Әһли Бејт -АБНА- хәбәр аҝентлијинин вердији хәбәрә әсасән Ислам Әмәкдашлыг Тәшкилатына үзв дөвләтләрин Парламент Иттифагынын () Индонезијанын Палембанг шәһәриндә кечирилән 7-ҹи сессијасы баша чатыб. Тәшкилат ИӘТ-ә үзв олан 51 өлкәнин парламентләрини өзүндә бирләшдирир вә мүвафиг олараг Африка, Асија вә Әрәб реҝионунда ики илдә бир дәфә өз сессијасыны кечирир.
Ислам Конфрансы Ҝәнҹләр Форумунун (ИКҜФ) Истанбулда јерләшән Баш Гәрарҝаһындан верилән мәлумата ҝөрә, сессијада “Азәрбајҹан Республикасына гаршы Ермәнистан Республикасынын тәҹавүзү” адлы әнәнәви олараг гәбул едилән гәтнамәјә ИКҜФ-нин тәшәббүсү илә хүсуси бир бәнд әлавә едилиб. Хоҹалы фаҹиәсинә һәср едилән параграфда гејд едилир: “Конфранс үзв-өлкәләрин парламентләрини 2012-ҹи илдән етибарән (фаҹиәнин 20 иллији) 26 феврал 1992-ҹи илдә Ермәнистан Силаһлы Гүввәләри тәрәфиндән динҹ азәрбајҹанлы әһалијә гаршы һәјата кечирилән вә сојгырымы характери дашыјан күтләви гырғыны мүвафиг шәкилдә танымаға чағырыр вә Хоҹалы гырғыныны төрәдәнләри мәсулијјәтә ҹәлб етмәји тәләб едир”.
Бу танынма 2009-ҹу илдән етибарән һәјата кечирилән вә ИКҜФ-нин Мәдәнијјәтләрарасы Диалог үзрә Баш Координатору Лејла Әлијева тәрәфиндән ирәли сүрүлән “Хоҹалыја әдаләт” кампанијасынын фәалијјәтинин нәтиҹәси олуб. ИӘТ ПИ-нын фаҹиәјә вердији гијмәт ИКҜФ вә бу гурум арасында әмәкдашлыг һаггында мүвафиг гәтнамәләрин тәләбләриндән ирәли ҝәлир. Белә ки, Азәрбајҹан Милли Мәҹлис нүмајәндә һејәтинин башчысы, милләт вәкили Ҝөвһәр Бахшәлијеванын тәклифи илә ИКҜФ-нин ирәли сүрдүјү әлавәләрдән сонра Конфранс јекун һесабатда гурумун Катиблијинә үзв-өлкәләрин парламентләринин “Хоҹалыја әдаләт” кампанијасына милли вә бејнәлхалг сәвијјәдә дәстәк ҝөстәрилмәсинә чағыран бу гәтнамәнин һәјата кечмәсини диггәт мәркәзиндә сахламағы тапшыран мүвафиг гәрар гәбул едиб.
Гәтнамәнин ваҹиблијини шәрһ едән ИКҜФ-нин баш катиби, сәфир Елшад Исҝәндәров билдириб ки, бејнәлхалг сәнәдләр арасында бу гәтнамә илк дәфә олараг Хоҹалы фаҹиәсинә сојгырымы акты сәвијјәсиндә сијаси-һүгуги гијмәт верир: “Нәзәрә алсаг ки, ИӘТ ПИ өз сыраларында дүнја парламентләринин дөрддә бирини ҹәмләшдирир вә дүнјанын ән бөјүк парламентләрарасы бејнәлхалг гурумларындандыр, сөзүҝедән термин Хоҹалы фаҹиәсинин ермәни милләтчиләри тәрәфиндән Азәрбајҹан халгына гаршы апарылан сојгырымы сијасәтинин тәркиб һиссәси кими бејнәлхалг сәвијјәдә танынмасы вә бу ҹинајәти төрәдәнләрин һүгуги мәсулијјәтә ҹәлб едилмәси үчүн кејфијјәтҹә јени мәрһәлә ачаҹаг”.
Диггәт: Хәбәрдән истифадә етдикдә мәнбәјә истинад лазымдыр
