Әһли Бејт -АБНА- хәбәр аҝентлијинин вердији хәбәрә әсасән “Моссад”ын кечмиш башчысы Меир Даган Јахын Шәргдәки вәзијјәтлә бағлы Ле Фиҝаро гәзетинә мараглы мүсаһибә вериб. О, 2002-2011 арасы Исраилин кәшфијјат органы “Моссад”ын сәдри олуб.
Даган гејд едиб ки, 1979-ҹу ил Иран Ислам ингилабы Јахын Шәргин әсас һадисәси олараг галмагдадыр. Бу ингилабын тәсирләри һәлә дә һисс олунур. “Ким Фарс көрфәзи вә әтрафына нәзарәт едирсә, дүнја нефт еһтијатларынын 60%-ә нәзарәт едир. Бәлкә даһа чох. Әҝәр бура Иранын сијаси мараг даирәсинә дахил олан Орта Асија өлкәләрини дахил етсәк. Иран нүвә силаһы әлдә едәрсә, режим өмүрлүк сығорталанаҹаг. Бу исә Ирана бүтүн реҝион вә онун нефт еһтијатлары үзәриндә нәзарәтини ҝүҹләндирмәјә имкан верәҹәк.”
О, гејд едиб ки, баш-назир Нетанјаһу вә Мүдафиә назири Еһуд Баракын мөвгеји илә гәтијјән разы дејил. Онлар проблеми бүтүн дүнјаја аидијјаты олан Иран-Исраил гаршыдурмасы кими тәгдим едирләр. Ҝерчәкликдә исә Исраил илә гаршыдурма иранлылар үчүн икинҹи дәрәҹәли мәсәләдир вә проблемин “Исраил үчүн Иран тәһлүкәси” кими тәгдим едилмәси сәһв мөвгедир.
Даган етираф едиб ки, Иран атом бомбасы һазырлајыр, анҹаг бомбанын һазырланмасында сон мәрһәләни кечмәјә гәрар верә билмир. Дүнја бирлијинин әсас вәзифәси Ираны бу мәгсәддән ҝери чәкмәкдир. Бунун үчүн “гамчы вә гоғал” сијасәтиндән истифадә етмәк лазымдыр. “Анҹаг бунун Иранын гаршысыны алаҹағыны дүшүнмәк иллузија оларды. Тәтбиг едиләҹәк санксијаларла јанашы, һәрби әмәлијјатларын кечирилмәси планы да вар. Һәрби васитәјә әл атмаздан әввәл, мүмкүн олан бүтүн васитәләр истифадә едилмәлидир. Әҝәр Исраил тәкбашына һәрби әмәлијјатлара башласа, бунун нәтиҹәләри дәһшәтли олаҹаг.”
Иранын чохлу нүвә објектләри вар. Бу објектләри бир һәрби зәрбә илә мәһв етмәк мүмкүн дејил. Бунун үчүн ҝениш мигјаслы мүһарибә башламаг лазымдыр. “Моссад” башчысы билдириб ки, нүвә силаһы олан Иранла бирҝә јашамаг мүмкүн олмајаҹаг. Иран атом бомбасы әлдә едәрсә, Мисир вә Сәудијјә Әрәбистан ону нүмунә ҝөтүрәҹәк вә Јахын Шәргдә “нүвә јарышы” башлајаҹаг.
Онун сөзләринә ҝөрә иранлылар чох ағыллы вә методик һәрәкәт едән инсанлардыр. Онлар провакатив бәјанатлар верирләр, лакин баҹардыгҹа еһтијатла һәрәкәт едирләр. “Онлар дејир вә ҝөзләјирләр ки, дүнја неҹә реаксија верәҹәк. Һансыса мәнада мән онларын маневр габилијјәтинә һејранам.” –дејә Даган билдириб.
Диггәт: Хәбәрдән истифадә етдикдә мәнбәјә истинад лазымдыр
