Дәдә-бабадан дәјәрли бир ифадә вар дилимиздә: БИР КИТАБЛЫГ... Азәрбајҹан адлы рүшвәт сәлтәнәтиндә дөзүлмәз ағрыларын тәкҹә адлары бир китаблыгдыр. Һарадан башлајым? Сахта сечкидән, мандат алвериндән, бүтпәрәстликдән, шоу-дөвләтчиликдән, һарадан? Һарадан башлајым ки, охујанын һөвсәләси даралмасын, бу гәмнамәни башаҹан бөлүшсүн? Чарә јохду, БИР КИТАБЛЫГ дәрдләрә кор олуб, бәшәр тарихиндә “ән уникал сијаси ахмаглыг”дан, Әлијев режиминин Исламы балталамаг лајиһәсиндән бир-ики кәлмә јазмагла јувамыза чәкиләк.
Ленин, ата нәнәнә рәһмәт!
Әввәл УЛУ Ленин һаггында һашијә чыхым ки, диндар гардашларым “рәһмәт” сөзүнә ҝөрә бәндәни ләнәтләмәсин. Ленинин ата нәнәси, јәни атасынын анасы калмык олуб. “Калмык” сөзүнүн “галмаг” сөзүндән дүзәлдијини дејирләр. Јәни УЛУ БАБАнын дамарларында түрк ганындан да нәсә вар. Калмыкларын буддист олдуғуну јазырлар. Амма мән түрк әсилини әсас ҝөтүрүб елә мүсәлман адәтијлә бәдзүрјәт арвада рәһмәт охудум.
Бир нөгтә дә: киминсә пислијини габартмаг үчүн ләнәтлик биринә рәһмәт демәк методдур. Јәни сәнә баханда филан оғлу филана рәһмәт дүшүр.
Ленин! Һәрчәнд “Дин халг үчүн тирјәкдир!” (“Религија опиум длја народа”) шүары сәнин јарадыҹылығын дејил. Буну сәндән габаг Маркс, Марксдан габаг романчы Маркиз де Сад, шаир Новалис дилә ҝәтириб. Фәрги јох, әсас одур ки, биз сәни танымышыг. Амма сән динә тирјәк десән дә ону диндарларын евиндән, ҹибиндән чыхармамышдын. Сән динсиз, бир киши кими, дин адамларынын бојнуна даш бағлајыб дәниздә батырсан да гурбанларына наркоман јарлығы асмамышдын. Ким билир, бәлкә ганындакы түрк һавасы буна јол вермәјиб.
Хош хәбәр вар, Ленин. Сәндән 100 ил сонра Азәрбајҹан адлы сәлтәнәтдә Дини әсил Тирјәк форматында диндарларын гәлбиндән јох, ҹибиндән чыхардылар. Хәбәрин хошлуғу ондадыр ки, ҹәһәннәмдә сәнә көлҝә олаҹаг одунлар јол үстәдир.
Ојунун олсун, Мусават!
Мусават јазды ки, “Һиҹаб аксијасынын” “Шејх” ләгәбли тәшкилатчысы сахланылыб. Шејх Аллаһшүкүр Пашазадә һөкмән инҹијәҹәк: Гачаг-гулдуругму ки, ләгәбимиз ола?! – һаггы вар. Азәрбајҹанын мүхалифәт ҝүзҝүсү сајдығымыз Мусават елә билирмиш ки, ШЕЈХ ләгәбдир. Буну Мусаватын дузлу јазарлары гәләмә алсајды јозмаға јер тапыларды. Амма...
УЛУлардан ҝилеј намәсиндә Мусават үзәриндә јүз кәлмәлик дајанаҹаг пис олмазды.
Мусаватҹан, ахы сән халгын ичиндән чыхмысан. Ахы сәндән умаҹаглары вар бу диндар халгын. Ахы сән јахшы билирсән ки, ШЕЈХ ләгәб дејил, дин хадими үчүн титулдур. ШЕЈХи ләгәб сајмағын тәсадүфи нашылыгдыр, јохса рүшвәтхор падшаһлыға шит тәбәссүм пајы? Халгын зүлм сарајаны силкәләјән ләнәт фәрјады сәни севиндирирсә, бу нә импровизәдир?! Јохса дини ҹамеәни үстүнүзә галдырмагла Әлијеви севиндирәҹәк әл вар аранызда?
Нә дедимсә дост кими дедим. Чүнки дост олдуғунуза һәлә үмидим вар.
Иран дәбдән дүшүр, Сурија...
Хәбәр јајылды ки, Суријада тәһсил алмыш Ҹавид Мәммәдов һәбс олунуб. Сијаси просесләрә гатылмајан, идеоложи полемикаларда фәаллығы илә танынан Ҹавидин һәбси дини кәсимдә дә тәәҹҹүблә гаршыланды. Чүнки бу ПАК, САДӘ, НИКБИН топлум һәлә дә рүшвәтхор Әлијев груплашмасында инсанлыг, виҹдан ахтарыр. А “Ҹавид һара, аксија һара” дејәнләр, ҹаваб верәрсинизми ки, рүшвәтхор дәстә һара, һакимијјәт һара? Илһам Әлијев һара, президентлик һара? Һаҹы Мөвсүм, һара террор һара? Һаҹы Абҝүл һара, наркотика һара? Јох, ҹаваб верә билмәзсиниз. Сиз өз паклығынызла һәлә дүшүнүрсүнүз ки, гәзетдә јазылан, радио-телевизијада дејилән дүз олур. Сиз һәлә мәһкум олдуғунуз режимин Лениндән габаға кечдијини, мәҹази тирјәки, һәгиги тирјәкә чевирдијини ҝөрмүрсүнүз...
Аллаһын динини тәблиғ едән бир инсан, Ҹавид Мәммәдов ганунсуз силаһ сахламагда иттиһам олунур. 5 октјабр аксијасында иштирак едән бәрдәли Нәсими Јусиф оғлу Һәсәновдан наркотика тутур бу јарамаз режим. Аксија иштиракчылардан олан Сәхавәт Гулијев дә наркотиклә шәрләнәрәк һәбс олунуб.
Гајыдаг Сурија үзәринә. Ешитдиниз ки, "Азад Сурија Ордусу” адландырылан радикал вәһаби бирләшмәләрин гәтлә јетирилмиш муздурлары арасында һәмвәтәнимиз олуб. Суријада Исламла Күфр вурушур. Тәәҹҹүбләнмәјин. Иланын бир башы олур, бир гујруғу. Әҝәр Сурија мүхалифәти, Азад Сурија Ордусу адланан мүбһәм гүввәни АБШ вә Исраил һимајә едирсә, онларын киминлә вурушдуғу суал дејил, әзизләр. Азәрбајҹан һакимијјәти һәмишә олдуғу кими АБШ вә Исраилин јанындадыр, әсҝәри гүввә илә әл тутур. Неҹә олур ки, шиә Азәрбајҹанда аксија кечирә билмир, вәһаби Суријада вурушур?! Бәшар Әсәди орталыға атмајын. Һамы билир ки, Әсәд марионетдир. Сөһбәт Сурија торпагларынын Ирана ја Фәләстинә јол олаҹағындан ҝедир. Бәшар һәр кимсә, Сурија Исраилә гаршыдыр. Бәшар ҝетсә, Сурија Ирана гаршы олаҹаг. Бу “ики вур ики”дир вә мүбаһисәјә јер галмыр. Беләҹә, дин әһлини дә Суријаја бағламаг орижанал ҝөрүнүр.
Өлмүш аталарын ҝөзү јолда
Оғул дүнјасыны дәјишмиш атаја нә јахшылыг едә биләр? Әҝәр кафирсә, етигадсызса һејкәл гојар, адына парк салар, сарај тикдирәр. Әҝәр иман әһлисә, мәсҹид тикдирәр, еһсан пајлајар, Аллаһын гулларына севҝи ҝөстәрәр ки, Аллаһ да онун атасына рәһм етсин.
Биздә өлмүш аталара да јанашма дәјишиб. Кими Ҹенифер Лопес, Риһанна вә Шакиранын үрјан әндамыны еһсан едир, кими дә халгын бәһ-бәһиндән өтрү “маидә” ачыр.
