Әввәли өтән сајларымызда
Шәхси ләјагәт олмадан јүксәк мәнсәбләрә чатмаг...
Бу адамлар дүнән Әли Инсанову, Акиф Мурадвердијеви шәр-бөһтанла иттиһам едәндә дә, бу ҝүн Рафиг Әлијевә гаршы гарајахма кампанијасы апаранда да бирҹә мәгсәд ҝүдүбләр. “Јухарыларын” истәјини јеринә јетирмәк. Онлар үчүн ән јүксәк дәјәр тутдуглары вәзифә, нифрәтә лајиг шөһрәт, әлләриндә ҹәмләдикләри сәрвәтдир. Анҹаг бу чирикинликләрин сонунун олдуғуну да билмәлидирләр.
Дөвләти неҹә чевирирләр?
Әли Инсановун мәһкәмәсини сәбирсизликлә ҝөзләјирдим ки, ҝөрүм, о, кимләрлә бу дөвләти чевирирмиш. Ахы, бу аналогу олмајан дөвләт јорған-дөшәк дејил ки, адам ону тәкбашына чевирә билсин. Мәлум олду ки, бу чеврилиш сөһбәти Ә.Инсанову вурмаг, әһалини инандырмаг үчүн бир шоу имиш. Мисир Мәрданов о мәһкәмәдән сонра сусду вә әдаләт наминә дејим ки, Рафиг Әлијевә гаршы гурулан шоуда да ҝөрүнмәди. Бәлкә доғрудан да 2005-ҹи илдә етдикләриндән хәҹаләт чәкир? Каш елә ола...
2005-ҹи илин чеврилиш шосундан сонра һәтта сечиҹиләрлә ҝөрүшүнү дә Акиф Мурадвердијеви јаманламаға һәср едән бир башгасы бу ҝүн тәкҹә рәһбәрлик етдији Университети базара чевирмәјиб. Онун Бакыда вә һәтта бәзи хариҹи өлкәләрдә ресторан-шадлыг евләринә, отел вә мағазалара саһиб олмасындан да данышырлар. Бунлары горумаг үчүн һәмин “зијалы” истәнилән ишә гол гојмаға һазырдыр.
Мүтәллибовдан Һејдәр Әлијевә гәдәр...ејни сәдагәт
Огтај Әсәдовла бу ҝүнә кими бир дәфә дә олсун үзбәүз ҝәлмәмишәм. Анҹаг 2003-2005-ҹи илләрдә ҝөстәрдији “хидмәтләр” һагда ешитмишәм. Рафиг Әлијевин мәсәләси Милли Мәҹлисдә сәсләнәндә ҝөстәрдији мүнасибәтә ҝөрә ону јада салырам. Шүбһәсиз ки, парламентин сәдри кими мүһүм вәзифәјә сечилмәјиб, “хидмәтләринә” ҝөрә тәјин едилән бир адам елә дә мүнасибәт нүмајиш етдирәҹәкди. Арзу едәк ки, о јүксәк вәзифә лајигли саһибләринә гисмәт олсун...
Бу “ҝөркәмли сималарын” арасында өз сәдагәтини ахыраҹан ҝөстәрән “академик” Әһлиман Әмирасланов олду. Ә.Әмирасланов өз пешәкарлығыны һәлә 1990-ҹы илдә ҝөстәрмишди. О, А.Мүтәллибову садиглијинә елә инандыра билди ки, Ҹәлилабад рајонундан Азәрбајҹан Али Советинә депутат мандаты илә мүкафатландырылды. Һәм дә Москвада јашаја-јашаја. Нәјин сајәсиндә Мүтәллибов она бу еһтимады ҝөстәрмишди? Һејдәр Әлијевин әлејһинә сөјләдији сөзләрә, Мүтәллибову дәстәкләјән зијалылара гошулдуғуна ҝөрә.
Ә.Әмирасланов Һ.Әлијев Кремл хәстәханасында ағыр хәстә јатанда онун јанына ҝетмәдијини гурурла данышырды. Мүтәллибовдан сонра, о, бирдән-бирә Әбүлфәз Елчибәјин тәрәфдары, азадлыг ашиги олду. Ә.Елчибәј ону Тибб Институтуна ректор тәјин етди. Ә.Елчибәј зорла вәзифәдән узаглашдырылдыгдан сонра Рәсул Гулијевин “досту” олду.
Тәәссүф ки, Ә.Инсанов Ә.Әмираслановун ректор вәзифәсиндә галмасы үчүн Һ.Әлијеви фикириндән дөндәрә билди. Бәлкә дә бу, Ә.Инсановун етдији ән бөјүк сәһвләрдән бири иди. Сонрасы һамыја бәллиди. Ә.Инсанова етдији хәјанәт сајәсиндә нәинки, вәзифәсиндә галды, һәтта Милли Мәҹлисин үзвү дә сечилди, бөјүк бизнес гурду...
Талејран депутатлар һаггында нә дејиб?
Бир дәфә Талејрана дејирләр ки, Франса депутатлары һаггында нә сөјләјирләр-сөјләсинләр, анҹаг, онларын арасында виҹданлылары да вар. Талејран ҹаваб верир: “Буна шүбһәм јохдур, онларын араларында еләләри вар ки, виҹданлары ашыб-дашыр. Һәтта ҹәнаб Дуфренин ики виҹданы вар”. Бәли, инди Азәрбајҹан парламентинин бир чох үзвләринин (онларын адларыны бир-бир сајмаг истәмирәм) ики виҹданы вар.
70-ҹи илләрдән галан зәрәрли мирас
Азәрбајҹан халгыны гаршы-гаршыја гојмаг индики һакимијјәтә 70-ҹи илләрдән галан зәрәрли мирасдыр. Бу үсулла индики һакимијјәтин идеологу (вә идеологлары) милләтимизин ҝенофонуну мәһв едиб.
Һөрмәтли халг јазычысы Әкрәм Әјлисли өз мүсаһибәсиндә дејир ки, Рафиг Әлијевә гаршы башланмыш кампанијанын Президент Админстрасијасында һазырландығына шүбһә етмир. Анҹаг өлкә президентинин баш верән чиркин тәблиғатдан хәбәри олуб-олмадығыны дејә билмәз. Әҝәр өлкә президентинин үмумреспублика мигјасында давам едән чиркин ојундан хәбәри јохдурса, бу даһа пис һалдыр.
Сонда бир даһа тәкрар етмәк истәрдим: тәлхәјин, мәддаһын, рүшвәтхорун, сахтакарын, ријакарларын вәтәнләри јохдур. Онлар анҹаг јаранмаг үчүн дүнјаја ҝәлибләр.
Гејд етдикләримдән јәгин, мәлум олур ки, Зијалылар Форумуну, онун иштиракчыларыны вә тәшәббүскарларыны, о ҹүмләдән дүнја шөһрәтли драматург вә кинорежисор, дәрин һөрмәт бәсләдијим Рүстәм Ибраһимбәјову дәстәкләјир, ҝөрүкләри ишләри алгышлајырам.
Һөрмәтли Ҹәмил мүәллимә исә Мирзә Фәтәли Ахундовун бир кәламыны хатырладырам: “Һүнәр вә шәхси ләјагәти олмадан јүксәк дәрәҹәләрә чатмаг һеч дә шәрафәт дејил, бәлкә рәзаләт вә һәгарәтдир”. Онун тәнгидләри мәһз, бу ҹүр адамлара үнванланыр вә шүбһәсиз, һәдәфә дәјир.
Әли Гарагојунлу
Диггәт: Хәбәрдән истифадә етдикдә мәнбәјә истинад лазымдыр
