Әһл Бејт-АБНА-хәбәр аҝентлијинин верији хәбәрә әсасән Америкадакы апарыҹы јәһуди тәшкилатларынын лидерләри јахын ҝүнләрдә Бакыја сәфәр едәҹәк. “ИзРус” сајтынын хәбәринә ҝөрә, нүмајәндә һејәтинә Америка Јәһуди Комитәсинин иҹрачы директору Девид Һаррис башчылыг едир. 12 нәфәрлик нүмајәндә һејәти Бакыја ијулун 4-дә ҝәләҹәк. Мараглыдыр ки, бундан ҹәми бир ҝүн әввәл АБШ дөвләт катиби Һиллари Клинтон да Бакыда олаҹаг. Јәһуди лоббичиләринин ики ҝүн давам едәҹәк сәфәри заманы президент Илһам Әлијев, хариҹи ишләр назири Елмар Мәммәдјаровла ҝөрүш планлашдырылыр. Һәмчинин һејәт үзвләрини Исраилин Бакыдакы сәфири Михаел Левон-Лотем өз игамәтҝаһында гәбул едәҹәк.
Сәфир “ИзРус”а ачыгламасында буну тәсдиг едәрәк дејиб ки, бу ҹүр сәфәрләр алгышланыр: “Азәрбајҹанда Америка јәһудиләри илә достлуғу гијмәтләндирирләр. Бу, Тәл-Әвивлә Бакы арасында мүнасибәтләрә дә мүсбәт тәсир едир”. Девид Һаррис 2008-ҹи илдә Илһам Әлијевлә ҝөрүшүб. Бу ҝөрүшдә АБШ-Азәрбајҹан мүнасибәтләринин инкишафындан вә Тәл-Әвив-Бакы достлуғундан данышылыб. Лакин Девид Һарриси Түркијә һөкумәти вә баш назири илә дост сајмаг олмаз. О, Түркијә баш назиринин Исраилә гаршы мөвгејини дәфәләрлә кәскин тәнгид едиб. Гәззаја јардым апаран ҝәмијә һүҹумдан сонра даһа да ҝәрҝинләшән Түркијә-Исраил мүнасибәтләринин фонунда Һаррисин Бакыја сәфәри Әрдоғана месаж кими дә дәјәрләндирилир.
