Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Мәркәзи Банкын сәдри Елман Рүстәмовун ардындан малијјә назири Самир Шәрифов да долларла кредити оланлара ҝүзәшт едилмәмәси илә бағлы мәсәләјә ајдынлыр ҝәтириб. С.Шәрифов суала суалла ҹаваб верәрәк, "Доллар кредити илә бағлы нәјә ҝөрә кимәсә ҝүзәшт едилмәлидир?" дејиб.
Назир билдириб ки, бир група ҝүзәшт едилсә, сабаһ башга груплар да ҝүзәшт тәләб едәҹәк. Назир бу мәсәләнин банкларла вәтәндашлар арасында һәлл едилмәли олдуғуну вурғулајыб.
Һөкумәт рәсмиләринин бу ачыгламалары мәтбуатда бирмәналы гаршыланмајыб. Експертләр исә бу аддымы һөкумәтин бөһранын вәтәндашлара јаратдығы чәтинликләрин һәллиндә мәсулијјәтдән гачмасы кими дәјәрләндирибләр.
Елман Рүстәмов вә Самир Шәрифовун ачыгламаларыны дәјәрләндирән игтисадчы експерт Рәшад Һәсәнов билдириб ки, һәр ики шәхсин ачыгламалары вә әсасландырдыглары аргументләр доғру дејил: “Бу, һәм Мәркәзи Банкын мәзәннә сијасәти илә бағлы иди, һәм дә бу сијасәтин әһалинин үзәринә салдығы бөһран јүкүнүн азалдылмасы истигамәтиндә бу гурумун мәсулијјәтсиз ачыгламаларындан гајнагланыр. Илкин дөврдә һөкумәтдән мәтбуата бәзи ачыгламалар сыздырылды, о ҹүмләдән парламентариләр ачыглама вердиләр ки, 10 мин маната гәдәр олан кредитләр үчүн ҝүзәштләр һазырланыр. Даһа сонра Елман Рүстәмов парламент мүзакирәләриндә бунун 5 мин маната гәдәр олаҹағыны ачыглады. Бир нечә ҝүн сонра исә чох әсассыз бир аргументлә чыхыш едәрәк, билдирди ки, малијјә позунтулары јарадаҹағы еһтималы олдуғу үчүн һәр һансы ҝүзәшт едилмәјәҹәк. Бундан әввәл дә Мәркәзи Банкдан ачыглама олмушду ки, бу проблем вәтәндаш вә банк арасындадыр”.
Игтисадчы експерт һөкумәтдәки малијјә гурумларына нәзарәт едән шәхсләрин өз јериндә олмадығыны гејд етди: “Өтән ил манат дүнјанын ән бөјүк девалвасијаја уғрајан валјутасы олду. Бу девалвасијдан әһалијә дәјән зәрәрин компенсасијасы илә бағлы да аддым атмаг истәмир. Бу, ҝөз габағындадыр. Буну һөкумәтин мөвгеји олараг гијмәтләндирмәк лазымдыр ки, сонракы дөврдә дә бөјүк еһтималла һеч бир көмәк олмајаҹаг, әсас јүк вәтәндашларла банклар арасында пајланаҹаг. Банкларда ән јахшы һалда вахтла бағлы ҝүзәшт едә биләҹәкләр. Биз мүшаһидәләримиздән дә ҝөрүрүк ки, банкларын фаиз ҝүзәштләри етмәк кими бир фикри јохдур. Бу исә банкларын ән јүксәк фаизләрлә јенидән кредитләшдирмә һәјата кечирмәси демәкдир. Просес һардаса банкларын да мәнфәәтинәдир. Ортада әзијјәт чәкән садәҹә, сосиал груплар вә әһали олаҹаг. Әһалинин бөјүк бир гисми банклара борҹлудур. Бу борҹлар мәһз һөкумәтин гәрары илә бир нечә дәфә артыб”.
Експертин фикринҹә, бурада ән ҝүлүнҹ мәгам ондан ибарәтдир ки, бир ҝүн әрзиндә гәрарлар бир нечә дәфә дәјишир: “Бу, ону ҝөстәрир ки, иҹтимаи рәј нәзәрә алынмыр, әһалинин чәтинликләри нәзәрә алынмыр, бүтүн ағырлыг халгын үзәринә гојулур. Бу бахымдан дүшүнүрәм ки, Мәркәзи Банк јениләнмәлидир. Елман Рүстәмовун да дәјишдирилмәсинә еһтијаҹ вар. Дүнјада чох аз Мәркәзи Банк сәдрләриндән биридир ки, 25 илдир, вәзифәдәдир. Бүтүн бунлар ону ҝөстәрир бу истигамәтдә дәјишиклијә еһтијаҹ вар”.
Рәшад Һәсәнов вурғулады ки, һөкумәт тәкҹә долларла јох, милли валјута илә олан кредитләрин өдәнилмәси илә бағлы да ҝүзәштләр дүшүнүлмәлидир: “Чүнки, әһалинин ҝәлирләри азалыб, иш јерләри бағланыб, ишсизлик артыб. Манатла олан кредитләрин өдәнилмәсиндә дә проблемләр вар. Игтисади бөһран вәтәндашларын ҝүнаһы дејил, бу бахымдан һөкумәт әһали үчүн ҝүзәштләр тәтбиг етмәлидир. Јүзмилјардларла вәсаит өлкәјә дахил олуб вә бу вәаситләр Малијјә Назирлији вә Мәркәзи Банк тәрәфиндән хәрҹләниб. Малијјә позунтусундан о заман данышмаг лазым иди. Дүнја тәҹрүбәси ону ҝөстәрир ки, бөһран дурумунда һөкумәт мәсулијјәти өз үзәринә ҝөтүрүр. Азәрбајҹанда исә бу, баш вермир”.
Диггәт: Хәбәрдән истифадә етдикдә мәнбәјә истинад лазымдыр
