Әһл Бејт-АБНА-хәбәр аҝентлијинә верилән хәбәрә әсасән Азәрбајҹан Президент Администрасијасы бејнәлхалг әлагәләр шөбәсинин мүдири Новруз Мәммәдов дејиб. “Азәрбајҹан АБШ дөвләт катиби Һиллари Клинтонун сәфәрини јүксәк гијмәтләндирир. Бу, АБШ дөвләт катибинин Азәрбајҹана илк сәфәридир”. Шөбә мүдири билдириб ки, АБШ президентинин Азәрбајҹан президентинә јаздығы мәктубда да ҝөстәрилдији кими, ики өлкә арасында әлагәләр јүксәк сәвијјәдәдир: “Лакин бәзи мәсәләләр вар ки, АБШ бу мәсәләләрә диггәтини даһа да артырмалыдыр. АБШ рәһбәрлији Азәрбајҹанын неҹә, һансы әһәмијјәтә малик өлкә олдуғуну билир, баша дүшүр вә бу мүстәвидә Азәрбајҹана, онунла әлагәләрә јүксәк гијмәт вә өнәм верир. Бу нөгтеји-нәзәрдән дүшүнүрәм ки, бу сәфәрлә бизим әлагәләримиз, мүнасибәтләримиз, гаршылыглы марагларымыз даһа јүксәк мәрһәләјә кечәҹәк”. Н. Мәммәдовун сөзләринә ҝөрә, рәсми Бакы ҝөзләјир ки, Дағлыг Гарабағ мүнагишәси илә бағлы ҹидди аддым атмаг лазымдыр: “Бир нечә ҝүн өнҹә АТӘТ-ин Минск Групунун һәмсәдри олан өлкәләрин президентләринин бәјанатында да ҹидди аддым атмағынын лазым олдуғу гејд олунуб”.
