Әһли Бејт -АБНА- хәбәр аҝентлијинин вердији хәбәрә әсасән Иран Ислам Республикасынын Азәрбајҹан Республикасындакы сәфирлији бәјанатла чыхыш едиб.
Бәјанатда дејилир: “Иран Ислам Республикасы сон ҝүнләр Азәрбајҹан Республикасынын күтләви информасија васитәләриндә јајылан јалан вә һәгигәтдән узаг хәбәрләри нәзәрә алараг, Азәрбајҹан Республикасында иҹтимаи рәји ајдынлашдырмаг вә дүзҝүн истигамәтә јөнәлтмәк үчүн ашағыдакы мәгамлары билдирмәји зәрури һесаб едир.
1. Азәрбајҹан Республикасындакы террор актларында Иран Ислам Республикасынын әли олмасы барәдә бәзи информасија васитәләри тәрәфиндән бир чох хәбәрләр јајылыб. Бу ссенари сионист режими вә онларын һавадарларынын ҹасуслары тәрәфиндән Иранын нүвә алимләринин террор едилмәси фактынын өрт-басдыр едилмәси мәгсәдилә һәјата кечирилир. Азәрбајҹан Республикасынын шәрәфли халгы билир ки, сөзүҝедән хәбәрләр әслиндә Иран Ислам Республикасыны мәнфи симада ҝөтәрмәк вә бејнәлхалг сәвијјәли террор актларынын төрәдилмәси вә Фәләстин халгынын күтләви шәкилдә гәтлә јетирилмәси ишиндә ад газанмыш сионистләрә мәзлум дону ҝејдирмәк вә онлара хидмәт етмәјә јөнәлән сәјләрдир.
Өтән үч онилликдә, башда Америка вә сионизм олмагла дүнја һеҝемонлары илә мүбаризә апаран Иран Ислам Республикасы дәфәләрлә Америка вә Исраил тәрәфиндән төрәдилмиш террор актларынын гурбаны олуб. Тәәҹҹүб доғуран мәгам бундан ибарәтдир ки, Азәрбајҹан Республикасынын бәзи информасија васитәләри өзләри дә билмәдән көһнә ссенариләри ҝүндәмә ҝәтирмәклә, Иран Ислам Республикасынын нүвә алимләринин сионистләр тәрәфиндән террор едилмәси мәсәләсиндә иҹтимаи рәјин аздырылмасы, һеҝемон гүввәләрин гоншу өлкәјә гаршы (Иран Ислам Республикасы) мәнфи медиа мәгсәдләринин һәјата кечмәси истигамәтиндә аддым атмыш олурлар.
2. Азәрбајҹан Республикасынын бәзи информасија васитәләри хариҹи амилләрин вә өлкә дахилиндә онлара бағлы оланларын тәсири алтында Иран Ислам Республикасындан Азәрбајҹан Республикасына наркотик өтүрүлмәси барәдә ҝениш тәблиғат кампанијасы јаратмагла икитәрәфли мүнасибәтләрә хәләл вурмаға чалышыр. Бир һалда ки, наркотик маддәләрин гачагмалчылығы илә мүбаризәдә Иран Ислам Республикасынын мисилсиз рола малик олмасы вә бу јолда 20 мин шәһид вермәси һамыја бәллидир. Бирләшмиш Милләтләр Тәшкилатынын баш катиби вә бәзи аидијјәти рәсмиләри тәшкилатын хүсуси топлантысында вә диҝәр рәсми иҹласларында наркотик маддәләрин транзит вә гачагмалчылығы илә мүбаризә истигамәтиндә еффектли тәдбирләринә ҝөрә Иран Ислам Республикасына тәшәккүрләрини билдирибләр.
Азәрбајҹан Республикасынын информасија васитәләри јахшы оларды ки, наркотик маддәләрин јајылмасынын әсас көкләрини Әфганыстанын ишғалына јөнәлмиш мәгсәдләрдә, еләҹә дә мүсәлман өлкәси олан вә НАТО-нун учушлары маршруту истигамәтиндә јерләшән Әфганыстанда НАТО гүввәләри чәрчивәсиндә хашхаш әкинләрини горујанларын әмәлләриндә ахтарсынлар.
3. Иран Ислам Республикасынын сәфирлији Иранын Радио вә Телевизија Тәшкилатынын Азәрбајҹан Республикасындакы нүмајәндәлијинин јерли әмәкдашларынын һәбс едилмәсијлә әлагәдар тәәссүф вә нараһатлығыны билдирәрәк, бу аддымы һәр ики тәрәфин информасија вә медиа васитәләринин әмәкдашлығына манеә јарадылмасы, хүсусилә Президент Администрасијасынын иҹтимаи-сијаси мәсәләләр шөбәсинин мүдири ҹәнаб Әли Һәсәновун Теһрана сәфәри заманы әлдә олунан разылашмалара хәләл вурмаг истигамәтиндә атылан аддым кими гијмәтләндирир. Белә ки, инфомасија васитәләри вә медиа саһәсиндә әмәкдашлыг, еләҹә дә информасија васитәләри үзрә Мүштәрәк Комитәнин јарадылмасы барәдә разылашманын әлдә олунмасы истигамәтиндә ики өлкә тәрәфиндән атылан сон аддымлардан аз сонра Иранын Радио вә Телевизија Тәшкилатынын Бакы офисинин әмәкдашларынын һәбси мәсәләси башадүшүләндир вә ики өлкә арасындакы мүнасибәтләрин инкишаф етмәсини, еләҹә дә мөвҹуд олан анлашылмазлыгларын арадан галдырылмасыны истәмәјән даирәләрин фәалијјәтинин ҝүҹләнмәсиндән хәбәр верир.
Иран Ислам Республикасынын Азәрбајҹан Республикасындакы сәфирлијинин күтләви информасија васитәләриндән ҝәзләнтиси будур ки, онлар ики өлкә арасындакы мүнасибәтләрин әһәмијјәтини нәзәрә алараг, Иран Ислам Республикасынын мәнфи симада ҝөстәрилмәсинә јөнәлән аддымлардан чәкинмәклә, һәгигәтләрин сөјләнилмәси вә ики өлкә арасындакы мүнасибәтләрин инкишаф едәрәк ҝенишләнмәси истигамәтиндә аддым атсынлар”.
Диггәт: Хәбәрдән истифадә етдикдә мәнбәјә истинад лазымдыр
