октјабрын 20-дә Зәнҝилан Бејнәлхалг Һава Лиманынын ачылышы илә әлагәдар Ҹәбрајыл шәһәриндә тәкбәтәк ҝөрүш баша чатандан сонра Түркијә Республикасынын президенти Рәҹәб Тәјјиб Әрдоған Ермәнистанын Сүник вилајәтиндә “Зәнҝәзур Дәһлизи”нин јарадылмасы ишиндә Азәрбајҹан Республикасына дәстәк нүмајиш етдириб. О, өлкәләрин әрази бүтөвлүјү вә суверен һүгугларынын горунмасы принсипинә зидд олараг, Иран Ислам Республикасынын нараһатлығыны да гулаг ардына вуруб вә дејиб: “Нахчываны Азәрбајҹанын гәрб рајонлары илә бирләшдирәҹәк Зәнҝәзур дәһлизи илә бағлы бәзи даирәләрдәки горху вә нараһатлыг мәнә ҝөрә реаллыгдан узагдыр. Јәни, артыг бүтүн Гарабағла бағлы атылан бу аддымлардан сонра белә бир горхуја еһтијаҹ јохдур. Азәрбајҹан әмин аддымларла јолуна давам едир.”
Мараглыдыр ки, Ермәнистан рәһбәрлији реҝионда јалныз бир дәһлизин олдуғуну гејд едир вә билдирир ки, о да Лачын Дәһлизидир. Баш назир Пашинјанын билдирдијинә ҝөрә, 2020-ҹи ил 10 нојабр бәјанатында сырф коммуникасијаларын ачылмасы нәзәрдә тутулуб вә Ирәванын Азәрбајҹана дәһлиз вермәси барәдә һеч бир өһдәлији јохдур. Азәрбајҹан исә тамамилә фәргли риторикадан чыхыш едәрәк өз истәјиндә исрарлыдыр. Она ҝөрә дә һазырда Түркијә дөвләт башчысынын ачыгламасы Азәрбајҹанла Ермәнистан арасында јени мүһарибәнин баш верә биләҹәји һагда нараһатлыға сәбәб олмушдур.
Бәлкә дә Әрдоған тәрәфиндән Нахчыванла Азәрбајҹан Республикасыны бирләшдирән Зәнҝәзур дәһлизинин јарадылмасы Түркијәнин бу дәһлиз васитәсилә Хәзәр дәнизинә говушмаг мотивасијасы илә бағлыдыр. Анҹаг Түркијәнин Зәнҝәзур планы реҝионун ҝеосијаси сәрһәдләринин дәјишмәси илә јанашы, Иран Ислам Республикасы илә Ермәнистан арасында сәрһәдин гырылмасына сәбәб олаҹаг ки, бу да ики өлкә рәсмиләринин ҹидди етиразына сәбәб олмушдур.
Рәсми Бакынын Анкаранын дәстәкләдији Зәнҝәзур Дәһлизинин јарадылмасында исрарлы олмасы Иран Ислам Республикасы тәрәфиндән дәфәләрлә тәнгид едилиб. Бунунла бағлы Иран Ислам Республикасынын президенти Сејид Ибраһим Рәиси бу ҝүнләрдә Астанада кечирилән саммит чәрчивәсиндә азәрбајҹанлы һәмкары Илһам Әлијев илә ҝөрүшдә Иран вә Ермәнистанын тарихи сәрһәдләриндә, реҝионун ҝеосијасәтиндә вә транзит маршрутунда истәнилән дәјишиклији рәдд едиб вә билдириб ки, Иран бу мәсәләдә гәтијјәтлидир.
342/
