Әһли Бејт -АБНА- хәбәр аҝентлијинин вердији хәбәрә әсасән: Һәбсдә олан ҝәнҹ фәал Бәхтијар Һаҹыјевин зоракылыға мәруз галмасы илә бағлы Республика Прокурорлуғунун апардығы арашдырманын нәтиҹәсиндән Сәбаил Рајон Мәһкәмәсиндә верилән шикајәтә бахылмасы ијулун 15-дәк тәхирә салыныб. Мәлуматы “Медиа форум” сајтына вәкил Елчин Намазов вериб.
Вәкилин сөзләринә ҝөрә, мәһкәмә иҹласынын тәхирә салынмасына Республика Прокурорлуғунун нүмајәндәсинин иҹласа ҝәлмәмәси сәбәб олуб.
Елчин Намазов гејд едиб ки, Бәхтијар Һаҹыјев мәһкәмә иҹласларында өзүнүн иштирак етмәси үчүн Сәбаил мәһкәмәсинә мүраҹиәт етсә дә, онун истәји нәзәрә алынмајыб.
Бунунла јанашы просесә сәдрлик едән һаким Фамил Нәсибов вәкилә дејиб ки, мәһкәмә арашдырмасы заманы Бәхтијар Һаҹыјевә физики тәзјиг ҝөстәрмәкдә ҝүнаһландырылан шәхсләрин һеч бири диндирилмәјәҹәк: “Һаким деди ки, мәһкәмә иҹласында тәкҹә Республика Прокурорлуғунун нүмајәндәси олаҹаг вә әлавә һеч ким диндирилмәјәҹәк. Мән, тәбии ки, етираз едиб билдирдим ки, Һаҹыјеви дөјән шәхсләри диндирилмәсә, буну мәһкәмә арашдырмасы сајмаг мүмкүн дејил. Мән ијулун 15-дә мәһкәмә иҹласында Бәхтијар Һаҹыјеви дөјән шәхсләрин, онун полис идарәсиндә вә сахланма тәҹридханасында зоракылыға мәруз галмадығы барәдә дүзҝүн олмајан акт тәртиб едән шәхсләрин вә нәһајәт, Бәхтијар Һаҹыјевин өзүнүн мәһкәмә иҹласына ҝәтирилмәси үчүн вәсатәт верәҹәм. Вәсатәт тәмин олунмаса, просеси тәрк едәҹәм, формал кечирилән мәһкәмәдә мәним иштиракым артыгдыр”.
АБШ-ын Һарвард Университетинин мәзуну олан Бәхтијар Һаҹыјев мартын 4-дән һәбс олунуб. Мајын 18-дә о, Ҝәнҹәнин Низами Рајон Мәһкәмәсинин һөкмү илә 2 ил мүддәтинә азадлыгдан мәһрум едилиб. Ҝәнҹ фәал Ҹинајәт Мәҹәлләсинин 321.1-ҹи (гануни әсас олмадан һәрби хидмәтдән јајынмаг үчүн нөвбәти һәрби чағырышдан вә ја сәфәрбәрлик үзрә чағырышдан бојун гачырма) маддәси илә тәгсирли билиниб.
Март ајында Республика Прокурорлуғунун Истинтага Нәзарәт Идарәсиндән Ҝәнҹәдәки 2 сајлы тәҹридханаја Бәхтијар Һаҹыјевин шикајәти үзрә онун полис идарәсиндә вә сахланма тәҹридханасында зоракылыға мәруз галыб-галмадығыны арашдырмаг үчүн нүмајәндәләр ҝөндәрилиб. Мартын 28-дә прокурорлуг Бәхтијар Һаҹыјевин дөјүлмәсини тәсдигләмәјәрәк ҹинајәт иши башланмасы илә бағлы мүраҹиәти рәдд едиб. Бундан сонра Бәхтијар Һаҹыјев Республика Прокурорлуғунун апардығы арашдырманын нәтиҹәсиндән Сәбаил Рајон Мәһкәмәсинә шикајәт вериб.
Диггәт: Хәбәрдән истифадә етдикдә мәнбәјә истинад лазымдыр
