Әһли Бејт -АБНА- хәбәр аҝентлијинин вердији хәбәрә әсасән: Болгарыстанын баш назири Бојко Борисов бу лајиһәнин үмумијјәтлә дајандырылаҹағы барәдә хәбәр вериб.
Гејд едәк ки, Бургас-Александруполис кәмәринин тикинтиси барәдә мүгавилә Русија вә Болгарыстан арасында 2008-ҹи илин әввәлиндә бағланыб. Болгарыстанын сабиг һөкумәти бәјан етмишди ки, узунлуғу 282 км олан, тикинтиси 1 милјард доллара баша ҝәләҹәк бу кәмәр Болгарыстан үчүн стратежи әһәмијјәт дашыјыр вә өлкәдә Авропа үчүн ваҹиб енержи говшағы јаратмаға имкан верәҹәк. Амма Болгарыстанын индики һөкумәти лајиһәнин игтисади ҹәһәтдән сәмәрәли олаҹағына инанмыр – чүнки кәмәрлә јалныз Русија нефти дашынаҹаг.
Хатырладаг ки, Болгарыстанын баш назири әтраф мүһит үчүн тәһлүкәли олмасы вә игтисади сәмәрәсинин гејри-мүәјјәнлији илә әлагәдар бу лајиһәнин ваҹиблијини әввәлләр дә шүбһә алтына гојуб. Ијун ајында исә о, Болгарыстанын Гара дәниз саһилләринә вә туризм сәнајесинә тәһлүкә јаратдығы үчүн өлкәсинин бу лајиһәдән үмумијјәтлә имтина едәҹәјини билдириб. Русија тәрәфинин чохсајлы ҹәһдләринә бахмајараг инди мәлум олур ки, Болгарыстан тәрәфини кәмәрин ваҹиблијинә инандырмаг мүмкүн олмајыб. Мараглыдыр ки, ҹәми 2 ҝүн әввәл, нојабрын 13-дә Русијанын баш назири Владимир Путинин Болгарыстана сәфәри заманы Болгарыстан һөкумәтинин башчысы лајиһәнин ләғв олунаҹағыны ачыгламајыб, әвәзиндә онун еколожи бахымдан јенидән ишләнәҹәјини билдириб. Кәмәрлә бағлы әсл планларыны исә Болгарыстан рәһбәри Русија баш назири өлкәни тәрк едәндән сонра ачыглајыб.
Диггәт: Хәбәрдән истифадә етдикдә мәнбәјә истинад лазымдыр
