Әһли Бејт -АБНА- хәбәр аҝентлијинин вердији хәбәрә әсасән: Тәдбирдә илк олараг чыхыш едән мүдафиә комитәсинин үзвү Фаиг Вәлиоғлу, Азәрбајҹанда инсан һаггларынын дәһшәтли дәрәҹәдә позулдуғуну гејд едиб вә конфрансын мөвзусуна өз мүнасибәтини билдириб. "Мән әввәлҹә дәвәти гәбул едиб конфранса ҝәлән һәр бир шәхсә өз тәшәккүрүмү билдирирәм. Азәрбајҹан һазырда проблемләр ичәрисиндә боғулур. Хүсусилә Гарабағ проблеминин 20 илә јахындыр һәлл олунмамасы вә өлкәдә баш галдрымыш Исламафобија кампанијасы бу проблемләрин бариз нүмунәсидир. Өлкәнин бу ҹүр ағыр бир вәзијјәтиндә руһани сөзүнә һәддән артыг еһтијаҹ вар. Азәрбајҹан һөкүмәти 15-ә јахын бејнәлхалг тәшкилатлар гаршысында өһдәлик ҝөтүрүб. Лакин биз бу ҝүн мөвҹуд һакимијјәт тәрәфиндән бу өһдәликәрин кобуд шәкилдә позулмасынын шаһиди олуруг. Бу ҝүн Азәрбајҹанда сәрбәст топлашмаг вә мәнәви дәјәрләр һаггында олан ганунлара әмәл олунмур. Һазырда өлкәнин нүфузлу руһаниләри шәрләнәрәк һәбс едилибләр. Диндарлара гаршы атылан бу ҹүр бөһтанлар Ислама вә өлкәмизә гаршы атылан бир ләкәдир. Бу ҹүр бөһтанлар бизи дүнја гаршысында ҝүлүнҹ бир вәзијјәтә гојуб. Нә вахтдан конститусион һүгугларымызы тәләб етмәк ҹинајәт олуб? Биз бир мүдафиә комитәси олараг, бу ганун позунтулары вә һәбсләрлә әлагәдар 100-ә јахын бејнәлхалг тәшкилатлара мүраҹиәт етмишик. Бурдан дөвләт структурларына үзүмүзү тутуб дејирик ки, тезликлә өлкәдә баш галдырмыш бу проблемләри һәлл един. Әҝәр өлкәнин нүфузлу руһаниләри әлләринә Гуран алыб бу мәсәлә илә әлагәдар ҹидди фәалијјәтә башласалар, бу ҹүр һал һакмијјәт үчүн һеч дә јахшы нәтиҹәләнмәјәҹәк. Әҝәр бу мүбаризә јолунда биз руһаниләрин һамысыны һәбсә атсалар белә, өз мүбаризәмиздән әл чәкмәјәҹәјик. Бизим тәләбимиз будур ки, тезликлә һиҹаб гадағасы һаггында ганун ләғв едилмәли, һиҹаб мәһбуслары азадлыға бурахылмалы вә Гарабағ проблеминин һәлли истигамәтиндә һакимијјәт там олараг халгын ирадәсиндән истифадә етмәлидир. Әҝәр Гарабағ проблеминин һәлли истигамәтиндә һакимијјәт мүсбәт аддымлар атмазса, биз руһани алимләр олараг Азәрбајҹанда ермәниләрә гаршы ҹиһад елан едәҹәјик. Биз диндарлар үчүн вәтән дә, торпаг да, һиҹаб кими мүгәддәсдир. Ермәни зинданларында сахланылан Азәрбајҹан әсирләри артыг 15 илдир ки, дүшмәнләримизин әлиндәдир. Бизим башымыза ҝәтирилән бу ҹүр һаллар өлкәмиз үчүн утанҹвериҹи вә ләкәдир"-дејә Фаиг Вәлиоғлу гејд етди.
Сонра чыхыш едән өлкәнин нүфузлу руһаниси Һаҹы Әли Әлијев илаһи елчиләрин вә алимләрин ҹәмијјәтдәки тәлимләриндән данышды. Нүфузлу алим һазырда Ислам динини тәмсил едән фәрдләрин илаһи вә инсани дәјәрләри горумаг үчүн әлләриндән ҝәлән һәр бир шеј етмәјә лазым олдугларыны билдирди. "Бәзи вахтлар биз руһаниләри кимләринсә сифаришләринә ујғун олараг дини мүдафиә етдијимизи дејирләр. Руһаниләр мүдафиә етмәк истәдикәри дәјәрләри, Гуран вә пејғәмбәрин ҝөстәришләринә ујғун олараг һәјата кечирирләр. Ону да гејд едим ки, бизим һаггымызда јајылан бу ҹүр бөһтанлар, һеч бир һалда бизи өз мүбаризә јолумуздан сахламајаҹаг. Һәр бир һалда бу проблемләр һәлл олунана гәдәр, өз мүбаризәмиздән ҝери чәкилмәјәҹәјик"-дејә Һаҹы Әли Әлијев әлавә едиб.
Бундан сонра чыхыш едән мүдафиә комитәсинин үзвү вә руһани алим Товһид Ибраһимбәјли дин дүшмәнләринә мүраҹиәт етди. "Аллаһ Гурани-Кәримдә бујуруб ки, дин дүшмәнләрини хошуна ҝәлсә вә ја ҝәлмәсә дә Аллаһ өз нуруну тамамлајаҹаг. Һиҹабы гадаға едәнләр вә илаһи шәхсијјәтләрә гаршы бөһтан атанлар там әминликлә билсинләр ки, тезликлә зәлил олаҹаглар. Бизләр садәҹә олараг өз вәзифәмизи јеринә јетиририк. Һаҹы Мөвсүм Сәмәдовун чыхышы заманы билдирмишди ки, "Елә ки дининиз тәһлүкәјә дүшсә ҹанынызы вериб онугорујун". О, өз ҹаны вә азадлығы баһасына дини дәјәрләрин мүдафиәсинә галхды. Бизләр дә бу јолда һәр бир шејимиздән кечмәјә һазырыг. Мәним сөзүм һакимијјәтдә олан мәмурларадыр. Ҝөрәсән сиз мәмурлар үчүн Азәрбајҹанын милли-мәнәви вә дини дәјәри олан һиҹабын бир јумурта гәдәр дәјәри јохдур?. Гыса бир мүддәт әрзиндә јумуртанын баһалашмыш гијмәтини ашағы салдыз. Мәҝәр һиҹаб таханлар бу өлкәнин вәтәндашлары дејил. Онлар да азәрбајҹанлыдыр. Бизим һакимијјәтдән тәләбимиз будур ки, бизим конститусион һүгугларымызы бәрпа едиб руһани мәһбуслары тезликлә азадлыға бурахсын. Әҝәр бизим һүгугларымыз бәрпа олунмазса, Ислам дини бизә һүгугларымызы бәрпа етмәк үчүн јол ҝөстәриб. Бизим һәтта өлүмүмүз баһасына белә, бу мүбаризәмиздән әл чәкмәјәҹәјик"-дејә Товһид Ибраһимбәјли сөјләди.
Даһа сонра чыхыш едән Азәрбајҹан Ислам Партијасынын сәдри Елчин Манафов, Аллаһ дининә гаршы узанан хәјанәткар әлләрлә мүбаризә апармаг үчүн јарадандан јардым истәдијини вә шүкр етдијини билдирди. Сонра конфрансын мөвзусуна мүнасибәт билдирән АИП сәдри бунлары деди: "Сүкр олсун ки, Аллаһ бизләри өз динини горумаг мәсулијјәтини нәсиб едиб. Биз АИП олараг өз һаггларымызы тәләб етмәк үчүн митинг кечирәҹәјик . Бу бизим өз конститусион һүгугумуздур. Митинг кечирмәк вә јерин мүәјјән олунмасы үчүн Бакы Шәһәр Иҹра Һакмијјәтинә мүраҹиәт едәҹәјик. Һәрчәнд ки, биз мүраҹиәт етмәјә дә биләрдик. Чүнки, сәрбәст топлашмаг бизим конститусион һүгугумуздур. Лакин биз өз тәһлүкәсизлијими тәмин етмәк вә тәхрибатдан горунмаг үчүн иҹра һакимијјәтинә мүраҹиәт едәҹәјик. 10 мин нәфәрә јахын инсан митингә ҝәлмәк үчүн бизә мүраҹиәт едиб. Ола билсин митинг иштиракчыларынын сајы 10 мин нәфәрдән дә чох олсун. Биз һеч митинг кечирмәк фикирндә дејилдик. Үмид едирдик ки, бајрама гәдәр бүтүн проблемләр һәлл олунар. Лакин һеч нә дәјишмәди. Биз јенә дә үмидимиз итирмәмишик. Ола билсин митинг тәјин олунан ҝүнә гәдәр проблемләримиз һәлл олунҹаг вә митингә еһтијаҹ олмајаҹаг. Биз бу проблемләрин һәлл олунмасы истигамәтиндә өләнә гәдәр мүбаризәмизи давам етдирмәјә һазырыг ки, үзәримиздә олан бу гара ләкә ҝөтүрүлсүн".
АИП гадынлар шурасынын сәдри Нөврәстә Ибраһимова исә конфрансда чыхышы заманы һиҹаб проблеминә ҝөрә әзијјәт чәкән ханымларын үнванладығы суаллар гаршысында аҹиз олдуғуну гејд етди: "Артыг һәмин ханымларын ҝөз јашлары бизләр чох нараһат едиб. Әҝәр Гуран ән камил ганун нүмунәсидирсә, ҝөрәсән һиҹаб гадағасыны јарадан мәмурлар һансы мәнбәләрә истинад едирләр? Мәним сөзүм бизим мәмурларадыр. Бу ҝүн әҝәр Ислами дәјәрләри Инҝилтәрә вә Тајланд гәбул едиб она һөрмәтлә јанашырса, сән мәмурун бу дәјәрә гаршы чыхмағынын сәбәби нәдир?
Һиҹаба гаршы узанмыш бу әлләр үмумиликдә азәрбајҹан гадынына гаршы хәјанәт һесаб олунмалдыр".
Сонра чыхыш едән Ҝәнҹә шәһәриндә јашајан руһани Асәф Әлијев Ҝәнҹәнин дурумунун чох ағыр олдуғуну сөјләди. Артыг Ҝәнҹәдә мүәллимләри дәрсә бурахылмадығын дејән руһани алим, мәктәбли шаҝирдләрин мәсҹидләрә бурахылмадығыны сөјләди. О, һәмчинин дүнән 3 нәфәр ҝәнҹә диндарынын һеч бир әсас олмадан һәбс олундуғуну билдирди. Ҝәнҹә диндарларынын адындан данышан Асиф Әлијев, ҹанлары баһасына олса белә, мүбаризәдән ҝери чәкилмәјәҹәкләрини гејд етди.
Диггәт: Хәбәрдән истифадә етдикдә мәнбәјә истинад лазымдыр.
