Әһли Бејт -АБНА- хәбәр аҝентлијинин вердији хәбәрә әсасән: АНС-ПРЕСС билдирир ки, өтән ҝеҹә Гарадағ рајону әразисиндә өлүмлә нәтиҹәләнән јол нәглијјат гәзасы баш вериб. Бакы-Газах јолунун 50-ҹи километрлијиндә мејдана ҝәлән гәзада 2 нәфәр өлүб, 2 нәфәр исә јараланыб. Мәлумата ҝөрә, Күрдәмир рајон сакини, 51 јашлы Әлијев Телман Шакәр оғлунун идарә етдији “Газел” маркалы јүк машыны гаршыда һәрәкәт едән “Газ-53” маркалы башга бир јүк машынына чырпылыб. Гәза нәтиҹәсиндә “Газел”дә олан ики нәфәр Күрдәмир рајон сакинләри - 30 јашлы Һүсејнов Хәтаи Таһир оғлу вә 26 јашлы Исламов Ајаз Огтај оғлу алдыглары ағыр хәсарәтләрдән елә һадисә јериндә дүнјаларыны дәјишиб.
Сүрүҹү Телман Әлијев вә һәмчинин гәзанын диҝәр иштиракчысы олан “Газ-53”-ү идарә едән 51 јашлы Новрузов Расим Әләсҝәр оғлу мүхтәлиф дәрәҹәли бәдән хәсарәтләри илә 1 сајлы хәстәханаја јерләшдирилибләр. Онлардан Телман Әлијевин вәзијјәти даһа ағыр һесаб олунур. Бунунла белә, хәстәхананын һәкимләри һәр ики јаралыја мүвафиг тибби јардым ҝөстәрибләр.
Гәзанын тәфәррүатларыны Баш дөвләт јол полис идарәси истинтаг вә тәһгигат шөбәсинин әмәкдашлары арашдырыр. Иши арашдыран мүстәнтиг Вагиф Нәҹәфовун билдирдијинә ҝөрә, “Газел”дә олан үч нәфәр бир-биринин гоһуму олуб. Белә ки, дүнјасыны дәјишәнләрдән Хәтаи Һүсејнов сүрүҹүнүн күрәкәни, Ајаз Исламов исә гардашынын оғлудур.
Гејд едәк ки, һәм”Газел”, һәм дә “Газ-53” јүклә долу олуб. Онлардан бири пајтахта тәрәвәз мәһсуллары, диҝәри исә сүд ҝәтирирмиш.
Диггәт: Хәбәрдән истифадә етдикдә мәнбәјә истинад лазымдыр
