Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәрбајҹан Ислам Партијасынын Баш Мәҹлисиндә Доктор Һаҹы Мөвсүм Сәмәдовун президент сечкиләриндә ән лајигли намизәд кими ирәли сүрүлмәсиндән сонра һакимијјәтдә јаранан ваһимә вә нараһатлыг, шәрләнәрәк һәбс олунан Һаҹы Мөвсүм Сәмәдовун тәҹридханада јени ганунсузлугларла үзләшмәсинә сәбәб олуб...
Азәрбајҹан Ислам Партијасы бу һаггда бәјанат верәрәк һакимијјәт кланы тәрәфиндән тәтбиг олунан ганунсузлуглара сон гојулмасыны тәләб едиб...
Бәјанаты зијарәтчиләримизә тәгдим едирик:
Азәрбајҹан Ислам Партијасынын
Б Ә Ј А Н А Т Ы
Ијун ајынын 27-дә саат 18 радәләриндә АИП-ә гурумун сәдри Һаҹы Мөвсүм Сәмәдовун сәһһәтиндә дәјишиклик баш вермәси илә әлагәдар аноним мәлумат дахил олду. Елә һәмин саат АИП функсионерләри М. Сәмәдовун дуруму илә әлагәдар Әдлијјә Назирлији Пенитенсиар Хидмәтин 11 сајлы ҹәзачәкмә мүәссисәсиндә олду, онун вәзијјәти илә јахындан таныш олмаға ҹәһд ҝөстәрдиләр. Хидмәтин әмәкдашлары М. Сәмәдовун сәһһәтиндә һеч бир дәјишиклијин олмамасы барәдә мәлумат версәләр дә ҝөрүш үчүн һеч бир шәраит јарадылмады. Бүтүн сорғулара бахмајараг әлавә һеч бир мәлумат верилмәди.
Һаҹы Мөвсүм Сәмәдовун сон дурумуну өјрәнмәк мәгсәдилә вәкил Анар Гасымовун онунла гануни ҝөрүш тәшәббүсүнүн реаллашмасына да дүнән сүни манеәләр јарадылмыш, ҝөрүшә иҹазә верилмәмишдир.
Артыг һәбсхана диварлары арасында баш верән анлашылмазлыглардан доған шүбһәләр өлкә иҹтимаијјәтиндә М. Сәмәдов барәдә ҹидди нараһатлыг јаратмышдыр. Халга ҝәрәкли иҹтимаи-сијаси хадимин талејинә, тәһлүкәсизлијинә, мүдафиәчиси олдуғу вәкиллә әлагәсинә биҝанәлик истәр өлкә дахилиндә, истәрсә дә бејнәлхалг аләмдә дөвләтә вә халгымыза башуҹалығы ҝәтирмәз.
Һакимијјәт Исламчылара гаршы мүнасибәтдә бурахдығы сәһви арадан галдырмаг әвәзинә проблеми даһа да дәринләшдирир. Азад инсанларын дүшүнҹәсини дәјишмәк, сусдурмаг бәшәријјәтин ән залым гөвмүнә, ганичән ҹәлладларына белә нәсиб олмамышдыр. Исламчыларла јазылмамыш ганунлар әсасында рәфтар етмәк бир даһа сүбүт едир ки, өлкә ганунларла дејил, амбисија вә кәнар гүввәләрин мараглары илә идарә олунур, сечилмиш инсанлар ҹәзаландырылыр.
АИП бүтүн бунларын бир сәбәбини дә гурумун Баш Мәҹлисиндә Мөвсүм Сәмәдовун шәрләнәрәк гејри-гануни һәбс олунмасы нәзәрә алынараг президент сечкиләриндә ән лајигли намизәд кими ирәли сүрүлмәсинин һакимијјәтдә јаратдығы ваһимә вә нараһатлығын нәтиҹәси кими гијмәтләндирир.
Биз бир даһа бәјан едирик ки,мәһбус һәјаты јашамасына, сыхынтылара мәруз гојулмасына бахмајараг Һаҹы Мөвсүм Сәмәдов вә һәр ҝүн тәгиб олунан Азәрбајҹан Ислам Партијасы өлкәдә баш верән һагсызлыг вә әдаләтсизликләрлә, динимизә гаршы атылан бүтүн негатив аддымларла, сүни гадағаларла мүбаризәмизи давам етдирәҹәјик.
02. 07. 2013
Диггәт: Хәбәрдән истифадә етдикдә мәнбәјә истинад лазымдыр
