Иҹтимаијјәт Исламчы журналист Араз Гулијев вә диҝәрләринә гаршы ишҝәнҹәләри гынады

Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, 2014, Декабр ајынын 22-дә 14 сајлы Ҹәзачәкмә Мүәссисәсиндә мәһкум Елшад Бабајев һәбсхананын 5 надзору тәрәфиндән амансызлыгла өлдүрүлмүшдү. Бундан сонра һәбсханада олан бүтүн мәһбуслар бу ишҝәнҹәләрә сон гојулмасы үчүн аксија кечирмишдиләр. Лакин һәбсхана рәһбәрлији вә "јухары" гурумлар Елшад Бабајевин өлмүнү өрт-бастыр етмәк үчүн орада ҹәзачәкән мәһкумлара ишҝәнҹә вермәклә "карс"а салмышдыр. Ҹәримә камерсына салынан мәһкумлар арасында бир нечә исламчы мәһбус да вар. Онлардан тәсисчи баш-редактор Исламчы журналист Араз Гулијев вә һиҹаб мәһбусу Анар Гасымлы "Тубзон" дејилән һәбсханаја хүсуси тәјинатлыларла апарылыб. Ады чәкилән һәбсханаја да А.Гулијев вә А.Гасымлы дахил олмагла үмумиликдә 25 мәһбус апарылыб. Бу ҹәзачәкмә мүәссисәсиндә онлара гаршы ишҝәнҹә едилдији дејилир.

Cenubnews.com Интернет Гәзети баш вермиш ганунсузлугла бағлы иҹтимаи-сијаси шәхсләрдән мүнасибәт өјрәниб.

Арашдырмачы-јазар Вүсал Надироғлу: "14 сајлы ҸЧМ-дә өлүм һадисәсини мәтбуатдан өјрәндик. Даһа сонра бир груп мәһбусун ( Араз Гулијев вә диҝәрләри) бу дөјүләрәк өлдүрүлмә мәсәләсинә етираз етдијини билдик. Бу факт һәмин ҸЧМ-дән әфв олунараг азадлыға чыхан вәкил Гурбан Мәммәдовун мүсаһибәсиндә дә өз тәсдигини тапды. "Тубзона" апарылан мәһбуслары јахынлары чох нараһатдыр. Һәмчинин дүнән бир нечә мөмин бу мәһбусларын агибәтиндә мәлумат алмаг үчүн тубзона ҝетмишләр. Әдлијјә әмәкдашларын һәр шејин јахшы олдуғуну дејибләр. Амма фактики олараг мәһбусларла ҝөрүш верилмәјиб. Онларын хүсуси мүалиҹә периоду кечдикләрини билдирибләр вә ҝөрүшүн һәләлик гадаған олдуғу дејилиб.Тәбии ки, нараһатчылыг давам едир. Чүнки конкрет бир ачыглама јохдур.

Белә мәгамларда Пенитенсиар хидмәтин әмәкдашлары рәсми шәкилдә гәнаәтбәхш бәјанат вермәлидирләр ки, мәһбусларла бағлы һеч бир нараһатлыг јохдур. Әҝәр о мәһбусларла бағлы һәрһансы хошаҝәлмәз һадисә баш верәрсә, бу ҹәмијјәтдә бөјүк ажетаж јарадаҹаг. Бу һадисәнин аҹы нәтиҹәси јени проблемләрә јол ачаҹаг."

Репортјорларын Азадлыг вә Тәһлүкәсизлик Институтунун нумајәндәси Идрак Аббасов:"Үмумијјәтлә Араз Гулијев вә диҝәр виҹдан мәһбуслары һакимијјәтин ҝировларыдырлар. Чох тәәссуф ки, леҝитим олмајан һакимијјәт һеч бир бејнәлхалг вә јерли гануну да танымыр, бу сәбәбдән белә һакимијјәтдән истәнилән гејри-инсани аддымлар ҝөзләниләндир. Һакимијјәт ҝировда сахладығы шәхсләри мәнән сындыра билмәјәндә онларын физики мәһвинә наил олмаг истәјир. Бу истигамәтдә ҝениш практикалары да вар. Һәбсдә олан бир нечә виҹдан мәһбусу мәһз гејри инсани давранышын нәтиҹәси олараг бу замана гәдәр дунјасыны дәјишиб. Һабелә, һакимијјәт јалныз виҹдан мәһбуслары дејил, диҝәр мәһбуслара да амансыз давраныр. Тәсәввүр един ки, камеранын нәфәслији беле пулла ачылырса, әрзаг, ҝөрүш рүшвәтлә верилирсә даһа нә дејәсән. Сөзсүз ки, виҹдан мәһбусларына гаршы мүнасибәт даһа амансыздыр. Биз әлимиз чатан бу һагсызлыглар вә һәбсханадакы сон амансызлыглар барәдә бејнәлхалг иҹтимаијјәти мәлуматландырырыг. Умидварам ки, тезликлә һакимијјәтә вә ајры-ајры вәзифәли шәхсләрә гаршы нәһајәт санксиалар тәтбиг олунаҹаг. Һазырки мәрһәләдә исә бүтүн виҹдан мәһбусларына дөзүм арзу едирәм вә онлар унутмасынлар ки, елә әсил азад инсанлар онлардыр. Онларын ады ганла тарихә јазылыр."

"Милли Мәнәви Дәјәрләр" Иҹтимаи Бирлијинин сәдри Руһуллаһ Новруззадә:"Бәзиләри әдаләтсиз гәрарларындан јорулмадығы кими, биздә буна етираз етмәкдән јорулмајаҹағыг. Ҝөрүнүр мәлум өлүм һадисәси пландан узаг олај олуб вә ҝөзләнилмәз һадисәләр ҝөзләнилмәз аддымлара сәбәб олуб. Өлүм һадисәсиндән өнҹә мәһбус гардашларымыза әфв үчүн мүраҹиәт едилмәси буна сүбутдур. Белә ҝөрүнүр ки, 14 сајлы ҸЧМ-дә баш верән ганунсузлугларын сәбәбини ичләриндә исламчы мәһбусларында олдуғу групу ҝөстәрмәјә сәјләр ҝедир.

Бәлкәдә бу әфви гәбул етмәјән исламчы мәһбуслардан интигам алма просесидир.Мөминләрин бу һадисәјә ҝөстәрдикләри тәпки севиндириҹи һалдыр. Нечә ҝүндүр ки, дәјәрли вахтларыны сәрф едиб мәһбус гардашларымызын аиләләринин јанында олуб бунунлада әдаләтсиз гәрарлара етираз едибләр. Аллаһ бизи мәһбус гардашларымызын гәдрини билмәкдә вә бу ағыр заманларда аиләләринин јанында олмагда јардымчы олсун."

Исламазери интернет гәзетинин баш редактору Рамин Бајрамов:" "Тубзон"а ики мәгсәдлә ҝөндәрилмәсини мән һәбсханада оланда ешитмишдим. "Тубзон"а ја һәгигәтән вәрәм хәстәлијинә тутулан мәһбуслары мүалиҹәјә, ја да "ҝөзләр үстүндә олан" мәһбуслары "ҹәза"ландырмаг мәгсәдилә ҝөндәрирләр. Һәр бир һалда истәнилән мәһбус, хүсусилә журналист, виҹдан мәһбусуна гаршы белә бир һагсызлыға етираз едирик, Пенитенсиар Хидмәтдән дә бу ганунсузлуглары дајандырмағы тәләб едәнләрә гошулуруг."

АХҸП-нин мәтбуат хидмәтинин рәһбәри Натиг Адилов:"Истәр мүәссисәдә баш верән фаҹиәви һадисә-мәһкумун өлүмү, истәр дә ондан сонра баш верәнләр сөзүн әсл мәнасында дәһшәтдир.Белә ајдын олур ки, бизим ҹәзачәкмә мүәссисәләри сөзүн әсл мәнасында ҹәза, ишҝәнҹә апаратыдыр.Чох тәәссүф ки, өлкәдәки гејри-гануни һакимијјәтин, шәффафлығын олмамасы сәбәбиндән биз түрмәләрдә инсанларын башына ҝәтирилән ојунлардан зүлмләрдән лазымынҹа хәбәр тута билмирик. Бу гејри шәффаф систем исә бизи идарәедәнләрин ишинә јарајыр вә онлар истәдикләрини едә билирләр.Кефләри истәјәни дөјүр, өлдүрүр, ләјагәтин алчалдыр.Сон баш верәнләр дә тәсадүфү һал дејил.Әминәм ки, өлүм һадисәси илә бағлы ҹинајәт истинтаг органлары тәрәфиндән маһирҹәсинә өрт басдыр едиләҹәк.Ҹинајәткарлар јенә кәнарда галаҹаг.Мәлум һадисәдән сонра дустаглара диван тутулмасы барәдә дә мәлуматлардан хәбәрдарам.Бунлары ганунсузлуг һесаб едирәм.Һакимијјәтин борҹудур ки, һәтта гануну позан инсанлара гаршы һүгуг дилиндә даврансын.Бу онларын бирбаша вәзифә борҹудур.Үмид едирәм ки, медианын вә виҹдан һиссини итирмәјән сағлам тәмәлли гејри-һөкумәт тәшкилатлары баш верәнләри даими диггәтиндә сахлајараг, проблемин даһа да кәскин бөһран һәдди алмасына имкан вермәјәҹәкләр."

Мүсават Партијасы Масаллы РТ-нын сәдри Хасај Сәфәроғлу:"Араз Гулијев вә диҝәр шәрләнәрәк һәбс олунмуш шәхсләрә мүнасибәт әввәлдән бәлли иди.Шүбһәсиз ки, бу ҝүн сијаси мәгсәдләрлә шәрләнәрәк һәбс олунмуш инсанларын бу һәјаты јашамасы үмумиликдә Азәрбајҹандакы инсан һагларынын бәрбад дурумуну ҝөстәрир. Сон ҝүнләр исә 14 сајлы ҹәзачәкмә мүәссәсиндә баш верәнләр, бир ҝәнҹин ичҝәнҹә верилмәклә һәјатына сон гојулмасы бир даһа ону ҝөстәрир ки, тәкҹә мүхалиф фикирли инсанлар јох, һамынын һәјатында тәһлүкә вар. Бу да бүтөвлүкдә инсан һагларына олан анормал мүнасибәтдән доғур. Бу бахымдан мәһбусларын башга бир һәбсханаја мүәммалы шәкилдә, һәм дә сәбәб олмадан көчүрүлмәси вә бу һагда сәһиһ мәлуматын олмамасы әлавә нараһатлыг јарадыр."

Нардаран ағсаггалы Кәрбәлаји Натиг Кәримов:"Өлкәдә ганун дејилән бир шеј олмалыдыр. 14 сајлы ҸЧМ-дә өлүм һадисәси баш вериб. Мәһбусу дөјә-дөјә өлдүрүбләр. Инди дә иҹтимаи-фикри башга сәмтә јөнәлтмәк истәјирләр. Азәрбајҹанда мәһбуслара һәмишә ишҝәнҹә верилиб. Бәзән бу өлүмлә нәтиҹәләниб. Араз Гулијев вә диҝәр исламчы мәһбуслара јухарыдан ҝөстәриш олмасајды һеҹ вахт ҹәза тәтбиг едилмәзди. Бу ганунсузлуглар јухарыдан ҝәлән әмр вә ҝөстәриш әсасында баш верир. Аллаһ достларымыза сәбр вә дөзүм версин. Аллаһ залымларын ҹәзасын версин. Бизләрә дә аҝаһлыг нәсиб етсин."

"Сијаси Мәһбусларсыз Азәрбајҹан" Иҹтимаи Алјансынын тәмсилчиси Огтај Ҝүлалыјев:"Кимлијиндән вә ишләтдији сучдан асылы олмајараг инсанлара ишҝәнҹә верилмәси дүзҝүн һал дејил. Јерли вә бејнәлхалг ганунвериҹилијә ујғун олараг мәһкәмә һөкмү илә азадлыгдан мәһрум едилмиш шәхсин јалныз азадлығы мәһдудлашдырылыр. Онун диҝәр һүгуглары әлиндән алынмыр. Һәмин шәхсләр өз ҹәзаларыны инсан ләјагәтинә хәләл ҝәтирмәјән сәвијјәдә вә шәраитдә чәкмәлидирләр. 14 сајлы ҸЧМ-дә баш верәнләр, мәһкум Елшад Бабајевин дөјүләрәк гәтлә јетирилмәси бир мәналы шәкилдә писләнилмәлидир. Ҹинајәтин төрәдилмәсиндә бир баша вә долајысы иштирак едән һәр бир кәс мәсулијјәтә ҹәлб олунмалыдыр. Еләҹә дә гәтлин баш вердији 22 декабр тарихиндән сонра һәмин мүәссисәдә диҝәр дустаглара гаршы һәјата кечирилән зоракалыглар јол верилмәздир. Һесаб едирәм бүтүн мәсәләләр ганун чәрчивәсиндә һәлл олунмалыдыр. Һадисәсән сонра бәзи мәһбусларын башга ҸЧМ-ләринә ҝөндәрилмәси, "карса" салынмасы вә Вәрәм Диспансеринә ҝөндәрилмәси бизи нараһат едир. Һесаб едирик атылан бу аддымлар дустаг јолдашларынын гәтлә јетирилмәсинә етираз едәрәк һәмрәјлик нүмајиш етдирән мәһбусларын ҹәзаландырылмасы үчүн атылан нөвбәти ганунсуз вә зоракы аддымдыр. Биз "Сијаси Мәһбусларсыз Азәрбајҹан" Иҹтимаи Алјансы олараг бу аддымы писләјир, һәмин мәһбуслара гаршы һәјата кечирилән тәзјигләри писләјир, бу тәзјигләрин дајандырылмасыны вә онлара гаршы нормал мүнасибәтин ҝөстәрилмәсини тәләб едирик. Әкс тәгдирдә баш верәҹәк һәр һансы хоша ҝәлмәз һадисәјә ҝөрә башда Мәдәт Гулијев олмагла Пенитенсиар Хидмәтин рәһбәрлији вә һакимијјәт мәсулијјәт дашыјыр."

Мүсават Партијасынын Диван үзвү Турал Аббаслы:"Заманында мәним өзүм дә 14 сајлы ҸЧМ-дә сахландығым үчүн белә өзбашыналыг вә ганунсузлуг мәнә тәәҹҹүблү ҝәлмәди.Чүнки, бу ҸЧМ шәраитинә вә дахили идарә етмә механизминә ҝөрә Азәрбајҹанда ән пис вә гәддарыдыр.Јәни белә бир јердә мәһбус етиразларынын олмасы тәбиидир.Орада баш вермиш өлүм факты да дедикләрими бир даһа тәсдиг едир.Адлары бу ҹинајәтдә һалланан бәзи нәзарәтчиләри мән шәхсән таныјырам вә онларын белә бир әмәл едә биләҹәкләринә гәтијјән шүбһә етмирәм.Бизим "мәһбус" достларымызы исә биләрәкдән орадан узаглашдырыблар ки, өз ганунсуз әмәлләрини раһат һәјата кечирсинләр вә буна һеч ким етираз етмәсин.Мән бу достларымызын һәјатындан чох нараһатам.Мәдәт Гулијевин рәһбәри олдуғу хидмәтдә мәһбусларын ишҝәнҹә вериләрәк өлдүрүлмәси чох адиләшиб. Мән бурадан јерли вә бејнәлхалг һүгуг мүдафиәси тәшкилатларына сәсләнирәм ки, баш верән бу ганунсузлуг вә өзнашналыгла мараглансынлар.Ән азындан бу саһәдә Азәрбајҹанын үзәринә ҝөтүрдүјү өһдәликләри јеринә јетирмәси үчүн һөкумәтә тәзјигләр етсинләр.Сонда бу ҝүн һәбсханаларда һагсыз јерә сахланылан мәһбус гардашларымыза вә онларын аиләләринә Аллаһдан сәбр диләјирәм.Әминәм ки, чох јахын заманда бу ганунсузлуглара сәбәб оланлар ганун гаршысында ҹаваб вермәли олаҹаг вә о ҝүн чох узагда дејил."



Диггәт: Хәбәрдән истифадә етдикдә мәнбәјә истинад лазымдыр