Әһли Бејт -АБНА- хәбәр аҝентлијинин вердији хәбәрә әсасән: Ијулун 11-дә Түркијәнин хариҹи ишләр назири Әһмәд Давудоғлу илә ҝөрүшән Иран Ислам Республикасынын президенти Маһмуд Әһмәдинежад АБШ вә Гәрбә гаршы сәрт бәјанатлар сәсләндириб.
Әһмәдинежад дејиб ки, Америка өзүнүн әсас мүттәфиги олан сионист режимини гуртармаг үчүн бөлҝәдә сүнни-шиә, әләви вә гејри-әләви, еләҹә дә түрк-күрд ихтилафы салмаға чалышыр: “Һазырда бүтүн сәјләр бу сахта режимин (Исраил нәзәрдә тутулур) мәһдудлашдырылмасына јөнәлмәлидир. Чүнки бу режимин һәдәфләри истигамәтиндә һәјата кечирилән һәр һансы бир тәшәббүс интиһар анламындадыр. Иран Ислам Республикасы һесаб едир ки, бу ҝүн бөлҝәдәки бүтүн һөкумәтләр ислаһатлара ҝедиб өз халгларынын тәләбләрини јеринә јетирмәклә өлкәләрини идарә едә биләрләр.
Әҝәр әҹнәбиләр бөлҝә өлкәләринә ајаг ачса вә бу өлкәләрин дахили ишләринә гарышсалар, шүбһәсиз ки, бундан мәнтәгәнин бүтүн өлкәләри зијан ҝөрәҹәк. Биз һесаб едирик ки, бөлҝә өлкәләри АБШ-ын сионист режими гуртармаг планындакы ојунуна ҝирмәмәлидир. Иранла Түркијә бирликдә һәр ики халгын, еләҹә дә бөлҝә халгларынын мәнафеји уғрунда бөјүк ишләр ҝөрә биләр. Дүшмәнләр Иранла Түркијә арасындакы јахын мүнасибәтләрдән нараһатдыр. Онлар бу мүнасибәтләри бөлҝә халгларынын мәнафејинин хејринә, өз марагларына зидд һесаб едирләр. Дүшмәнләр бөлҝә халгларынын, еләҹә дә Иранла Түркијәнин инкишафындан нараһатдырлар”.
Ҝөрүшдә бөлҝә проблемләринин һәлли истигамәтиндә Иранла Түркијәнин бөјүк потенсиала малик олдуғуну вурғулајан Әһмәд Давудоғлу Ираны Суријанын дахили ишләринә гарышмамаға чағырыб: “Бу ҝүн ислам дүнјасы мүәјјән бөһран ичиндәдир. Бу бөһрандан чыхмаг лазымдыр. Бөһранлы шәраитдән чыхмаг мәсәләсиндә исә Иранла Түркијә бөјүк мәсулијјәт дашыјырлар”.
Диггәт: Хәбәрдән истифадә етдикдә мәнбәјә истинад лазымдыр
