Әһли Бејт -АБНА- хәбәр аҝентлијинин вердији хәбәрә әсасән: Һаҹы Илгар зијалылары һәбсдә олан исламчылары мүдафиә етмәјә чағырыб.
Азәрбајҹан Ислам Партијасынын һәбсдә олан лидери Доктор Мөвсүм Сәмәдовун вә башгаларынын мәһкәмәси баша чатмаг үзрәдир. Дөвләт иттиһамчысы Мөвсүм Сәмәдова вә даһа үч нәфәрә 12 ил, ики тәгсирләндириләнә 11 ил мүддәтинә азадлыгдан мәһруметмә ҹәзасы, бир нәфәрә исә 5 ил сынаг мүддәти тәтбиг олунмагла 11 ил шәрти иш верилмәсини истәјиб.
Зијалыларын Иҹтимаи Форумуна мүраҹиәтиндә Һаҹы Илгар Ибраһимоғлу јазыр: “Иттиһам тәрәфинин тәгсирләндирилән шәхсләрә чох ағыр ҹәза истәмәси мәһкәмәнин тәгрибән һансы гәрар чыхараҹағыны бәлли едир. Һалбуки мәһкәмәнин ҝедишиндә тәгсирләндирилән шәхсләрин ҝүнаһыны сүбут едән дәлил вә сүбутлар тәгдим едилмәди. Белә олан шәраитдә тәгсирләндирилән шәхсләрин чыхышларына ҝөрә тәгиб олунмасы иҹтимаијјәтә бир даһа бәлли олур.
Буну нәзәрә алараг өлкәмизин имиҹинә нөвбәти дәфә хәләл ҝәтирән, инсан һагларынын позулмасы мәнасыны дашыјан мәһкәмә гәрарынын гәбул едилмәмәси, тәгсирләндирилән шәхсләрә бәраәт верилмәси үчүн имканыныз дахилиндә бүтүн сәјләри ҝөстәрмәк үчүн сизләрә мүраҹиәт едирик. Ҝөзләнилән сәрт гәрарын гәбулу инсан һагларыны позан, әдаләтли мүһакимә барәдә конститусион нормалара зидд олан бир һал олмагла бәрабәр һүгуги дөвләт анлајышына әсасланан дуруму даһа да узаглашдыраҹаг, ејни заманда иҹтимаи ҝәрҝинлијә сәбәб олан овгатлар јарадаҹаг. Бунлары нәзәрә алараг мәсәләнин мүсбәт һәллинә өз төһфәнизи вермәк үчүн сизә мүраҹиәт едирик".
Сентјабрын 29-да Зијалыларын Иҹтимаи Форуму Бакыда “Ҹәмијјәт вә әхлаг” адлы мүзакирә кечириб. Мүзакирәнин сонунда бәјан едилиб ки, һакимијјәтә мүраҹиәтләр үнванланаҹаг вә мүраҹиәтләрин бириндә мәһбус иҹтимаи-сијаси фәалларын һәбсдән бурахылмасы хаһиши јер алаҹаг.
Диггәт: Хәбәрдән истифадә етдикдә мәнбәјә истинад лазымдыр
