Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Баш Прокурорлуг кечмиш милли тәһлүкәсизлик назири Елдар Маһмудовун әмиси оғлу Вүгар Маһмудовун барәсиндә олан һөкмдән апеллјасија протести вериб.
“Репорт”ун әлдә етдији мәлумата ҝөрә, бунунла бағлы дөвләт иттиһамчысы Бакы Апеллјасија Мәһкәмәсинә мүраҹиәт едиб.
Белә ки, Баш Прокурорлуг биринҹи инстансија мәһкәмәсинин В.Маһмудовун әмлаклары илә бағлы чыхардығы һөкмдән наразы галыб.
Мәлумата ҝөрә, апеллјасија протестинин верилмә мүддәти баша чатыб. Прокурорлуг исә мүддәтин бәрпасы үчүн Бакы Һәрби Мәһкәмәсинә мүраҹиәт едиб. Мәһкәмә мүраҹиәти тәмин едиб.
Бакы Апеллјасија Мәһкәмәсиндә кечириләҹәк апеллјасија протести үзрә мәһкәмә иҹласы февралын 3-нә тәјин едилиб.
Апеллјасија протести һаким Елмар Рәһимовун иҹраатына верилиб.
Гејд едәк ки, кечмиш милли тәһлүкәсизлик назири Е.Маһмудовун әмиси оғлу В.Маһмудов 2017-ҹи ил нојабр ајынын әввәлиндә һәбс едилиб.
Ләғв едилмиш Милли Тәһлүкәсизлик Назирлијинин (МТН) Антитеррор Мәркәзинин шөбә рәисинин мүавини вәзифәсиндә ишләмиш вә сабиг назир Е.Маһмудовун көмәкчиси функсијасыны һәјата кечирмиш полковник-лејтенант В.Маһмудова Ҹинајәт Мәҹәлләсинин 179.3.1-ҹи (мүтәшәккил дәстә тәрәфиндән мәнимсәмә вә ја исраф етмә), 179.3.2-ҹи (күлли мигдарда мәнимсәмә вә исраф етмә), 182.3.1-ҹи (күлли мигдарда әмлак әлдә етмәк мәгсәди илә һәдә-горху јолу илә тәләб етмә), 182.3.2-ҹи (күлли мигдарда әмлак әлдә етмәк мәгсәди илә һәдә-горху јолу илә тәләб етмә), 302.1-ҹи (әмәлијјат-ахтарыш фәалијјәтини һәјата кечирмәк сәлаһијјәтинә малик олмајан шәхсләр тәрәфиндән белә тәдбирләрин кечирилмәси, һабелә әмәлијјат-ахтарыш фәалијјәтини һәјата кечирмәк сәлаһијјәтинә малик олан шәхсләр тәрәфиндән һәмин тәдбирләрин ганунвериҹиликлә мүәјјән едилмиш әсаслар олмадан кечирилмәси шәхсин һүгуг вә ганунла горунан мәнафеләринин әһәмијјәтли позулмасына сәбәб олдугда), 302.2-ҹи (ејни әмәлләр ҝизли гајдада информасија алынмасы үчүн нәзәрдә тутулмуш техники васитәләрдән истифадә едилмәклә төрәдилдикдә) вә 341.2.1-ҹи (бир груп шәхс тәрәфиндән, ағыр нәтиҹәләрә сәбәб олмагла һакимијјәтдән суи-истифадә етмә) маддәләри илә иттиһам ирәли сүрүлүб.
Бакы Һәрби Мәһкәмәсинин һөкмү илә о, 2 ил мүддәтинә азадлыгдан мәһрум едилиб. В.Маһмудов истинтаг дөврүндә ҹәза мүддәтини чәкдији үчүн мәһкәмә залындан азадлыға бурахылыб.
Һөкмдә һәмчинин гејд едилиб ки, В.Маһмудова мәхсус әмлаклар мүсадирә олунуб.
Мәһкәмә һөкмүндән наразы галан сабиг МТН әмәкдашы апеллјасија шикајәти вериб. Бакы Апеллјасија Мәһкәмәси биринҹи инстансија мәһкәмәсинин чыхардығы һөкмү гүввәдә сахлајыб. Даһа сонра о, кассасија шикајәти илә Али Мәһкәмәјә мүраҹиәт едиб. Али Мәһкәмә исә В.Маһмудовун әмлаклара мүнасибәтдә шикајәтини гисмән тәмин едиб.
Диггәт: Хәбәрдән Истифадә Етдикдә Мәнбәјә Истинад Лазымдыр!
