Әһли Бејт -АБНА- хәбәр аҝентлијинин вердији хәбәрә әсасән Милли Мәҹлисин иҹласында “Өлкәдән ҝетмәк, өлкәјә ҝәлмәк вә паспортлар һаггында” гануна дәјишикликләр мүзакирә едилиб. Илк олараг лајиһә барәдә Һүгуг сијасәти вә дөвләт гуруҹулуғу Комитәсинин сәдри Әли Һүсејнли депутатлара мәлумат вериб.
Тәклиф олунан дәјишикликләрә әсасән, үмумвәтәндаш паспортларынын верилмәси мүддәти 1 ајдан 10 иш ҝүнүнә ендирилир. Вәтәндаш өлкәдән јеткинлик јашына чатмамыш ушаглары илә бирликдә ҝедәрсә, бу һалда онун үмумвәтәндаш паспортуна һәмин ушагларын јазылмасы вә фотошәкилләринин јапышдырылмасыны нәзәрдә тутан мүддәа ганундан чыхарылыр. Үмумвәтәндаш паспортлары 1 јашадәк, 1-3 јашадәк, 3-18 јашадәк вә 18 јашынадәк ушаглара вериләҹәк. Паспортларын 1 јашадәк ушаглар үчүн 1 иллик, 1-3 јашадәк ушаглар үчүн 3 иллик, 3-18 јашадәк 5 иллик, 18 јашына чатмыш шәхсләр үчүн исә 10 иллик мүддәтә верилмәси нәзәрдә тутулур. Хидмәти паспортун алынмасы вә дәјишдирилмәси үчүн дөвләт рүсуму алынмајаҹаг.
Паспорт алмаг истәјән вәтәндашын әл-бармаг изләринин ҝөтүрүлмәси вә фотошәкилинин чәкилмәси паспорту верән дөвләт органында һәјата кечирилир. Паспортун етибарлылыг мүддәти битдикдә, јахуд вәтәндашын ады, атасынын ады, сојады дәјишдикдә вә ја паспорт, онун електрон дашыјыҹысы јарарсыз һала дүшдүкдә, јахуд паспортун үзәриндәки вә ја електрон дашыјыҹысындакы мәлуматларын сәһв олдуғу мүәјјәнләшдирилдикдә, паспорт дәјишдирилмәлидир.
Паспортун үзәриндәки вә ја електрон дашыјыҹысындакы мәлуматларын сәһв олдуғу мүәјјәнләшдирилдикдә, һәмин паспорт тәгдим едилдији вахтдан бир ҝүн мүддәтиндә дөвләт рүсуму алынмадан дәјишдирилмәлидир.
Гануна дәјишикликләр 2013-ҹү ил ијунун 1-дәк верилән паспортлар етибарлылыг мүддәти битәнәдәк вә ја вәтәндашын сојады, ады, атасынын ады дәјишәнәдәк, јахуд паспорт итәнәдәк, јарарсыз һала дүшәнәдәк вә ја паспортун үзәриндәки мәлуматларын сәһв олдуғу мүәјјәнләшдириләнәдәк гүввәдә галыр. Дәјишикликләр лајиһәси сәсвермәјә гојулараг гәбул олунуб. О.М.
Диггәт: Хәбәрдән истифадә етдикдә мәнбәјә истинад лазымдыр
