Әһли Бејт -АБНА- хәбәр аҝентлијинин вердији хәбәрә әсасән: Азәрбајҹанын тарихиндә бир чох наилијјәтләрин сахтакарлыгла Һејдәр Әлијевин ады илә бағланмасы артыг адиләшиб. ЈАП һакимијјәти, һәтта Әлијевин һакимијјәтә ҝәлишиндән әввәл баш верәнләри дә онун адына јазыр. АХҸ һакимијјәти дөврүндә, һәтта ондан әввәл атылан аддымлар, мәсәлән, илк дәфә Азәрбајҹанын үчрәнҝли бајрағынын далғаланмасы да “улу өндәрин” һесабына јазылыб. Ширван шәһәриндә асылан бир плакат исә бүтүн әндазәләри ашыр.
Бу дәфә Һејдәр Әлијев Демократик Азәрбајҹан Республикасынын баниси кими тәгдим олунуб. Рәсми сәнәдләрә ҝөрә, 1923-ҹү илдә анадан олан Һејдәр Әлијевин неҹә 1918-ҹи илдә гурулан АДР-нин баниси олдуғу исә изаһ едилмир. Тарихи сахталашдырмаға адәт едән ЈАП һакимијјәти вә онун јерләрдәки әлалтылары артыг һәр кәсә бәлли олан фактлары да һәјасызҹасына тәһриф етмәкдән чәкинмир. АДР-нин Әлијевин ады илә бағланмасыны иҹтимаијјәт нүмајәндәләри дә наразылыгла гаршылајыр.
Јазычы-публисист, Иҹтимаи Палатанын үзвү Меһрибан Вәзир буну иронија адландырды: “Јерли иҹра структурлары өзләринин јерини исти етмәк үчүн белә шејләр јазырлар. Нәтиҹәдә бу, бир иронија олур. Рәсулзадә өз силаһдашлары илә бирҝә һүрријјәтимизи гурду. Милли Азадлыг Һәрәкаты исә Рәсулзадәнин тәбиринҹә десәк, Азәрбајҹан түркләринин үрәјинә јеридилмиш бајрағы јаныг үрәкләрдән јенидән зирвәләрә галдырды”.
М.Вәзирин сөзләринә ҝөрә, 1993-ҹү илдә Һејдәр Әлијев һакимијјәтә ҝәләндән, демократик истигаматә әкс аддымлар атылмаға башланды. Бүтүн бунлар бејнәлхалг сәнәдләрдә өз әксини тапыб. Она ҝөрә дә уғур вә наилијјәтләрин Әлијевин ады илә бағланмасы јалныз иронијадыр.
АХҸП сәдринин мүавини Нурәддин Мәммәдлинин фикринҹә, бу, артыг бүтүн әндазәләри, нормалары, чәрчивәләри ашмаг ҹәһдидир. Бу аддымы атанлар мәсулијјәтсизликлә јанашы ҝүнаһа да јол вериб: “АДР-нин тарихини һәр бир вәтәндаш, еләҹә дә бејнәлхалг аләмдә јахшы билирләр. Демократик ҹүмһуријјәтин идеоложи рәһбәри дә, ејни заманда Азәрбајҹана демократик аб-һаваны јашадан инсанларын кимлији дә јахшы мәлумдур. Бу ҹүр ҹәһдләрдә јалныз хошаҝәлмәз нијјәт ола биләр”.
Диггәт: Хәбәрдән истифадә етдикдә мәнбәјә истинад лазымдыр
