Әһлибејт (ә) Хәбәр Аҝентлијинин вердији мәлумата ҝөрә-Лиз Фуллер Нардаран иши илә бағлы ашағыдакы мәгаләни јазыб.
Дөвләт иттиһамчысы Азәрбајҹан һөкумәтини девирмәјә ҹәһддә иттиһам едилән 18 нәфәрә узунмүддәтли һәбс ҹәзасы вериб. Онлар инсанһаглары активистләри тәрәфиндән виҹдан мәһбусу һесаб едилир.
18 нәфәрин чоху 2015-ҹи илин нојабрында полис рејди заманы сахланылыб. Полис рејдинин һәдәфи 33 јашлы илаһијјатчы Талеһ Бағырзадә иди. О, 2015-ҹи илдә гурулан Мүсәлман Бирлији Һәрәкатынын һәмтәсисчисидир. Дедијинә ҝөрә, һәрәкатын мәгсәди лидерләри халг тәрәфиндән сечилән демократик секулјар дөвләт гурмагдыр.
Бағырзадә рејдин кечирилдији ҝеҹә Һәрәкатын диҝәр һәмтәсисчиси Әбүлфәз Бүнјадовун евиндә сахланылыб.
2 полис забити вә ән азы 4 Нардаран сакини өлдүрүлүб. Анҹаг полис вә Бағырзадәнин тәрәфдарларынын һесабламалары фәргләнир. Азәрбајҹан Дахили Ишләр Назирлији вә Баш Прокурорлуғунун бирҝә бәјанатында дејилир ки, полисә силаһдан атәш ачылыб вә молотов коктејли атылыб.
Анҹаг мүттәһимләр билдирир ки, онлар силаһсыз олуб. Онлардан бири, Бәһруз Әсҝәровун августун 11-дә мәһкәмәдә дедијинә ҝөрә, әмәлијјат заманы о, полисләрин бир-биринә хәбәрдарлыг етдијини ешидиб ки, еһтијатла нишан алсынлар, бир-биринә хәтәр јетирмәсинләр.
Бағырзадәнин иши илә бағлы тутуланлар арасында ән танынмышы АХҸП сәдринин мүавини Фуад Гәһрәманлыдыр. Нардаран рејдиндән 12 ҝүн сонра Фуад Гәһрәманлы фејсбук постунда бу һәбсләри әдаләтсизлик кими гијмәтләндирдији үчүн һәбс едилиб. О, күтләви иғтишаш вә зоракылыға чағырыш етмәкдә ҝүнаһкар билиниб.
Ишҝәнҹә фактлары
Планлашдырылмыш гәтл, терроризм, күтләви иғтишашларын тәшкили, ганунсуз силаһ әлдә етмә, силаһлы бирләшмәләр јаратма, дини нифрәти аловландырма, һөкумәти девириб һакимијјәти әлә кечирмәк мәгсәди илә дөвләт рәсмиләринә гаршы зоракылыгдан истифадә вә башга иттиһамларла августун әввәли 18 нәфәрин мәһкәмәси башлајыб.
Онларын һеч бири өзүнү ҝүнаһкар сајмајыб. Бәзиләри дејиб ки, истинтаг заманы дәһшәтли ишҝәнҹәјә мәруз галдығы үчүн иттиһамлары бојнуна ҝөтүрмәјә мәҹбур олуб. Бәзиләри мәһкәмәдә билдириб ки, сәнәдләри охумадан имзалајыб. Мәһкәмә ишҝәнҹә фактларыны арашдырмагдан имтина едиб.
Вәкилләри дејир ки, ирәли сүрүлән иттиһамлар гурашдырмадыр, шаһидләрә тәзјиг олунуб. Октјабрын орталарында ифадә вермәјә чағырылан беш полис әмәкдашындан дөрдү мүттәһимләри танымајыб.
Дахили ишләр назири Рамил Усубов дөвләт телевизијасына мүсаһибәсиндә әмәлијјатын президентин тапшырығы илә һәјата кечирилдијини дејиб, иттиһам актында исә әмәлијјатын Бағырзадәнин чеврилиш планлашдырдығына даир полисә дахил олан мәлумат әсасында һәјата кечирилдији гејд едилир. Бағырзадәнин вәкили бу тәзады ајдынлашдырмагдан өтрү назир Рамил Усубовун мәһкәмәјә ифадә вермәјә чағырылмасына даир вәсатәт галдырыб. Бундан башга, Усубов дејиб ки, 5 Нардаран сакини өлдүрүлүб, иттиһам актында исә онларын сајы 4 ҝөстәрилиб.
Нијә јерли полис?
Икинҹи мүдафиә вәкили Абил Бајрамов суал едиб ки, әҝәр Бағырзадә вә онун тәрәфдарларынын террор акты һәјата кечирәҹәјинә даир полисә мәлумат дахил олмушдуса, әмәлијјата нијә даһа һазырлыглы олан Милли Тәһлүкәсизлик Назирлији јох, јерли полис ҹәлб олунуб?
Мүсәлман Бирлији Һәрәкатынын сәдр мүавини Аббас Һүсејнов полисә 25 әл атәш ачдығына даир иттиһамлары рәдд едиб.
Бағырзадә тәләб едиб ки, рејдин видео ленти мәһкәмәдә нүмајиш олунсун.
Августун әввәли мәһкәмәдә Талеһ Бағырзадә Азәрбајҹан һөкумәтини гәсдән Нардаранда провокасија јарадараг Һәрәкаты әзмәјә бәһанә јаратмагда иттиһам едиб. О, вурғулајыб ки, һеч вахт зоракылыг тәрәфдары олмајыб. Билдириб ки, Мүсәлман Бирлији Һәрәкаты нојабрын 1-и парламент сечкиләринин ашкар сахталашдырылмасыны тәнгид етдији үчүн һакимијјәт онлардан гисас алыр. Нардаран әмәлијјаты “диггәтли шәкилдә планлашдырылмыш” гисас характери дашыјыр.
Бағырзадә һәмчинин гејд едиб ки, она ишҝәнҹә вериләрәк АХҸП сәдри Әли Кәримли вә Милли Шура сәдри Ҹәмил Һәсәнли әлејһинә ифадә алмаг истәјибләр, анҹаг о, буну етмәкдән имтина едиб.
Декабрын 26-ы дөвләт иттиһамчысы Бағырзадәјә өмүрлүк, Фуад Гәһрәманлыја 11 ил, диҝәрләринә 10-20 ил арасы һәбс истәјиб.
Бакы, Ҝәнҹә, Ләнкәран вә диҝәр шәһәрләрдә һәбс едилән башга шәхсләр дә вар ки, аналожи иттиһамларла мәһкәмә просесинин башланмасыны ҝөзләјирләр.
Диггәт! Хәбәрдәнистифадәетдикдәмәнбәјәистинадлазымдыр!
