Әһли Бејт -АБНА- хәбәр аҝентлијинин вердији хәбәрә әсасән: Иҹтимаи Палатанын 2 апрел вә 17 апрелдә тәшкил едтији митингләрдә тутуланларын һүгугларыны мүдафиә едән комитә дәјирми маса кечирди.
Мүдафиә комитәсинин сәдри Видади Миркамал билдирди ки, гурумун әсас вәзифәси 2 апрелдә тутуланларын вә ишҝәнҹә аланларын һүгугларыны мүдаифә етмәк олуб. Анҹаг тутуланларын сајы артыб вә комитәнин фәалијјәти ҝенишләниб: “Фәалијјәтә башлајәркән һакимијјәт органларына мүраҹиәт етдик. Биз онлара изаһ етдик ки, бу һәбсләр сијаси характерлидир вә әсассыздыр”.
О һәмчинин мәлумат верди ки, 2 вә 17 апрел аксијаларына ҝөрә артыг 12 нәфәр һаггында ҹинајәт иши галыдырылыб.
“Һеч бир видеода полиси вуран митингчи ҝөстәрә билмәзләр”
Мүдафиә комитәсинин үзвү Ҝүлаға Асланлы митингдә тутуланларла бағлы статистик мәлуматлар верди. Апрелин 2-дә сахланлыланларын сајы 300 нәфәрдән чох олуб. 17 апрел митингинә ҝөрә исә 166 нәфәр сахланылыб. Онлардан 18-и митинг әрәфәсиндә сахланылыб, 3-нә суткалыг һәбс верилиб. Митинг ҝүнү исә 6 нәфәр һаггында суткалыг һәбс ҹәзасы верилиб. 26 нәфәр мәһкәмәләрдә, 18 нәфәр полис идарәләриндә ҹәримәләниб. 21 нәфәрә исә хәбәрдарлыг едилиб. Бир нечә нәфәр иш јериндән чыхарылыб.
Ҝ.Асланлы тутуланларын бәзиләринин адларынын сијаһыја дүшмәсинә разы олмадыгларыны да билдирди. Сәбәб исә онларын иш јерләрини итирмәкдән, јахын гоһумлара ола биләҹәк тәзјигләрдән еһтијатланмаларыдыр.
Комитәнин диҝәр үзвү Вагиф Һаҹыбәјли дә ачылан ҹинајәт ишләринин гондарма олдуғуну билдирди. О деди ки, һеч бир видео ҝөрүнтүдә митингчиләрин әлиндә даш, кәсәк олмасы ҝөрсәнмир: “Һеч бир видеода полиси вуран митингчи ҝөстәрә билмәзләр”.
Иҹтимаи Палатанын үзвү Әрәстун Оруҹлу исә диггәти тәләбәләрин сијаси фәалијјәтинә ҝөрә али мәктәбләрдән хариҹ олунмасына јөнәлтди. Онларын да мүдафиә олунмасынын ваҹиблијини вурғулады.
“Вәкилләрин фәдакарлығыны гијмәтләндирмәк лазымдыр”
Вәкил Әсабәли Мустафајев чыхышында билдирди ки, вәкилләр өзләри дә тәпки алтындадыр: “Вәкилләрин фәдакарлығыны гијмәтләндирмәк лазымдыр. Вәкилләр ҝеҹә саатларына гәдәр полис идарәләриндә олурлар. Онлара иҹтимаијјәтин дәстәји лазымдыр. Иҹтимаи дәстәк артса бизә гошулан вәкилләрин дә сајы артаҹаг”.
Ә.Мустафајев өз тәклифләрини дә ирәли сүрдү: “Биз мүдафиә ишләрини јахшы гурмаг үчүн бејнхәлг тәшкилатларла ишләмәлијик. Сәнәдләри инҝилис дилинә чевириб Авропа Бирлилијинә, АТӘТ-ә ҝөндәрмәк лазымдыр”.
Вәкил тәклиф етди ки, информасија базасыны тәшкил едәҹәк хүсуси бир груп јарадылмалыдыр: “КИВ-ләрдә, интернетдә ҝетмиш бүтүн материаллары топламаг лазымдыр. Сонра истинтагда бу материаллары истифадә едәрик. Үчүнҹү тәклифим одур ки, Иҹтимаи Палатадан олан һүгугшунаслардан ибарәт груп јарадылсын. Онлар биз вәкилләрә бәзи ишләрдә көмәклик ҝөстәрсинләр. Дөрдүнҹүсү, Иҹтимаи Палатаја дахил олан партијалар меријаны вә Баш Полис Идарәсини митингләрә иҹазә верилмәмәси вә ҝүҹ тәтбиг олунмас иддиасы илә мәһкәмәјә верә биләр. Биз вәкилләр бу ишдә көмәк етмәјә һазырыг”.
Вәкил һәмчинин вурғулады ки, аксија заманы мониторинг апаран һүгуг мүдафиәчиләри рәј билдирмәли вә пресс релизләр јајмалыдыр: “Биз Авропа Мәһкәмәсинә мүраҹиәт едән заман о рәјләрдән истифадә едә биләрик”.
Иса Гәмбәрлә Елчин Беһбудов арасында мүбаһисә
Ишҝәнҹәләр Әлејһинә Комитәнин сәдри Елчин Беһбудов деди ки, Азәрбајҹан БМТ-нин ишҝәнҹәләр әлејһинә конвесијасына гошулса да, ишҝәнҹәләр һәлә дә мөвҹуддур. О, билдирди ки, митингдә мониторинг апарыблар, тәҹридханаја баш чәкибләр: “Баш верәнләрлә бағлы бејнәлхалг гурумлара билдирмишәм. Ону да гејд едим ки, ишҝәнҹәләр әсасән Нәсими рајон полис идарәсиндә баш вериб. Оранын полис рәиси Мәммәд Микајылов өзү ишҝәнҹә вермәкдә ад чыхарыб. Полис мајору Сүлејман Немәтовун да ады тез-тез ишҝәнҹә вермәкдә һалланыр...”.
Чыхышын бу јериндә Иса Гәмбәр Елчин Беһбудова реплика верди:
-Биз сизин фәалијјәтинизи билирик. Амма ишҝәнҹәләр азалмаг әвәзинә артыр”.
Елчин Беһбудов:
- Биз аидијјаты органлара чатдырмышыг.
Иса Гәмбәр:
- Аидијјаты органлардан бири дә мәнәм. Сәдри олдуғум партијанын үзвләринә ишҝәнҹә верилир. Бу факт варса биринҹи мәнә билдирмәлисиниз.
Елчин Беһбудов:
- Бејнәлхалг гурумларын һамысына чатдырмышыг.
Иса Гәмбәр:
- Биз дә о рәји ҝөрмәк истәјирик. Биз нә едә биләрик ки, бу ишҝәнҹәләри дурдура биләк?
Елчин Беһбудов:
- Анҹаг мәһкәмә һүгуги гијмәт верә биләр ишҝәнҹәләрә. Вәкилләрә үзүмү тутараг дејирәм ки, мәни шаһид кими мәһкәмәләрә дәвәт един.
Иса Гәмбәр:
- Митингләрдән сонра АТӘТ билдирир ки, нә һакимијјәт, нә дә мүхалифәт тәрәфиндән зоракылыг фактлары јохдур. Бу рәјләри иҹтимаијјәтә тәгдим етмәк лазымдыр.
Елчин Беһбудов:
- Митингләрдән сонра мәнә зәнҝ един, мән сизә бүтүн фактлары тәгдим едәҹәм.
“Ишҝәнҹәләрлә бағлы сајт јарадаг”
Һүгуг мүдафиәчиси Лејла Јунус сијаси мәһбусларын сырасына дини мотивләрлә һәбс олунанларын да адыны јазмағын лазым олдуғуну билдирди.
Лејла Јунус тәклиф етди ки, интернетдә ишҝәҹәләрлә бағлы сајт һазырламаг лазымдыр: “О сајтда ишҝәнҹә верән полисләрин, мүстәнтигләрин, сифаришли гәрар чыхаран һакимләрин адларыны јазмаг лазымдыр. Ишҝәнҹә фактларыны орда јајмалыјыг”.
“Туран” Информасија Аҝентлијинин директору Меһман Әлијев деди ки, ҹәмијјәт өкәдә ҝедән просесләр һаггында даһа долғун, даһа әтрафлы билҝиләр әлдә етмәлидир: “Биз чалышмалыјыг ки, информасијалары ҹәмијјәтә өтүрәк. Инсанларын арасында даһа чох сөһбәтләр апармаг лазымдыр”.“Ишҝәнҹәләр јүксәк сәвијјәдә верилмиш сијаси сифаришдир”Иҹтимаи Палатанын Координасија Шурасынын үзвү Пәнаһ Һүсејн исә билдирди ки, ишҝәнҹәләр шәхсләрлә бағлы дејил: “Бу ән јүксәк сәвијјәдә планлашдырылыб һәјата кечирилир. Онлар ишҝәнҹәләрин нүмајишкәранә шәкилдә олмасына чалышырлар. Нәсими полисиндә мәним ҝөзүмүн габағында инсанлара ишҝәнҹәләр верирдиләр. 50 адамын ичиндә инсанлары дөјүб тәһгир етмәләклә онларын шәхсијјәтини алчалтмаг истәјирләр. Бу јухары сәвијјәдә верилмиш сијаси ҝөстәришлә олур”.
П.Һүсејн сијаси репресијјалары арашдырмаг үчүн Иҹтимаи Палатанын јанында тәдгигат комиссијасы јарадылмасыны тәклиф етди.
“Дәгиг вә динҹ шәкилдә мүбаризәмизи давам едәҹәјик”
Мүсават Партијасынын башганы Иса Гәмбәр мүбаризәнин бундан сонра да давам едәҹәјини билдирди: “Дәјирми масада мараглы фикирләр вә тәклифләр сәсләнди. Бу тәклифләрин азы 80%-и иҹра олунур. Достларымыз ҝеҹә-ҝүндүз ишләјирләр, ишләр давам едәҹәк. Бу бир әсәб мүбаризәсидир. Бизим ҝүҹүмүз һәдәфләримизин ајдынлығы, мүбаризәмизин динҹ характер дашымағындадыр. Һакимијјәтин ҝүҹү исә јалан тәблиғат механизми вә зоракылыгдыр. Бу ики гүввә үз-үзә ҝәлир. Әввәлки заманлар олсајды, динҹ гүввә зоракы гүввәнин гаршысында дајана билмәзди. Инди дүнја һесабат тәләб едир. Она ҝөрә дә, бүтүн бу мәсәләләр бејнәлхалг иҹтимаијјәтә дә чатдырылмалыдыр. Дәгиг вә динҹ шәкилдә мүбаризәмизи давам едәҹәјик. Бүтүн режимләр чөкдүјү кими бу режим дә халг гаршысында чөкәҹәк”.
"Ишҝәнҹәләр һөкумәтин әлејһинә олду”
АХҸП сәдри Әли Кәримли дә һәбс вә ишҝәнҹәләрин инсанларын мүбаризә әзмини сындыра билмәдијини вурғулады: “Һөкумәтә ҹавабымыз одур ки, һәбсләр, ишҝәнҹәләр бизи сындырмады. Һәбсдән чыхан достларымыз да мүбаризә руһундадыр. Ишҝәнҹәләр һөкумәтин әлејһинә олду. Психоложи баријери ашандан сонра халгын гаршысыны алмаг мүмкүн олмајаҹаг. Һәр шеј бејнәлхалг стандартлара ујғун ҝедир. Һәбс олунанларын һүгуги мүдафиәси тәшкил олунур, вәкилләрә тәшәккүр едирәм. Амма бу јетәрли дејил. Бүтүн топлумдан ҝөзләнтиләримиз вар. Бизим фәдакарлығымыз ҹәмијјәтдә архајынлыг јарадыб ки, бунлар баҹарарлар. Доғрудур, өһдәсиндән ҝәлирик. Анҹаг бу чох чәтин олур. Һеч олмаса тутуланлара гајғы кампанијасына даһа чох инсанлар гошулсун. Бундан сонракы фәалијјәтимизи даһа јахшы координасија етмәјә еһтијаҹ вар, даһа чох ишләмәлијик”.Вәкил Анар Гасымов, һүгугшунас Гаја Әлијев, ИП үзвү Бәјбала Әбил вә диҝәрләри чыхыш едәрәк мүхтәлиф тәклифләр сәсләндирдиләр.
Сонда исә Мүсават Ҝәнҹләр Тәшкилатынын митингләрлә бағлы һазырладыглары видео-ролик нүмајиш олунду.
Диггәт: Хәбәрдән истифадә етдикдә мәнбәјә истинад лазымдыр
