Һазырда әлимдә ики протокол вар:
1. ”Бахыш кечирилмәси һаггында протокол” (Ҹәлилабад шәһәри, 15 август, 2001)
2. “Бахыш кечирилмәси һаггында протокол” (Ҹәлилабад шәһәри, 16 август, 2001)
Бәли, ејни үнванда бир ҝүн ахшам вә һәмин ҝүнүн сәһәри сүбһ чағы ахтарыш.
Биринҹи ахтарышда китабханама һејран галан ахтарыш групунун әмәлијјат рәиси С.Умаров фикрә ҝедир вә ортада ојун олдуғуну анлајыб, дәрһал мәнзили тәрк едир. Бакыја хәбәр чатыр ки, А. Ејвазовун евиндә ахтарыш апарылыб вә “шүбһәли предметләр ашкарланмајыб”. Һәмин вахтын әмәлијјат рәиси “Һаҹы” Сәјавуш дәрһал икинҹи ахтарыш үчүн ҝөстәриш верир. Икинҹи ахтарыша әмәлијјат рәиси М. Әсҝәров башчылыг едир. Өтән ҝүн Умаровун тапа билмәдикләрин Әсҝәров “тапыр”: Макаров тапанчасына мәхсус 6 әдәд бош ҝилиз! А. Ејвазов исә һәлә бир ҝүн әввәл “һүзүр мәҹлисиндә полисә мүгавимәт” иттиһамы илә һәбс едилир.
А. Ејвазов (бу сәтирләрин мүәллифи) Тәһлүкәсизлик Назирлијинин әсас бинасында баш әмәлијјат рәиси “һаҹы” Сәјавушла ҝөрүшәркән она тәшәккүр едир! Рәис тәәҹҹүбләнир вә сәбәбини сорушур. А. Ејвазов тәбәссүмлә ҹаваб верир: “Сағ олун ки, мәнзилимдән наркотика “ашкарламадыныз”. Силаһын ејби јохдур. Мәним силаһым гәләм олса да, бу “һөрмәтиниздән” разыјам – кишинин евиндән силаһ чыхар! Бу мәлуматы охујанда “һаҹы” Сәјавуш ( ја досту ҹәнаб Телман) гыҹыгланса, унутмасын ки, “бир ҝүндә ики протоколун” әслини мәндән зорла алсалар да, онларын сурәтини 10 илә јахындыр сахлајырам. Әмәлијјат рәисләри һаггында башга компроматлар да аз дејил.
* * *
Өтән ҝүн Һаҹы Мөвсүм полисә мүгавимәт итииһамы илә һәбс едилди – мәшһур пријомдур. Бу ҝүнсә хәбәр јајыды ки, АИП сәдринин дүканындан (?) силаһ-сурсат тапылыб – бу да мәшһур пријомдур.
ДИН-ин мәтбуат хидмәтиндән Лент.аз-а верилән мәлумата ҝөрә, рәсми дөвләт гејдијјаты олмајан Азәрбајҹан Ислам Партијасынын сәдри Мөвсум Мәрдан оғлу Сәмәдовун Губа рајонунда јашајан әмиси оғлу Дәјанәт Сәмәдова иғтишашлар төрәтмәк, иҹтимаи тәһлүкәсизлији позмаг, инсанлары ҹиһада тәһрик етмәк барәдә тапшырыглар вермәси илә бағлы назирлијә дахил олмуш мәлуматлар әсасында ҹари ил јанварын 8-дә Баш Мүтәшәккил Ҹинајәткарлыгла Мүбаризә Идарәси тәрәфиндән әмәлијјат-ахтарыш тәдбирләри кечирилиб.
Дәјәнәт Сәмәдовун ишләдији, Мәрдан Сәмәдова мәхсус електрик маллары мағазасына бахыш заманы орадакы сејфин алтындан 3 әдәд әл гумбарасы, һабелә јашадығы евдән 7 әдәд автомат патрону вә ичәрисиндә дини радикализми тәблиғ едән мәлуматларын олдуғу електрон дашыјыҹылар ашкарланыб ҝөтүрүлүб.
Дәјанәт вә Мәрдан Сәмәдовлар шүбһәли шәхс гисминдә сахланылмышлар.
Факт үзрә Азәрбајҹан Республикасы Ҹинајәт Мәҹәлләсинин мүвафиг маддәләри илә ҹинајәт иши башланылыб. Арашдырмалар апарылыр.
* * *
Һаҹыҹан (Мөвсүм)! Бизим ҝетдијимиз јол ејш-ишрәт, ад-сан, вар-дөвләт јолу дејил, онун бу ҝүн јашадығын ағрылары вар. Аллаһ гәбул еләсин. Амма әмәлијјатчылара да бир сағ ол демәји унутма. Сағ олсунлар ки, ајағына наркотика јазмадылар. Бу кичик һөрмәт дејил. Һәр кимин силаһы олур олсун, кишинин силаһы олар! Әлбәттә ки, бунлар бир зарафатдыр. Бир ҝүн һамы, һамы, һамы… лап башдакылар да, әмәлијјатчылар да зәррә-зәррә ҹәзасына чатаҹаг. Һәмсөһбәти Аллаһ олан дин јолчусуну шәрләјиб ајағына силаһ јазмаг кичик ҝүнаһ дејил. Ирадәмизи гырмаг үчүн бизи салдыглары тәкадамлығын ән ваһимәлиси онларын интизарындадыр: гәбир-тәкадамлыг! О тәкадамлыгдан ҝеријә јол јохдур, өлмәклә дә гуртармаг олмур. Сәбрин артыг!
Һаҹы Арзу
