Өлкәмиздә мүхтәлиф адлар алтында фәалијјәт ҝөстәрән дини тәшкилатлар, ҹәмијјәтдә танынмыш, он минләрлә тәрәфдашы олан илаһијјатчылар вар. Амма бу тәшкилатлар вә дини лидерләр әнәнәви фәалијјәтлә мәшғул олурлар, моизәләр охујурлар, дини мүбаһисәләрә ајдынлыг ҝәтирирләр вә.с
Амма Тале Бағырзадәнин рәһбәрлик етдији “Мүсәлман Һәмрәјлији Бирлији” тәригәт давасы апармаға, сүнни-шиә “розборка”сына көкләнмәмишди. Әксинә, Тале Бағырзадә Имам Һүсејндән, Кәрбәладан данышанда да буҝүнкү дөврлә мүгајисәләр апарырды. Һәмишә моизәләриндә өлкәдәки әдаләтсизликдән, һакимијјәтин ганунсуз әмәлләриндән данышыб. Јәни Тале Бағырзадә бәзиләри кими јалныз намаз гылмагла, оруҹ тутмагла кифајәтләнмирди. Өлкәдә баш верәнләрә мүнасибәт билдирирди, тәрәфдашларыны һәм дә вәтәндаш олмаға сәсләјирди. Бир сөзлә, Тале Бағырзадә һакимијјәти кәскин тәнгид едирди вә гејри-дини кәсим арасында да рәғбәт газанмаға башламышды. Үстәлик, Тале Бағырзадә сијаси мүхалифәтә гаршы тәзјигләрә, һагсызлылглара да биҝанә глмырды. Шәрләнәрәк һәбс едилмәси, һәбсдән ејни гәтијјәтлә чыхмасы, өз фәалијјәтиндә ардыҹыл олмасы һакимијјәти нараһат едирди. Дәфәләрлә ону хәбәрдар етсәләр дә, горхутсалар да, полис бөлмәсинә чағырсалар да Тале Бағырзадә “ағ бајраг” галдырмады.
Бир сөзлә, Тале Бағырзадә “Аллаһ һөкумәтимизи горусун” демәдији үчүн “гара сијаһы”ја дүшдү.
Амма дүнән баш верәнләрин сәбәби тәкҹә бу да дејил. Сон ҝүнләр өлкәнин әсас ҝүндәми МТН-дә баш верәнләрлә чалхаланырды. Һәр ҝүн һөкумәтин имиҹи даһа да корланырды. “МТН иши” ҝүндәмдә галдыгҹа, һакимијјәт командасында тәмиз адам олмадығы, бүтүн команданын ејни чиркаба булашдығы фикри ҝүҹләнирди. Диҝәр тәрәфдән, сон 2-3 ҝүндә Түркијә-Русија мүнасибәтләринин ҝәрҝинләшмәси вә Азәрбајҹан һөкумәтинин гардаш өлкәјә дәстәк вермәмәси дә ҹидди гынаға сәбәб олмушду. Хүсусән дә һөкумәтјөнлүләрин “Түркијә Русијадан үзр истәмәлидир” тәблиғаты исә бирмәналы олараг ҹәмијјәтдә һакимијјәтә гаршы икраһ һисси јаратмышды. Бир даһа ајдын олмушду ки, һакимијјәт ермәнипәрәст Русијанын јанындадыр вә “гардаш Түркијә” шүарында гејри-сәмимидир.
Нардаранда баш верәнләр исә ҝүндәми тамам дәјишди. Беләликлә, МТН һадисәләри дә, Түркијәјә мүнасибәтдәки ријакарлыг да икинҹи плана кечди.
Вә нәһајәт, һәр дәфә бејнәлхалг тәзјиг артанда, дахилдә наразылыг мејлләри һисс олунанда һөкумәт мүәјјән “ҝедишләр” едир. Нардаранда баш верәнләр илк нөвбәдә дүнјаја месаж иди. Һөкумәт бејнәлхалг аләмә чатдырмаг истәјир ки, бизим һакимијјәтин алтернативи радикал, екстермист диндарларды. Јәни “бизи девирмәк, бизимлә әлагәләри түкәндирмәк фикринә дүшсәниз, гаршынызда террорчу тәфәккүрлү инсанлары ҝөрәҹәксиниз”- гәнаәтини формалашдырмаг истәјирләр. Бу мәнада инанҹлы инсанлары агрессивләшдирмәк дә һөкумәтин ишинә јарајыр. Чүнки, агрессив реаксијанын “түстү”сү даһа ајдын шәкилдә ҝөрүнүр. Тәбии ки, һөкумәт бу “ссенари”ни давам етдирә дә биләр. Һаҹы Зүлфгүгарын, Ҝәнҹә диндарларынын һәбси дә бу тәблиғата хидмәт едә биләр.
Һәм дә Нардаран әмәлијатында дахили аудиторијаја да месаж верилир. Азәрбајҹан әһалисинин бөјүк әксәријјәти дүнјәвилик тәрәфдарыды, өлкәдә һәр һасны гејри-сабитлијин јаранмасыны һеч бир вәтәндаш истәмәз. Һәм дә узун мүддәтдир һөкумәт “Азәрбајҹаны Суријаја чевирмәк истәјирләр” тәблиғаты апардығы үчүн, Нардаран һадисәләрини ҝөстәрмәклә, ҹәмијјәтдә бу инсаналра гаршы етиразы формалашдырмыш олур. Нәтиҹә етибарилә бејнәлхалг аләмдә дә бу гәнаәти јаратмаг истәјирләр ки, ҹәмијјәт дә һакимијјәти дәстәкләјир. Ҝуја, јеҝанә алтернатив радикал диндарларды вә халг бу алтернативи гәбул етмир.
Беләликлә, һәр 3 версија буну ҝөстәрир ки, Нардаран әмәлијаты дөвләтин вә милләтин тәһлүкәсизлији үчүн јох, һакимијјәтин өз күрсүсүнү горумасы үчүн реаллашдырылыб.
Илһам
Диггәт: Хәбәрдән истифадә етдикдә мәнбәјә истинад лазымдыр
