Әһли Бејт -АБНА- хәбәр аҝентлијинин вердији хәбәрә әсасән Һиҹри-гәмәри тәгвими илә јени 1434-ҹү илин башланғыҹы олан Мәһәррәм ајынын 1-и милади тәгвими илә 2012-ҹи ил нојабрын 15-нә тәсадүф етдир. Мәһәррәм ајы һиҹри-гәмәри илинин ајлары арасында мүгәддәс, мөһтәрәм ајлардан биридир. Бу ај мүгәддәс Ислам дининдә дөјүшләрин гадаған едилдији ај олмагла јанашы, һәм дә тарихә Ашура – Мәһәррәм ајынын 10-ҹу ҝүнү Имам Һүсејн (ә) вә Әһли-Бејт тәрәфдарларынын шәһадәтә јетирилдији ај кими дахил олуб. Бу ај мүсәлман үммәтинин тарихинә ән аҹы, лакин ејни заманда инсанлара гејрәт ,гурур бәхш едән бир һадисә кими дахил олуб. Кәрбәла фаҹиәсинин нәсилләрин јаддашында јашамасы, Имам Һүсејн (ә) һәјат вә мүбаризәсинин јад едилмәси олдугҹа бөјүк әһәмијјәт кәсб едир. Белә ки, Имам Һүсејн (ә) әзадарлығында Һаггын бәрпасы вә Әдаләт уғрунда сәфәрбәрлик һикмәти вардыр. Имам Һүсејн (ә) динин сафлығы уғрунда мүбаризәсинин һәр ил јад едилмәси бәдбинлик әһвал-руһијјәсинин тәлгини дејил, торпаға бағлылығын, ишғал олунан әразиләрин азад едилмәси уғрунда фәдакарлыг вә дәјанәтә чағырышын тәҹәссүмүдүр.
Бу ил Ашура ҝүнү – һәзрәти пејғәмбәрин нәвәси имам Һүсејнин шәһадәтә јетмәси ҝүнү милади тәгвимлә нојабрын 25-нә тәсадүф едир.
Гејд едәк ки, Мәһәррәм ајы мүгәддәс китабымыз Гурани-Кәримдә ады кечән 4 ајдан биридир. Уҹа Рәббимиз бујурур: “Һәгигәтән Аллаһ јанында ајларын сајы, ҝөјләри вә јери јаратдығы ҝүндән бәри 12-дир”. Онларын 4-ү – Рәҹәб, Зүлгәдә, Зилһиҹҹә, Мәһәррәм һарам ајлардыр. Она ҝөрә дә һәмин ајларда өзүнүзә зүлм етмәјин (әт-Төвбә сурәси, 36-ҹы ајә).
Рәббимизин бујруғуна ујғун олараг вә адындан да ҝөрүндүјү Мәһәррәм ајы һарам ај сајылыр. Вә бу ајда мүһарибә етмәк дә һарам бујурулуб. Мәһәррәм һиҹри-гәмәри тәгвиминин биринҹи ајыдыр вә илин башланғыҹы һесаб олунур. Һәлә исламдан әввәл дә гәдим әрәбләр бу ајы јени илин башланғыҹы кими гәбул едир, ону бәрәкәт, јахшылыг, хејир-бәрәкәт, әмин-аманлыг ајы һесаб едирдиләр. Гурани-Кәрим назил олдугдан сонра исә бу ајын јеринин Рәббимиз тәрәфиндән дә гәти мүәјјәнләшдији мәлум олур.
Диггәт: Хәбәрдән истифадә етдикдә мәнбәјә истинад лазымдыр
