Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасынын сәдри Мөвсүм Сәмәдов һәбс олунуб. Дүнән ахшам саатларында партијанын гәрарҝаһындан евә ҝедәркән һәбс олунан Мөвсүм Сәмәдовла бирҝә, Партијанын сәдр мүавини тәшкилати мәсәләләр үзрә сәдр мүавини Вагиф Абдуллајев вә сүрүҹүсү Мирһүсејн Казымов сахланылыб. Гејд едәк ки, партија сәдри һәбс олунаркән онунла бирҝә олан Елчин Һәсәнов да полис тәрәфиндән сахланылыб.
Мөвзу илә әлагәдар Азәрбајҹан Ислам Партијасынын мәтбуат катиби Акиф Һејдәрли илә әлагә сахладыг вә о да мәлуматы тәсдигләди. “Дүнән ахшам партија гәрарҝаһындан чыхаркән Мөвсүм Сәмәдов вә онунла бирҝә олан 3 нәфәр һәбс олунуб. Һәбс олунанлар әввәлҹә Нәриманов рајон 18 сајлы полис бөлмәсинә апарылыб. Бундан сонра мәһкәмә гаршысына чыхарылан 3 нәфәрә 10 сутка һәбс ҹәзасы верилиб. Партија сәдри Мөвсүм Сәмәдову исә һазырда Милли Тәһлүкәсизлик Назирлијиндә сахланылыр”.
Мәлумат үчүн билдирәк ки, 2 јанвар тарихиндә Азәрбајҹан Ислам Партијасынын сәдри Мөвсүм Сәмәдов, партијанын баш мәҹлисиндә өлкә башчысы Илһам Әлијеви сәрт тәнгид едәрәк, Азәрбајҹанда Ислам дини әлејһинә апарылан тәзјигләрин дајандырылмасыны тәләб етмишди.
Диггәт: Хәбәрдән истифадә етдикдә мәнбәјә истинад лазымдыр.
