Әһли Бејт -АБНА- хәбәр аҝентлијинин вердији хәбәрә әсасән: 12 ијун јерли вахтла саат 07:00-да Түркијәдә парламент сечкиләри башлајыб.
Мәлумата ҝөрә, парламент сечкиләриндә 15 сијаси партија иштирак едир. Онлардан 7,5 мин намизәд, 203 нәфәр исә мүстәгил намизәд кими ирәли сүрүлүб.
Бирпалаталы Түркијә парламентинә үмумиликдә 550 нәфәр сечиләҹәк. Бу сечкиләрдә башлыҹа рәгибләр Баш назир Рәҹәб Тајјиб Әрдоғанын лидери олдуғу һаким Әдаләт вә Инкишаф Партијасы, мүхалиф Ҹүмһуријјәт Халг Партијасы вә Миллијјәтчи Һәрәкат Партијасы олаҹаг.
Әрдоғанын партијасы 2002-ҹи илин нојабрындан өлкәдә һакимијјәтдәдир. 2007-ҹи ијунунда кечирилән сонунҹу парламент сечкиләриндә о, сечиҹиләрин тәхминән 47 фаизинин сәсини топлајыб вә тәкпартијалы һөкумәти формалашдырыб. Сечкиләрдә үмумиликдә 50 милјон Түркијә вәтәндашы иштирак едир.
Түркијәдә кечириләҹәк парламент сечкиләрини АТӘТ вә Авропа Шурасынын нүмајәндә һејәтләри дә мүшаһидә едиб.
Түркијәнин Шәргиндәки 32 әјаләтдә парламент сечкиләринә сәс вермә баша чатыб. Бу һагда Түркијәнин "Һаберактуел" гәзети мәлумат вериб.
Сәсвермәнин баша чатдығы Адыјаман, Ағры, Артвин, Бинҝөл, Битлис, Дијарбакыр, Елазығ, Ерзинҹан, Ерзурум, Ҝазиантеп, Ҝиресун, Ҝүмүшһане, Һаккари, Карс, Малатја, Каһраманмараш, Мардин, Муш, Орду, Ризе, Сиирт, Сивас, Трабзон, Тунҹели, Шанлыурфа, Ван, Бајбурт, Батман, Шырнак, Ардаһан, Ығдыр ве Килис шәһәрләриндә сәсвермәнин нәтиҹәләри һесабланмаға башланылыб.
Түркијәнин Баш Назири Рәҹәп Тајјип Әрдоған, Түркијә президенти Абдуллаһ Ҝүл вә ханымы Хејрунниса Ҝүл бу ҝүн парламент сечкиләриндә сәс вериб. Бу һагда Түркијәнин ҸНН Түрк телеканалы мәлумат вериб.
Түркијә КИВ-нин мәлуматларына ҝөрә, Түркијәдә мүхалифәтдә олан Ҹүмһуријјәт Халг Партијасынын (ҸҺП) лидери Камал Кылычдароғлу да бу ҝүн парламент сечкиләриндә сәс вермишдир.
Диггәт: Хәбәрдән истифадә етдикдә мәнбәјә истинад лазымдыр
