Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Сәфәр ајы мүсәлманлар үчүн мәһәррәм гәдәр һүзнлү бир ајдыр. Бу ајын 28-дә һәм Мәһәммәд Пејғәмбәр (Аллаһын саламы олсун Она вә пак Әһли бејтинә!) һагг дүнјасына говушмуш, һәм дә сонракы илләрдә елә сәфәр ајынын 28-дә әзиз нәвәси Имам Һәсән (Она салам олсун!) зәһәрләнәрәк шәһадәтә јетмишдир. Һәр ики мәсумун шәһадәти илә әлагәдар бүтүн мүсәлманлара тәслијјәт әрз едирик.
Ислам Пејғәмбәринин һәјаты илә гыса таныш олмаг үчүн ашағыдакы линки тыклајын.
Ислам Пејғәмбәри вә Имам Һәсәнин шәһадәт ҝүнү
Үчүнҹү мәсум имам Һәсән (Она салам олсун!) һакимијјәтә ҝәлдикдә Мүавијә илә сүлһ бағламалы олду.
Имам Һәсән (ә) да чалышырды ки, өз јүксәк вә Илаһи мәгсәдләрини мүмкүн гәдәр тәмин етсин. Буна ҝөрә дә, Мүавијә илә сүлһ етмәк мәҹбуријјәтиндә галанда мүгавиләнин биринҹи маддәсинә әсасән, һөкумәти Мүавијәјә бу шәртлә тәһвил верди ки, Мүавијә һөкумәти Гуран гајда-ганунлары вә Пејғәмбәрин (Аллаһын саламы олсун Она вә пак Әһли бејтинә!) сүннәси әсасында идарә етсин.
Мәлумдур ки, Имамын мәгсәди ҹәмијјәтдә Ислам гајда-ганунуну горујуб сахламаг вә ҹәмијјәтә бу гајда-ганун әсасында рәһбәрлик етмәк иди. Әҝәр бу гајда-ганун Мүавијә тәрәфиндән дә иҹра олунсајды, јенә Имамын мәгсәди аз да олса тәмин олунарды.
Буна әлавә олараг икинҹи маддәјә әсасән, Мүавијәнин өлүмүндән сонра Һәсән Ислам ҹәмијјәтинин рәһбәрлијини азад шәкилдә өз өһдәсинә ҝөтүрә биләрди. Мүавијәнин отуз јаш Һәсәндән бөјүк олдуғуну, о дөврдә артыг Мүавијәнин гоҹалыг вахтларыны кечиртмәсини вә ади һалла онун өмрүнүн сонларынын јахынлашдығыны нәзәрә аланда, бу маддәнин ади һесабламалар әсасында Ислам вә мүсәлманлар үчүн нә гәдәр фајдалы олдуғу мәлум олур. Мүгавиләнин диҝәр маддәләри дә бу ҹүр әһәмијјәт дашыјыр. Чүнки ҹүмә намазында вә еләҹә дә диҝәр намазларда Әлинин (Она салам олсун!) рәсми шәкилдә һеч бир горху олмадан ләнәтләндији, бу ишин бир бидәт кими ҹамаат арасында јајылдығы вә Әлинин (Она салам олсун!) Шиә вә достларынын, еләҹә дә Пејғәмбәрин (Аллаһын саламы олсун Она вә пак Әһли бејтинә!) аиләсинин (гоһум-әгрәбасынын) һәр јердә тәгиб олундуғу вә тутулараг ҹүрбәҹүр тәзјигләрә мәруз галдығы бир дөврдә бу ишләрин бундан белә тәкрар олунмајаҹағы барәдә маддә јазыб ону Мүавијәјә гәбул етдирмәк вә Мүавијәнин онлара әмәл едәҹәји вәдини онун дилиндән алмағын нә гәдәр бөјүк наилијјәт олдуғуну инкар етмәк мүмкүн дејил.
Куфәдә топланыш
Сүлһ мүгавиләси бағландыгдан сонра тәрәфләр ( Имам Һәсән (Она салам олсун!) илә Мүавијә (Аллаһын ләнәти олсун она!)) һәрә өз ордусу илә бирликдә Куфә шәһәринә ҝәлиб шәһәрин бөјүк Мәсҹидиндә бир јерә топлашдылар. Ҹамаат ҝөзләјирди ки, инди сүлһ мүгавиләсинин маддәләри һәр ики тәрәфин рәһбәрлијинин иштиркы илә ҹамаат үчүн охунулаҹаг вә даһа онун иҹра олунаҹағында һеч кимин шәкк-шүбһәси галмајаҹагдыр.
Әлбәттә, ҹамаатын бу интизары һеч дә јерсиз дејилди. Чүнки ҹамаат гаршысында чыхыш етмәк сүлһ програмынын әсасларындан бири иди. Буна ҝөрә дә, Мүавијә минбәрә чыхыб хүтбәјә башлады. Анҹаг о, нәинки сүлһүн маддәләринә әмәл едәҹәји һаггында сөһбәт етмәди, һәтта тәнә вә тәһгирлә деди: "Мән сизинлә намаз гылыб һәҹҹ јеринә јетирмәк, зәкат өдәмәк үчүн вурушмадым. Мән билирәм ки, онсуз да сиз бунлары јеринә јетирирсиниз. Мән сизинлә она ҝөрә вурушдум ки, сизи өзүмә табе едиб һөкумәти әлә кечирәм."
Даһа сонра деди: "Буну билин ки, Һәсән ибн Әли илә бағладығым сүлһ мүгавиләсинин бүтүн маддәләрини ајағым алтына гојуб тапдалајырам вә онларын һеч биринин дәјәри јохдур."
Беләликлә дә, Мүавијә (Аллаһын ләнәти олсун она!) Һәсән (Она салам олсун!) илә бағладығы сүлһ мүгавиләсини ајағы алтына салды вә ону ачыгҹасына позду.
Чох кечмәди ки, Имам Һәсәнин (Она салам олсун!) арвады васитәсилә о Һәзрәти зәһәрләди вә сәфәрин 28-и Имам Һәсән (Она салам олсун!) шәһадәтә говушду.
Диггәт: Хәбәрдән истифадә етдикдә мәнбәјә истинад лазымдыр
