Әһли Бејт -АБНА- хәбәр аҝентлијинин вердији хәбәрә әсасән: Һејдәр Әлијевин әмиси нәвәси “Азадлыг”а мүраҹиәт етмишдир.
“Мән мәрһум президентимиз Һејдәр Әлирза оғлу Әлијевин доғма әмиси Гәмзәли Әлијевин нәвәсијәм”. Бу сөзләри “Азадлыг”а Бакы сакини, фәһләликлә аиләсини доландыран Сәттар Әлијев дејиб. Онун сөзләринә ҝөрә, бабасы Гәмзәли Әлијевлә Һејдәр Әлијевин атасы Әлирза Әлијев доғма гардаш олуб. Онлар 1915-ҹи иләдәк Ирәван губернијасынын Гаракилсә (Сисјан) рајонунда јашајыб: “Бабам Гәмзәли Әлијевин 3 оғлу олуб: Гәзәнфәр, Хејбәр вә Сүфеј. 1915-ҹи илдә бабам Гәмзәли Әлијев ханымы илә бирҝә ермәниләр тәрәфиндән гәтлә јетирилиб. Оғланлары исә һәмкәндлиләринин көмәклији илә Ханкәндиндә сығынаҹаг тапыб. Бабамын гардашы Әлирза Әлијев һәмин ил Нахчывана көчүб. О, елә зәнн едиб ки, бабамла бирҝә оғланлары да ермәниләр тәрәфиндән өлдүрүлүб”.
Сәттар Әлијев дејир ки, о вахтдан Әлирза Әлијевин аиләсилә әлагә кәсилиб. 1969-ҹу илдә исә Һејдәр Әлијевин бөјүк гардашы Һәсән Әлијев Ханкәндинә ҝәләндә Сәттар Әлијевин атасы Хејбәр Әлијев әмиси оғлуну таныјыб: “Һәсән Әлијев һансыса тәдбирә ҝәлибмиш. Атам ону таныјыб вә ону јанына чағырыб. Һәсән Әлијев дә атама јахынлашанда әмиси оғлуну таныјыб. Һәсән Әлијев атама дејиб ки, 55 илдән сонра олса да, әмиси оғлуну тапдығына ҝөрә чох севинир. О, атамҝилин өлдүрүлдүјүнү зәнн едибмиш. Һәсән Әлијев атама Бакыја көчмәји тәклиф едиб. Лакин атам разылыг вермәјиб. Дејиб ки, артыг јашлашмышам, бурада да ев-ешик гурмушам”.
Һәсән Әлијевин өлүмүндән сонра јенә дә гоһумларын әлагәси кәсилиб: “Ачығы мән билмирәм ки, Һәсән Әлијев бизм һаггымызда өз аиләсинә, гардашларына данышмышды ја, јох. Амма о, өләндән сонра әлагә кәсилди. Сонрадан Дағлыг Гарабағ мүнагишәси башлајанда биз икинҹи дәфә гачгын һәјаты јашамаға мәҹбур олдуг. Ханкәндиндән Бакыја ҝәлдик. О вахта гәдәр биз Һејдәр Әлијев, онун гардашлары илә әлагә сахлаја билмәмишдик. Һејдәр Әлијев икинҹи дәфә һакимијјәтә ҝәләндән сонра исә мән мүраҹиәтләр јазмаға башладым”.
Сәттар Әлијевин сөзләринә ҝөрә, о, Һејдәр Әлијевин һакимијјәти дөврүндә бир нечә дәфә Президент Администрасијасына мәктуб јазыб, екс-дөвләт башчысынын әмиси нәвәси олдуғуну билдириб: “Лакин мәним мәктубларыма һеч бир ҹаваб ҝәлмәди. Бир нечә дәфә дә Илһам Әлијевин дөврүндә мәктуб јазмышам. Амма јенә дә мәктубларым ҹавабсыз галыб. Мән һеч нә истәмирәм, садәҹә гоһумлуг әлагәләрини бәрпа етмәк истәјирәм”.
Сәттар Әлијев бир мараглы факты да диггәтимизә чатдырыб: “Оғлум һәрби хидмәтдән гајытдыгдан сонра ишсиз иди. Полис органларына ишә дүзәлмәк истәјирди. Мән дахили ишләр назири Рамил Усубова мүраҹиәт етдим. Мүраҹиәтдә дә назирин диггәтинә чатдырдым ки, Һејдәр Әлијевин әмиси нәвәсијәм. Бу мәктубдан сонра оғлум полисә ишә ҝөтүрүлдү”.
Һејдәр Әлијевин әмиси нәвәси олмасы барәдә Президент Администрасијасына, о ҹүмләдән диҝәр дөвләт гурумларына үнванладығы мәктубларын гоһумларына чатдырылмадығындан әмин олан Сәттар Әлијев мәсәләни дә елә бу бахымдан иҹтимаиләшдирмәк гәрарына ҝәлдијини сөјләјиб: “Әминәм ки, мәктубларым нә Һејдәр Әлијевә, нә дә Илһам Әлијевә чатдырылыб. Әкс тәгдирдә онлар бизим аилә илә марагланардылар. Она ҝөрә дә гәрара алдым ки, бу дәфә гәзет васитәсилә мүраҹиәт едим. Мәним дедикләримдә јалан јохдур, ҝедиб архиви арашдыра биләрләр. Сәнәдләр вар, тарих вар”.
Сәттар Әлијев сонда бир даһа вурғулајыб ки, онун мәгсәди гоһумлуг әлагәләрини бәрпа етмәкдир. О, Илһам Әлијевин бу мәсәлә илә марагланаҹағы үмидилә ев үнваныны вә телефон нөмрәләрини дә “Азадлыг” гәзетинә тәгдим едиб. Лакин һансыса сәбәбдән шәклинин дәрҹинә разылыг вермәди.
Диггәт: Хәбәрдән истифадә етдикдә мәнбәјә истинад лазымдыр
