Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Дөвләт Миграсија Хидмәти билдириб: “Азәрбајҹан вәтәндашлығыны алмаг үчүн бу истәкдә олан шәхсин 5 ил даими гајдада гануни әсасларла Азәрбајҹанда јашамасы ваҹибдир”.
"Бу дөврдә һәмин шәхсин гануни ҝәлир мәнбәји олмалы, о, өлкә конститусијасынын тәләбләринә әмәл едәҹәјинә даир өһдәлик ҝөтүрмәли, Азәрбајҹанын дөвләт дилини билдикләринә даир сәнәд тәгдим етмәлидир".
Азәрбајҹан вәтәндашлығы алмаг истәјән шәхс Дөвләт Миграсија Хидмәтинә мүраҹиәтлә јанашы, Азәрбајҹан Президентинин адына анкет-әризә јазмалыдыр. Азәрбајҹан Президентинә үнванланмыш анкетә әризә (сәбәб ҝөстәрилмәклә), тәрҹүмеји-һал, шәхсијјәти тәсдиг едән сәнәдин нотариал гајдада тәсдигләнмиш сурәти, Азәрбајҹанда даими јашајыш јерини тәсдигләјән гејдијјат сәнәдинин сурәти, һәмин шәхсин сон 5 илдә Азәрбајҹанда јашадығыны тәсдигләјән јашајыш јериндән арајыш вә саир әлавә едилмәлидир.
Вәтәндашлыг алмаг истәјән шәхсин аилә вәзијјәти һагда арајыш, Тәһсил Назирлијиндән дөвләт дилини билдијинә даир арашјыш, 4 әдәд фотошәкил (3х4 өлчүлү), гануни ҝәлир мәнбәјинин олдуғуну тәсдигләјән сәнәди (иш јериндән арајыш, пенсија вә ја сосиал јардым алындығына даир арајыш, алимент алындығына даир арајыш, өһдәлијиндә олан инсанларын ҝәлирләри һагда арајыш, варислик шәһадәтнамәси, ганунла гадаған олунмајан фәалијјәтдән әлдә едилән ҝәлир һагда сәнәд) дә тәгдим етмәлидир.
Бунунла јанашы, 110 манат дөвләт рүсуму өдәнилмәлидир.
Диггәт: Хәбәрдән истифадә етдикдә мәнбәјә истинад лазымдыр
