Әһли Бејт -АБНА- хәбәр аҝентлијинин вердији хәбәрә әсасән: Тәбризин «Ајәтуллаһ Талигани» мәсҹидиндә «Хомејничиләр Азәрбајҹан Республикасында» адлы тәдбир кечирилиб.
Тәбриз шәһәринин дини мүәссисәләриндә Иранын руһани рәһбәрлијинин тәлиматларына ујғун олараг, Азәрбајҹан һакимијјәти әлејһинә тәдбирләр давам етдирилир. Иран КИВ-ләринин мәлуматына ҝөрә, Шәрги Азәрбајҹан Ислам Ингилабы Мәдәни Тәдгигатлар Ҹәбһәсинин тәшкилатчылығы илә “Азәрбајҹан Республикасында исламчылыгла танышлыг” мөвзусунда силсилә јығынҹаглара старт верилиб.
“Хомејничиләр Азәрбајҹан Республикасында” адлы биринҹи белә тәдбир Тәбризин “Ајәтуллаһ Талигани” мәсҹидиндә кечирилиб. Јығынҹагда експерт Меһди Нәлбәнди Азәрбајҹан тарихиндә Ислам вә шиәлијин ролу мөвзусунда чыхыш едәрәк, Азәрбајҹанда шиәлијин ҝүҹлү олмасында Ислам ингилабынын вә Иранын кечмиш дини лидери Ајәтуллаһ Хомејнинин ролуна диггәти јөнәлдиб.
Јығынҹагда әсас чыхышчы “Аран” Бејнәлхалг Мәдәнијјәт вә Тәдгигат Институтунун директору, “Аран” журналынын редактору Һәсән Гулу нитгиндә Азәрбајҹанын дөвләт гурулушуну вә мүстәгиллији тәһдид едән фикирләр сөјләјиб. Азәрбајҹаны АБШ вә Исраиллә әмәкдашлыгда, вәһһабилији вә сионизми инкишаф етдирмәкдә иттиһам едән Һ.Гулу Азәрбајҹанда анти-Ислам вә анти-Иран тәблиғатынын сүрәтләндијини дә нараһатлыг кими гәләмә вериб: "Ислами ојаныш Азәрбајҹанда нә вахт башлајаҹаг? Азәрбајҹан Республикасы өлкәмизә ән јахын Ислам өлкәси олдуғу һалда бу ојанышдан нијә бәһрәләнә билмәјиб? Бу кими чохлу суалларын һәллини тапмамасына сәбәб Азәрбајҹанда ҹамаат вә иҹтимаи-сијаси фәалларын арасында лазымынҹа тәблиғатын апарылмамасыдыр. Азәрбајҹанын Ирандан ајрылдығы ики әср бојунҹа бу өлкәдә анти-Иран вә анти-Ислам кими ики програм јарадылараг, һәјата кечирилиб. Совет Иттифагы заманы Азәрбајҹанда ҹоғрафи јерләрин адлары дәјишдирилиб, Гуран әлифбасы рус вә латын әлифбасы илә әвәзләниб, дил деформасијаја уғрадылыб, анти-Иран вә анти-Ислам мәзмунлу филмләр чәкилиб, Ислам вә Ираны тәһгир едән шеирләр јазылыб, тарих сахталашдырылыб, коммунистләрин дөврүндә исә алим вә диндарлар өлдүрүлүб, һәмчинин Гуран охумаға гадағалар гојулуб. Азәрбајҹанын мүстәгиллик дөврүндә дә јенә бу ики програм давам едир вә бунун бәзи нүмунәләрини Азәрбајҹанын Иран әлејһинә олан медиасынын тәһлилләриндә ҝөрмәк олар”.
Һ.Гулу бу халгын мәдәнијјәтинин һәлә дә Иран мәдәнијјәтиндән там ајрылмадығыны да гејд едиб. О, Азәрбајҹан Ислам Партијасынын рәһбәрләринин һәбсинә дә етираз едиб вә тәклиф едиб ки, Иран әһалиси, о ҹүмләдән тәбризлиләр азәрбајҹанлы исламчылара мәнәви дәстәк вермәлидирләр(АПА).
Диггәт: Хәбәрдән истифадә етдикдә мәнбәјә истинад лазымдыр
