Әһли Бејт -АБНА- хәбәр аҝентлијинин вердији хәбәрә әсасән АТӘТ-ин Минск групунун һәмсәдр өлкәләринин хариҹи сијасәт идарәләринин рәһбәрләри бирҝә бәјанатла чыхыш едибләр.
АПА-нын мәлуматына ҝөрә, дөвләт катиби Һиллари Клинтон (АБШ), хариҹи ишләр назирләри Серҝеј Лавров (Русија) вә Ален Жүпенин (Франса) имзаладығы бәјанатда дејилир: “АТӘТ-ин Минск групунун һәмсәдр өлкәләринин хариҹи ишләр назирләри динҹ вә давамлы низамланма әлдә олунмасы үчүн Дағлыг Гарабағ мүнагишәси тәрәфләрини сијаси ирадә нүмајиш етдирмәјә чағырыр. Јалныз данышыглар јолу илә низамланма сүлһә вә сабитлијә ҝәтирә биләр, мүнагишәнин һәлли үчүн истәнилән ҝүҹ тәтбиги ҹәһди реҝионда бөјүк фаҹиәләрә сәбәб олар.
Мүһарибәнин нәтиҹәләриндән даһа чох реҝион халглары әзијјәт чәкиб, низамланманын ләнҝимәси онларын чәтинликләрини даһа да артырыр. Реҝионун бөјүјән јени нәсли азәрбајҹанлыларла ермәниләрин әввәлләр неҹә бир јердә јашадығыны ҝөрмәјиб, бу исә бу сүни ајрылманы вә мүһарибәнин јараларыны даһа да дәринләшдирир. Бу сәбәбдән биз лидерләри өз өлкәләринин әһалисини мүһарибәјә дејил, сүлһә һазырламаға чағырырыг.
Биз өлкә лидерләрини чәрчивә сазиши үзәриндә иши мүмкүн гәдәр тез баша чатдырмаға, бунун ардынҹа исә Һелсинки Јекун Актында нәзәрдә тутулан ҝүҹ тәтбиг етмәмәк, әрази бүтөвлүјү, өз мүгәддәратыны тәјин етмә вә халгларын бәрабәрлији принсипләри, БМТ Низамнамәси, һабелә реҝионун һазыркы “статус-кво”дан даһа тәһлүкәсиз вә чичәкләнән ҝәләҹәјә чыхмасына имкан верән бејнәлхалг һүгугун норма вә принсипләри әсасында јекун һәлл гәрары вермәјә чағырырыг”.
Диггәт: Хәбәрдән истифадә етдикдә мәнбәјә истинад лазымдыр
