Әһли Бејт -АБНА- хәбәр аҝентлијинин вердији хәбәрә әсасән: Бинәгәди рајону Хоҹасән гәсәбә сакини Дүрданә Һәшимова белә дејир: Һәјат јолдашым Һаҹы Һаҹыгулу Һәшимову вә гардашым Мәшәди јусиф Әликрам оғлуну һәбс едибләр. Апарыблар Бинәгәди полис идарәсинин 40-ҹы бөлмәсинә, орадан да мәһкәмәјә. Мәһкәмәдә дә дејибләр ки, онлары Хоҹасән гәсәбәсиндәки 103 сајлы орта мәктәбин директор мүавини Вагыф Гулузадәнин шикајәти әсасында сахлајыблар. Ҝуја Вагиф мүәллим шикајәт јазыб ки, һәмин шәхсләр она тәҹавүз едибләр, ону тәһгир едибләр.
Декабрын 25-дә Бинәгәди рајон Мәһкәмәси Хоҹасән гәсәбәсиндәки 103 сајлы орта мәктәбә һүҹум етдији билдирилән Һаҹы Һаҹыгулу Һәшимов, Һаҹы Азәр Сәрҹанов вә Мәшәди јусиф Әликрам оғлунун 10 ҝүн мүддәтинә азадлыгдан мәһрум едилмәләри барәдә гәрар чыхарыб.
САХЛАНАН ДИНДАРЛАРЫН АДЫНЫ ЧӘКӘН ОЛМАЈЫБ
Бинәгәди рајон Полис Идарәсиндән АзадлыгРадиосуна билдирибләр ки, һәмин шәхсләр мәктәбин пәнҹәрәләринә гыз ушагларынын һиҹабла дәрсә бурахылмамаларына гаршы чыхан јазылар јапышдырдыгларына ҝөрә сахланылыблар. Барәләриндә мәһкәмәнин инзибати һәбс гәрары чыхармасы да мәктәбдән дахил олан шикајәт әсасында баш вериб.
Дүрданә Һәшимова исә дејир ки, мәктәбдән полисә едилән мүраҹиәтдә сахланылан шәхсләрин һеч биринин ады чәкилмәјиб. Полисә мүраҹиәт едән шәхс, јәни мәктәб директорунун мүавини Вагиф Гулузадә онлара белә дејиб.
103 сајлы мәктәбин тәдрис ишләри үзрә директор мүавини Вагиф Гулузадә дә дејиләни тәсдигләјир:
«О 3 нәфәрлә бағлы һеч бир шикајәт олмајыб. Мәктәбин шүшәси сыныб вә мүәллимләр отағынын гапысына јазылыб јапышдырылыб ки, баҹымызы дәрсә бурахмасаныз мәктәби јандыраҹағыг. Биз дә о һагда һүгуг-мүһафизә органларына мәлумат вермишик».
Дүрданә Һәшимова исә дејир ки, нә онун һәјат јолдашы, нә гардашы, нә дә сахланылан 3-ҹү сәхс јазы јазыб һараса јапышдырасы, јахуд пәнҹәрә сындырасы адамлар дејилләр.
ҸАМААТЫН ҜӨЗҮНҮ ГОРХУТМАГ ИСТӘЈИРЛӘР»
Хоҹасән сакинләри дә бу ханымын дедикләрини тәсдигләдиләр:
«Бу, тәхрибатдыр. Белә етмәклә кәнд ҹамаатынын ҝөзүнү горхутмаг истәјирләр. Бизим һөкумәтлә, дөвләтчиликлә һеч бир ишимиз јохдур. Тутуланлар тәмәннасыз бизим һүзүр мәрасимләримизи јола верирләр, дар ҝүнүмүздә көмәк олурлар. Онлар һөрмәтли адамлардылар. Шүшә сындырыб гачасы адамлар дејилләр. Белә шеји онлара јарашдырмаг олмаз. Полисин марағында олсајды, о јазыны кимин јаздығыны арашдырыб тапарды. Һиҹаб үстә адам тутмазлар. Әҝәр беләдирсә, онда һиҹаблылар үчүн ајрыҹа мәктәб тиксинләр».
Бу ил нојабрын орталарында Тәһсил Назирлији һиҹаблы шаҝирдләрин дәрсләрә бурахылмамасы илә бағлы ҝөстәриш вериб. Назирлијин мөвгејинә ҝөрә, орта мәктәб шаҝирдләринин ҝејими ганунвериҹилијин тәләбләринә ҹаваб вермәлидир. Артыг онларла һиҹаблы мәктәбли бир мүддәтдир ки, дәрсләрдә иштирак едә билмир.
«ҸӘМИЈЈӘТИН ҺҮГУГ СӘВИЈЈӘСИ АШАҒЫ ДҮШҮБ»
Вәкил Фуад Ағајев исә һесаб едир ки, Хоҹасәндә баш верәнләр диҝәр јерләрдә дә тәкрарлана биләр, чүнки бу ҹүр мәсәләләрдә дәгиг ганунвериҹилик низамламасы јохдур. Ганунвериҹилик нә гәдәр гејри-мүәјјән олурса, ондан суи-истифадә һаллары да о дәрәҹәдә артыр:
«Һеч бир әсас олмадан шәхсин азадлыгдан мәһрум едилмәси олдугҹа ҹидди һүгуг позунтусудур. Мәһз мәһкәмә мүәјјән етмәлидир ки, бу вә ја диҝәр шәхсин азадлыгдан мәһрум едилмәси, һансыса ҹинајәтдә ондан шүбһәләнилмәси үчүн, еләҹә дә бу иттиһамы әсасландыран дәлилләр вар ја јох».
Фуад Ағајев ону да дејир ки, сон 20 илдә ҹәмијјәтдә һүгуг сәвијјәси даһа да ашағы дүшүб. Белә ки, вәтәндашлар нәдәнсә һүгуглары позуланда илк нөвбәдә Президент Админстрасијасына, Һејдәр Әлијев Фондуна вә диҝәр бирбаша аидијјаты олмајан гурумлара мүраҹиәт едирләр. Һалбуки, ганунсуз һәбслә бағлы шикајәтләр мәһкәмәјә верилмәлидир.
Диггәт: Хәбәрдән истифадә етдикдә мәнбәјә истинад лазымдыр
