Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Истанбулун Есенјурт бәләдијјәсинин кечмиш сәдри, ҸҺП үзвү Ҝүрбүз Чапанын 1995-ҹи илдә Ермәнистана етдији сәфәр вә Ирәванда о вахткы президент Левон Тер-Петросјанла кечирдији ҝөрүшүн шок деталлары ачыгланыб.
1995-ҹи ил ијулун 1-дә Истанбулун Есенјурт бәләдијјәсинин о дөврдәки сәдри Ҝүрбүз Чапан Ермәнистана сәфәр едәрәк, Ирәванда о вахткы президент Левон Тер-Петросјан илә ҝөрүшүб. Бу сәфәрин әсл мәгсәди исә илләр сонра Ҝүрбүз Чапанын да адынын кечдији “Ерҝенекон” мәсәләси илә бағлы верилән ифадәләрдә үзә чыхыб. Ҝ.Чапан өз ифадәсиндә билдириб ки, 1995-ҹи илдә онун Ермәнистана сәфәри АБШ-ын истәји әсасында баш тутуб. Онунла Ермәнистана сәфәрә ҝетмиш журналист-јазарлар Ҹенҝиз Чандар вә Орал Чалышлар исә Түркијәнин Милли Тәһлүкәсизлик Тәшкилаты (МИТ) тәрәфиндән тәлиматландырылыбмыш.
Ҝ.Чапан гејд едиб ки, о, Ермәнистана сәфәри заманы “сојгырымы абидәси”ни дә зијарәт етдијини дејәрәк билдириб: “Ермәнистана ҝедән заман бизи “сојгырымы абидәси”нә дә апардылар. Биз Ермәнистана сәфәрә ҝедәндә Түркијәнин президенти Сүлејман Дәмирәл, Баш назири исә Тансу Чилләр иди. Онларын һәр бири бизим сәфәримиздән мәлуматлы идиләр.
О, даһа сонра Ермәнистандан Түркијәјә Тифлис үзәриндән ҝери гајыдараг президент Сүлејман Дәмирәлә Гарабағ мәсәләсинин һәлли үчүн ермәниләр тәрәфиндән ирәли сүрүлән тәклифләри чатдырдығына лакин С.Дәмирәлин онлара мүхтәлиф бәһанәләр ҝәтирәрәк буну рәдд етдијинә ишарә еәдрәк вурғулајыб: Президент Сүлејман Дәмирәл деди ки, "азәриләр бизим голумуздур, гоһумдурлар. Онларын разылығы олмадан биз һеч бир аддым ата билмәрик (!).
“Мән Сүлејман бәјә дедим ки, ермәниләр биздән сәрһәдләрин ачылмасыны истәјирләр. Һәтта бизә дедиләр ки, әҝәр Түркијә сәрһәдләри ачса, Ермәнистан “Лачын дәһлизи”ни бошалтмаға һазырдыр. Бизимлә ҝөрүшүндә президент Левон Тер-Петросјан ачыг шәкилдә деди ки, “Лачын дәһлизи” бошалырса, бу, Ермәнистан үчүн дә фајдалы оларды. Јәни, Гарабағ проблеминин һәлли үчүн данышыглар апармаг даһа асан олар”- Ҝ.Чапан гејд едиб.
ҸҺП үзвү вурғулајыр ки, 1993-ҹү илдә Русијанын Ермәнистана јардымлары кәсилиб вә сојуг гыш ајында өлкә чөрәксиз галыб: “О дөврдә Ермәни Дашнак Партијасынын Франса үзрә тәмсилчиси Самсон Өзарарат Авропадан Ермәнистана ҝөндәрилән һуманитар јардымлары тәшкил едән бир дәрнәјин рәһбәри иди. С.Өзараратын хаһиши илә Түркијә Ермәнистана 41 мин тон буғда ҝөндәрди. Анҹаг игтидарда олан Левон Тер-Петросјан һакимијјәти радикал ермәни милләтчиләринин тәзјигиндән чох нараһат олараг чәкинирди. Бунунла әлагәдар олараг С.Өзарарат Алпарслан Түркешлә Анкарада ҝөрүшүр. Һәмин ҝөрүш заманы А.Түркеш дејир ки, 1915-ҹи ил һадисәләри 600 иллик мүнасибәтләрин гәзасыдыр. Түркеш дејирди ки, 1915-ҹи ил һадисәләрини хариҹи дөвләтләр габардараг, түрк-ермәни мүнасибәтләрини нормаллашмаға имкан вермирләр. А.Түркешин бу ҹүр фикирләриндән сонра С.Өзарарат ондан хаһиш едир ки, о, бу сөзләри Ермәнистан президентинә дә шәхсән сөјләсин. А.Түркеш исә бу хаһиши гәбул едир”.
Ҝ.Чапан билдирир ки, А.Түркеш вә Л.Тер-Петросјан 1993-ҹү ил мартын 13-дә Парисин “Ҹонҹорде мејданы”нда јерләшән “Ҹриллон” отелиндә ҝөрүшүрләр. Һәмин ҝөрүшә Түркијә тәрәфиндән А.Түркешлә бирликдә сәфир Таншуғ Бледа, сәфирлик мүшавирләри Ментер Шаһинлер вә Туғрул Түркеш гатылыб. Ермәнистан тәрәфиндән исә Хариҹи Ишләр назири Ваһан Папазјан вә Ермәнистан Президентинин хариҹи мәсәләләр үзрә сөзчүсү, тарихчи Ҝерард Либаридиан гатылыр. Ҝөрүш тәгрибән 2,5 саат давам едир. Ҝөрүшү тәшкил едән Самсон Өзарарат билдириб ки, Парис ҝөрүшү ермәни-түрк мүнасибәтләриндә дөнүш јарада биләр.
Диггәт: Хәбәрдән истифадә етдикдә мәнбәјә истинад лазымдыр
