мүсәлманларын етираз вә тәпкисинә бахмајараг, кечмиш "Советски" дејилән әразидә гәдим тарихи абидә һесаб едилән, ибадәт оҹагларындан бири артыг сөкүлмүш, "Һаҹы Ҹавад" мәсҹидинин исә дағыдылмасына ҹәһдләр ҝөстәрилмәкдәдир.
Диндарларын өлкә башчысына рәсми мүраҹиәтинә бахмајараг, ағыр техника Һаҹы Ҹавад мәсҹидинин сөкүнтүсүнә ҹәлб едилмишдир. Азәрбајҹан Ислам Партијасы өлкәмиздә мәсҹид сөкүнтүсүнүн јолверилмәз олдуғуну бәјан едир. Әһалиси мүсәлманлардан ибарәт олан бир мәнтәгәдә, өлкәдә һәр һансы бир шәрт, һәтта зәрурәт белә олса Аллаһ евинин дағыдылмасы һеч бир һалда, һеч бир гөвмә хејир ҝәтирмәјәҹәк.
Биз Ислам динимизин тәәссүбкешләри, мүгәддәс дәјәрләримизин дашыјыҹылары олараг мөвҹуд вәзијјәти гијмәтләндирир, бу мәнәви бөһранын дајандырылмасыны ваҹиб һесаб едирик. Ибадәт оҹаглары халгымызын тарихи, мәнәви кечмишинин мүгәддәс абидәләридир. Кимлијиндән асылы олмајараг белә оҹагларын сөндүрүлмәси, дағыдылмасы һеч бир мүсәлмана, бүтөвлүкдә Азәрбајҹана Ислам дүнјасы гаршысында баш уҹалығы ҝәтирмәз. Бу аддым өлкәмиздә елан олунмуш "Ислам Һәмрәјлији" шүары вә истәји илә дабан-дабана зиддијјәт тәшкил едир.
АИП олараг әлагәдар тәшкилатлары вә сөкүнтүјә сәрәнҹам верән дөвләт гурумларыны бу аддымдан чәкинмәјә чағырырыг". Азәрбајҹан Ислам Партијасы /
Диггәт! Хәбәрдән истифадә етдикдә мәнбәјә истинад лазымдыр
