Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Мүдафиә Назирлији Ермәнистан тәрәфә хәбәрдарлыг едиб. Мүдафиә Назирлијинин мәтбуат хидмәтинин јајдығы мәлумата ҝөрә, тәкҹә дүнән ермәниләрин атәшкәс режимини позмасы нәтиҹәсиндә Азәрбајҹан Силаһлы Гүввәләринин әсҝәри Фәррух Сабир оғлу Зејналов јараланыб. Назирликдән билдирилиб ки, Ермәнистан-Азәрбајҹан, Дағлыг Гарабағ мүнагишәсинин һәлли илә бағлы данышыгларын ҝетдији бир әрәфәдә Силаһлы Гүввәләримизә атәшкәс режиминә әмәл олунмасы барәдә ҝөстәриш верилиб: “Анҹаг буна бахмајараг гаршы тәрәф вәзијјәти ҝәрҝинләшдирмәкдә давам едәрәк јенә дә атәшкәс режимини позур. Тәкҹә сон сутка әрзиндә Ермәнистан Силаһлы Гүввәләринин бөлмәләри ҹәбһәнин бир нечә истигамәтиндә мөвгеләримизи атәшә тутмуш вә нәтиҹәдә октјабрын 31-дә саат 16.20-дә бир әсҝәримиз (Зејналов Фәррух Сабир оғлу) јараланмышдыр. Лакин Азәрбајҹан Силаһлы Гүввәләри ҝөстәриши јеринә јетирәрәк дүшмәнә ҹаваб атәши ачмајыб. Ермәнистан баша дүшмәлидир ки, бу һалдан суи-истифадә етмәсинә јол верилә билмәз вә гаршылыглы анлашмаја риајәт едилмәзсә, Азәрбајҹан тәрәф ҹаваб атәши ачмаға мәҹбур олаҹаг”.
Диггәт: Хәбәрдән истифадә етдикдә мәнбәјә истинад лазымдыр
