Әһли Бејт -АБНА- хәбәр аҝентлијинин вердији хәбәрә әсасән Загатала Рајон Иҹра Һакимијјәти башчысынын биринҹи мүавини Елман Рамазанов нојабрын 8-дә медиаја вердији ачыгламасында белә дејиб: “Өтән ај баш вермиш зәлзәлә илә бағлы 3600 мүраҹиәт алмышыг”.
Октјабрын 14-дә Балакән рајонунун Ҝүрҹүстанла сәрһәдиндә әввәл 7, даһа сонра 5 бал ҝүҹүндә зәлзәлә баш вериб. Јералты тәканлар Загаталада әввәл 6, сонра 4 бал ҝүҹүндә һисс олунуб.
Елман Рамазановун сөзләринә ҝөрә, Фөвгәладә Һаллар Назирлијинин комиссијасы биналара дәјмиш зәрәри мүәјјән едир: “Мај ајында баш вермиш зәлзәләдән сонра 3152 евин гәзалы вәзијјәтдә олдуғу рәсмән тәсдигләниб. Евләрә бахыш давам етдирилир. Чох ҝүман ки, бу рәгәм артаҹаг, чүнки гәзалы ев чохдур. 2803 ев тамамилә сөкүлүб. Мәктәбләрин вә 2712 евин тикинтиси исә давам етдирилир. Чадырларда јашајан аиләләрин сајы хејли азалыб”.
Иҹра һакимијјәти рәсмиси Фөвгәладә Һаллар Назирлијинин зәлзәлә бөлҝәсинә ҝәтирдији 6 әдәд јығма евдән дә данышыб: “О евләрин 2-си Балакән рајонунда, 4-ү исә Загаталада гурашдырылыр. Һәр евә 10 аилә јерләшдириләҹәк. Һәр ҹүр шәраити олан бу евләрә вәзијјәтә чох ағыр олан аиләләр көчүрүләҹәк”.
Мајын 7-дә Загатала рајонунда 12 баллыг ҹәдвәл үзрә 7 бал ҝүҹүндә зәлзәлә баш вериб. Зәлзәлә Загатала, Гах вә Балакән рајонларында дағынтылар төрәдиб.
Бу арада “Күр” Вәтәндаш Ҹәмијјәти Гәрарҝаһы һесабат ачыглајыб. Һесабатда дејилир ки, мајда Гах-Загатала бөлҝәсиндә баш вермиш зәлзәләдән өтән мүддәтдә дөвләт бүдҹәсиндән 300 милјон манат вәсаит ајрылыб: “Вәсаитләрин хәрҹләнмәси сәлаһијјәти Фөвгәладә Һаллар Назирлијинә һәвалә олунуб. Амма мүәјјән заман кечмәсинә бахмајараг Загатала бөлҝәсиндә вәзијјәт аҹынаҹаглы олараг галыр. Рәсми мәлуматлара ҝөрә, зәлзәлә нәтиҹәсиндә Шәки, Гах, Загатала, Балакәндә үмумиликдә 5939 евә вә јүзләрлә сосиал објектә ҹидди зијан дәјиб. 3200 ев гәзалы олдуғуна ҝөрә үчүрулуб вә јени евләрин тикилмәсинә гәрар верилиб. Амма 6 ајдан чохдур ки, инсанларын әксәријјәти чадырларда јашајыр вә бу ҝүнә гәдәр һәлә бир дәнә дә ев тикилиб истифадәјә верилмәјиб”.
Һесабатда Загатала зәлзәләси илә бағлы ајрылан вәсаитләрин фәлакәт үчүн дејил, зәлзәләнин епсиентриндән кәнарда, өлкәнин мүхтәлиф бөлҝәләриндә шәхси вә сијаси мәгсәдләр үчүн истифадә олунмасы илә бағлы мәлуматлар јер алыб.
“Күр” Вәтәндаш Ҹәмијјәти Гәрарҝаһынын бу мәсәләләри арашдырдығы да билдирилир:
- ФҺН вә подратчы ширкәтләрин фәалијјәтиндә шәффафлыг, һесабатлылыг вә ҹәмијјәтә ачыглылығын олмамасы;
- фәлакәт бөлҝәсиндә евләрин вә хүсусән мәктәбләрин тикинтиси илә бағлы дөвләт башчысынын, еләҹә дә иҹтимаијјәтин алдадылмасы, верилән мәлуматларын јанлыш олмасы;
- зәлзәлә үчүн ајрылан вәсаитин тәјинатындан кәнар хәрҹләнмәси, чиркли пулларын јујулмасы механизмләри;
- евләрин тикинтисинин шиширдилмиш базар гијмәтләри илә апарылмасы, тикинти материалларынын алынма мәнбәји вә илкин реал гијмәти, вәсаитләрин мәнимсәнилмәси трајекторијасы;
- иншаат-тикинти ишләриндән мүтәхәссисләрин узаглашдырылмасы, онларын јеринә уҹуз ишчи гүввәсинин, тәҹрүбәсиз шәхсләрин ҹәлб едилмәси;
- подратчы тәшкилатларын монополијаја алынмасы, аилә-гоһум мараглары вә принсипләри илә идарә олунмасы вә саирә.
Диггәт: Хәбәрдән истифадә етдикдә мәнбәјә истинад лазымдыр
