Әһли Бејт (әлејһимус сәлам) -АБНА- Хәбәр Аҝентлији- “Кор аты миниб көндәлән чапмаг” – бу аталар мәсәләни јәгин ки, һамы ешидиб. Мәсәлин тәрс адамлар үчүн дејилдији дә чохларына бәллидир. Мөвҹуд һакимијјәт өз сијасәтиндә мәһз белә бир аддым нүмајиш етдирир. Адамын миндији ат кордуса, ону минән дә аты көндәлән чапырса, демәли, һансы мәгамдаса бу ҝедиш фәлакәтлә нәтиҹәләнәҹәк.
Һакимијјәт нә етдијини, милләти һара апардығыны билмир. Онлар, һәтта өзләрини һара апардығынын да фәргиндә дејилләр. Чинҝиз хан, Тејмурләнҝ, Гаҹар шаһ олмаг нијјәтиндәдир бунлар?! Онлар фатеһ идиләр вә өлкәләр зәбт едиб халгларынын, дөвләтләринин “башыны” уҹа едибләр. Заман да о вахткы дејил ахы… Дүнјанын бир дүзәни вар. Дүнја бирлијилә үз-үзә дурмаг, она мејдан охумаг, һирсин, һиккәнин әсири олмаг адамы, анҹаг өз ҝөзүндә уҹа ҝөстәрә биләр. Һакимијјәтдәкиләрин өзләриндән разылыг һисси, һакимијјәт һәрислији, вар-дөвләт һәрислијидир ки, һәм халгын, һәм дә өзләринин башында чатламагдадыр.
Һакимијјәт пирамидасыны халгын башында гурублар. Бир тәрәфдә Президент Администрасијасынын рәһбәри Рамиз Меһдијев, о бири тәрәфдә Назирләр Кабинетинин үзүнү ҝөрмәјән Артур Расизадә. Галан назирләр дә пирамиданын ашағы пилләләриндәдир. Онлар апардыглары сијасәтлә, дүнја бирлијини, Гәрби саја салмамагла, милләтин дәрд-сәринә гулаг асмамагла, мүхалифәти ешитмәмәклә фәалијјәт ҝөстәрирләр. Халгын дәјәрли, вәтәнә вә дөвләтә хејир верә билән оғул-гызларыны һәбсханалара долдурмагла нә әлдә етмәк истәјирләр?!
Бу мәмурлар өлкә игтисадијјјатыны чөкдүрүбләр. Манат артыг “ҹан верир”, гијмәтләр кәллә-чарха чыхыб, аналогу олмајан инкишаф нағыллары түкәниб, санксијалар гапынын ағзыны кәсдириб… Амма һакимијјәтдән кимсә чыхыб дејә билмир ки, дајанмаг вахтыдыр.
Бу, диктатуранын анатомијасыдыр. Бүтүн заманларда белә олуб. Башында пирамида гурулан халг артыг ону сахламаг игтидарында дејил. Халг тагәтдән дүшүб. Артыг пирамида силкәләнир. Онун ашмағына чох аз галыб. Ҝүҹлү бир тәкан, силкәләнмә бу пирамиданын дағылмасыјла нәтиҹәләнәҹәк.
О ҝүн узагда дејил…
Диггәт: Хәбәрдән истифадә етдикдә мәнбәјә истинад лазымдыр
